അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ക്യാബിനറ്റിലെ ആര്ട്ടിഫിഷ്യല് ഇന്റലിജന്സ് സീനിയര് വൈറ്റ് ഹൗസ് പോളിസി അഡൈ്വസറായി ഇന്ത്യന്-അമേരിക്കന് സംരംഭകനും വെഞ്ച്വര് ക്യാപിറ്റലിസ്റ്റുമായ ശ്രീറാം കൃഷ്ണന് നിയമിതനായി. വൈറ്റ് ഹൗസ് ഓഫീസ് ഓഫ് സയൻസ് ആൻഡ് ടെക്നോളജി പോളിസിയിലെ അഡ്വൈസറായാണ് ശ്രീറാം കൃഷണനെ ട്രംപ് നിയോഗിച്ചത്. അമേരിക്കന് പ്രസിഡന്റിനോടൊപ്പം വൈസ് പ്രസിഡന്റും 15 എക്സിക്യൂട്ടീവ് ഡിപ്പാര്ട്ടുമെന്റ് തലവന്മാരും ഉള്പ്പെടുന്ന സര്ക്കാരിന്റെ കാബിനറ്റിലേയ്ക്കാണ് ഇന്ത്യന് വംശജരും ഉള്പ്പെടുന്നത്. രാജ്യത്തെ സർക്കാർ മേഖലകളിലുടനീളം എഐ നയം രൂപപ്പെടുത്തുന്നതിൽ ശ്രീറാം നിർണായക പങ്ക് വഹിക്കുമെന്ന് ട്രംപ് ചൂണ്ടിക്കാട്ടി.
മൈക്രോസോഫ്റ്റിന്റെ വിന്ഡോസ് അസൂര് ടീമിന്റെ സ്ഥാപക അംഗമെന്ന നിലയില് ശ്രീറാം കൃഷ്ണന്റെ കരിയറിലെ പ്രധാന നേട്ടങ്ങളെ കണക്കിലെടുത്താണ് ട്രംപ് ഇങ്ങനെയൊരു നിയമനം നടത്തിയത്. വൈറ്റ് ഹൗസിന്റെ ആര്ട്ടിഫിഷ്യല് ഇന്റലിജന്സ് ഉപദേഷ്ടാവായി നിയമിതനായ ശ്രീറാം കൃഷ്ണന് സര്ക്കാരിലുടനീളം എഐ നയം രൂപപ്പെടുത്തുകയും ഏകോപിപ്പിക്കുകയും ചെയ്യുമെന്ന് ട്രംപ് അറിയിച്ചു. ശ്രീറാം എഐ, ക്രിപ്റ്റോ കറൻസി പോളിസി വകുപ്പിൽ പുതുതായി നിയമിതനായ ഡേവിഡ് ഒ. സാക്സുമായി ചേർന്ന് പ്രവർത്തിക്കുമെന്ന് ട്രംപ് വ്യക്തമാക്കി. പ്രസിഡന്റ്സ് കൗണ്സില് ഓഫ് അഡൈ്വസേഴ്സ് ഓണ് സയന്സ് ആന്ഡ് ടെക്നോളജിയുമായി സഹകരിച്ചായിരിക്കും ശ്രീറാം കൃഷ്ണന് പ്രവര്ത്തിക്കുക.
ശ്രീറാമിനെ നിയമനം അറിയിച്ച് ട്രംപ് എക്സ് പോസ്റ്റ് പങ്കുവെച്ചിട്ടുണ്ട്. നിയമനത്തിൽ ട്രംപിന് നന്ദി അറിയിച്ച്കൊണ്ട് ശ്രീറാം എക്സ് പോസ്റ്റ് പങ്കുവച്ചു. പേപാലിന്റെയും വൈറ്റ് ഹൗസ് എഐ & ക്രിപ്റ്റോയുടെയും മുന് സിഒഒ ഡേവിഡ് ഒ സാക്സുമായി പ്രവര്ത്തിക്കാനുളള ആവേശം ശ്രീറാം കൃഷ്ണനും പങ്കുവെച്ചിട്ടുണ്ട്. എഐയിൽ അമേരിക്കൻ നേതൃത്വം ഉറപ്പാക്കുമെന്നും, രാജ്യത്തെ സേവിക്കുന്നതിൽ അഭിമാനമുണ്ടെന്നും ശ്രീറാം പോസ്റ്റിൽ പറഞ്ഞു. എഐയിൽ അമേരിക്കൻ നേതൃത്വം ഉറപ്പാക്കുക, ശാസ്ത്ര സാങ്കേതിക വിദ്യ സംബന്ധിച്ച പ്രസിഡൻ്റിൻ്റെ കൗൺസിൽ ഓഫ് അഡ്വൈസേഴ്സുമായി ചേർന്ന് പ്രവർത്തിക്കുക തുടങ്ങിയവയാണ് ശ്രീറാമിന്റെ ചുമതലകൾ.
തമിഴ്നാട് സ്വദേശിയാണ് ശ്രീറാം കൃഷ്ണൻ. കാഞ്ചീപുരം എസ്ആർഎം വള്ളിയമ്മൈ എഞ്ചിനീയറിംഗ് കോളേജിൽ നിന്നാണ് ബിരുദം നേടിയത്. പിന്നീട് മൈക്രോസോഫ്റ്റിൽ കരിയർ ആരംഭിച്ചു. വിൻഡോസ് അസ്യൂറിൻ്റെ സ്ഥാപക അംഗങ്ങളിൽ ഒരാളാണ് ശ്രീറാം. അസ്യൂറിൻ്റെ എപിഐകളുടെയും സേവനങ്ങളുടെയും ഭാഗമായാണ് ശ്രീറാം പ്രവർത്തിച്ചിരുന്നത്. ‘പ്രോഗ്രാമിങ് വിൻഡോസ് അസ്യൂർ’ എന്ന പുസ്തകത്തിന്റെ രചയിതാവാണ്. 2013 ൽ ശ്രീറാം ഫേസ്ബുക്കിന്റെ ഭാഗമായി. കമ്പനിയുടെ മൊബൈൽ ആപ്പ് പരസ്യ വിഭാഗത്തിൽ സുപ്രധാന പങ്ക് വഹിച്ചു. ശേഷം സ്നാപ്പിലും ശ്രീറാം ജോലി ചെയ്തിട്ടുണ്ട്. 2019 ൽ ശ്രീറാം എക്സിന്റെ ഭാഗമായി. പ്ലാറ്റ്ഫോമിന്റെ പുനഃക്രമീകരണത്തിൽ ഇലോൺ മസ്കുമായി ചേർന്ന് പ്രവർത്തിച്ചിരുന്നു. 2021-ൽ ആൻഡ്രീസെൻ ഹൊറോവിറ്റ്സിൽ (a16z) പൊതു പങ്കാളിയായി. പിന്നീട് 2023-ൽ, ലണ്ടനിലെ സ്ഥാപനത്തിൻ്റെ ആദ്യത്തെ അന്താരാഷ്ട്ര ഓഫീസിന് നേതൃത്വം നൽകി.
നിക്ഷേപകനും ഇന്ത്യൻ ഫിൻടെക് കമ്പനിയായ ക്രെഡിൻ്റെ ഉപദേശകനുമാണ് ശ്രീറാം. ഭാര്യ ആരതി രാമമൂർത്തിയ്ക്കൊപ്പം ‘ആരതി ആൻഡ് ശ്രീറാം ഷോ’ എന്ന പോഡ്കാസ്റ്റും ചെയ്യാറുണ്ട്. അമേരിക്കൻ സര്ക്കാരിന്റെ കാബിനറ്റിലേയ്ക്ക് ഇന്ത്യന് വംശജനും ഉൾപ്പെടുന്നതോടെ അമേരിക്കന് രാഷ്ട്രീയത്തില് ഇന്ത്യന് വംശജരുടെ സാന്നിധ്യം വര്ധിച്ചു വരികയാണ്. അമേരിക്കയുടെ സെക്കന്ഡ് ലേഡി, നിയുക്ത വൈസ് പ്രസിഡന്റ് ജെ. ഡി. വാന്സിന്റെ ഭാര്യയും ഇന്ത്യന് വംശജയുമായ ഉഷ വാന്സാണ്. പരസ്യമായി പ്രഖ്യാപിക്കാത്ത എക്സിക്യൂട്ടീവ് നിയമനങ്ങളില് ഇന്ത്യന് വംശജരായ വിവേക് രാമസ്വാമി, കാഷ് പട്ടേല്, ഡോക്ടര് ജെയ് ഭട്ടാചാര്യാ, ഹര്മിത് ധില്ലന് എന്നിവരും ഉള്പ്പെടുമെന്നാണ് വിലയിരുത്തലുകള്. ഹര്മിത് ധില്ലന് ഡിഫന്റര് ഓഫ് സവില് റൈറ്റ്സ് വകുപ്പിലും, ഡോ. ജെയ് ഭട്ടാചാര്യ ഇന്നോവേറ്റര് ഇന് പബ്ലിക് ഹെല്ത്തിലും, കാഷ് പട്ടേല് എഫ്.ബി.ഐ. ഡയറക്ടറായും, വിവേക് രാമസ്വാമി സ്ട്രീമിംഗ് ഗവണ്മെന്റ് എഫിഷെന്സി വകുപ്പിലും ജനുവരി 20ന് ചുമതലയേല്ക്കുമെന്ന് വിവരങ്ങള്.