വയനാട്ടിലെ മുണ്ടക്കൈ ഉരുൾപൊട്ടൽ ദുരന്തത്തില് മരിച്ച തിരിച്ചറിയാത്ത മൃതദേഹങ്ങള് സംസ്കരിച്ചു തുടങ്ങി. തിരിച്ചറിയപ്പെടാത്ത മൃതദേഹങ്ങളിൽ 8 എണ്ണം ഇന്നലെ സംസ്കരിച്ചു. ശേഷിച്ച മൃതദേഹങ്ങളുടെ സംസ്കാരം ഇന്ന് നടക്കും. മേപ്പാടി കമ്യൂണിറ്റി ഹാളില്നിന്ന് ആംബുലന്സുകളില് എത്തിച്ച മൃതദേഹങ്ങള് ഹാരിസണ്സ് മലയാളം ലിമിറ്റഡിന്റെ തോട്ടത്തില് സംസ്കരിക്കുകയായിരുന്നു. സര്വമത പ്രാര്ഥനയോടെയായിരുന്നു സംസ്കാരം. നേരത്തെ സംസ്കാരത്തിനായി സർക്കാർ പ്രത്യേക മാർഗ നിർദേശം പുറത്തിക്കിയിരുന്നു.
വൈകീട്ട് നാലുമണിയോടെ സംസ്കാരം നടക്കും എന്നായിരുന്നു നേരത്തെ അറിയിച്ചത്. ഏറെ വൈകിയാണ് മേപ്പാടിയില്നിന്ന് പുത്തുമലയിലേക്ക് മൃതദേഹങ്ങളുമായി ആംബുലന്സുകള് തിരിച്ചത്. ചുരുങ്ങിയ സമയം ആളുകള്ക്ക് ആദരമര്പ്പിക്കാന് സമയം അനുവദിച്ചു. തുടര്ന്നാണ് സര്വമത പ്രാര്ഥനയും സംസ്കാരചടങ്ങുകളും നടന്നത്.
ചൂരല്മല സെന്റ് സെബാസ്റ്റിയന്സ് ചര്ച്ച് വികാരി ഫാ. ജിബിന് വട്ടക്കുളത്തിൻ്റെ നേതൃത്വത്തിലായിരുന്നു ക്രൈസ്തവ ആചാരപ്രകാരമുള്ള പ്രാര്ഥന. മേപ്പാടി മാരിയമ്മന് ക്ഷേത്രത്തിലേയും ചൂരല്മല ശിവക്ഷേത്രത്തിലേയും ഭാരവാഹികളും സമുദായസംഘടനകളും ഹിന്ദു മതാചാരപ്രകാരമുള്ള ചടങ്ങുകള്ക്കായി സ്ഥലത്തുണ്ടായിരുന്നു. മാരിയമ്മന് ക്ഷേത്രത്തിലെ കുട്ടന് ആണ് ചടങ്ങുകള്ക്ക് നേതൃത്വം നല്കിയത്. മേപ്പാടി മഹല്ലിലെ ഖത്തീബ് മുസ്തഫുല് ഫൈസി മയ്യത്ത് നിസ്കാരത്തിന് നേതൃത്വം നല്കി.
പി.പി.ഇ. കിറ്റ് ധരിച്ച സന്നദ്ധപ്രവര്ത്തകരാണ് സംസ്കാരച്ചടങ്ങുകള്ക്ക് നേതൃത്വം നല്കിയത്. പത്തടിയോളം താഴ്ചയില് 32 കുഴികളാണ് ഒരുക്കിയത്. പുത്തുമലയില് മുമ്പ് ഉരുള്പൊട്ടല് ദുരന്തമുണ്ടായ സ്ഥലത്താണ് കൂട്ടസംസ്കാരത്തിനുള്ള സൗകര്യമൊരുക്കിയത്. ഞായറാഴ്ച രാവിലെയാണ് സര്ക്കാര് ഇത് സബന്ധിച്ച ഉത്തരവിറക്കിയിരുന്നത്. തുടർന്ന് വൈകീട്ട് അഞ്ചുമണിയോടെ തന്നെ കുഴികള് ഒരുക്കിയിരുന്നു. അരയേക്കറോളം സ്ഥലമാണ് ഹാരിസണ്സ് മലയാളം വിട്ടുനില്കിയത്.
ഇന്നത്തെ തെരച്ചലിൽ ചൂരൽമല വില്ലേജ് റോഡിൽ നിന്ന് രണ്ട് മൃതദേഹങ്ങൾ കണ്ടെടുത്തു. ഇന്നലെ ചാലിയാർ പുഴയിൽ തെരച്ചിലിനിടെ കണ്ടെത്തിയ മൃതദേഹം ഹെലികോപ്ടറിൽ മേപ്പാടിയിലെത്തിച്ചു. ബെയിലി പാലത്തിന് അപ്പുറത്തെ തെരിച്ചലിനായുള്ള സന്നദ്ധ പ്രവര്ത്തകരുടെ എണ്ണം ഇന്ന് നിജപ്പെടുത്തിയിരുന്നു. 12 സോണുകളിലായി 50 പേര് വീതമുള്ള സംഘങ്ങളാണ് ഇന്ന് തെരച്ചില് നടത്തുന്നത്.
മുണ്ടക്കൈ ഉരുൾപൊട്ടൽ ദുരന്തത്തിൽ മരിച്ചവരുടെ എണ്ണം 402 ആയി. മണ്ണിനടിയിൽ നിന്നും ചാലിയാറിൽ നിന്നുമടക്കം കണ്ടെടുത്തവയിൽ 180 എണ്ണം ശരീരഭാഗങ്ങളാണ്. അതേ സമയം ഔദ്യോഗിക കണക്കനുസരിച്ച് മരണസംഖ്യ 222 ആണ്. 180 പേരെ ഇനിയും കണ്ടെത്താനുണ്ട്.