പി വി അന്വറിനെതിരെ വിജിലന്സ് അന്വേഷണത്തിന് ഉത്തരവ്. ആലുവയില് 11 ഏക്കര് ഭൂമി അനധികൃതമായി കൈവശപ്പെടുത്തിയെന്ന പരാതിയിലാണ് അന്വേഷണത്തിന് ഉത്തരവിട്ടത്. പാട്ടത്തിനെടുത്ത ഭൂമി പോക്കുവരവ് നടത്തി സ്വന്തം പേരിലേക്ക് മാറ്റി തട്ടിയെടുത്തുവെന്നാണ് പരാതി. വിഷയത്തില് പ്രാഥമിക അന്വേഷണം നടത്തിയ വിജിലന്സ് വിശദമായ അന്വേഷണത്തിന് ശുപാര്ശ ചെയ്തു. അന്വറിന്റെ ഭാഗത്തുനിന്ന് വീഴ്ചയുണ്ടായെന്നാണ് പ്രാഥമിക അന്വേഷണത്തില് കണ്ടെത്തിയതെന്ന് റിപ്പോര്ട്ടുകളുണ്ട്.
കൊല്ലം സ്വദേശിയായ മുരുകേഷ് നരേന്ദ്രനാണ് പി വി അന്വറിനെതിരെ പരാതി സമര്പ്പിച്ചത്. സംഭവത്തിൽ വിജിലന്സ് പ്രാഥമിക അന്വേഷണം നടത്തി ആഭ്യന്തരവകുപ്പിന് റിപ്പോര്ട്ട് നല്കിയിരുന്നു. ഇതിലാണ് കൂടുതല് വിശദമായ അന്വേഷണം നടത്താന് വകുപ്പ് അഡീഷണല് സെക്രട്ടറി ഉത്തരവിട്ടത്. പാട്ടത്തിനെടുത്ത ഭൂമി എങ്ങനെ പോക്കുവരവ് നടത്തും, ഇങ്ങനെ ചെയ്യുന്നതില് അപാകതയുണ്ടോ ഇതില് അന്വറിനെന്താണ് നേട്ടം തുടങ്ങിയ കാര്യങ്ങളാവും വിജിലന്സ് അന്വേിക്കുക. വിശദ അന്വേഷണത്തിന് സ്പെഷ്യല് ഇന്വസ്റ്റിഗേഷന് തിരുവനന്തപുരം യൂണിറ്റ് രണ്ടിന് ചുമതല നല്കിയാണ് ഉത്തരവ് പുറത്തിറങ്ങിയിരിക്കുന്നത്. അടുത്ത ദിവസങ്ങളില് തന്നെ ഈ സ്ഥലത്തെത്തി വിജിലന്സ് സംഘം ഭൂമി പരിശോധിക്കുമെന്നാണ് വിവരം. മുന്പ് ഉയര്ന്നുവന്ന വിവാദങ്ങളും അന്വേഷണങ്ങളും രാഷ്ട്രീയ പ്രേരിതമാണെന്നും പകപോക്കലാണെന്നുമായിരുന്നു അന്വറിന്റെ വാദം. പുതിയ വിവാദത്തില് അന്വര് ഇതുവരെ പ്രതികരിച്ചിട്ടില്ല.
വര്ഷങ്ങള്ക്ക് മുന്പ് സര്ക്കാര് ഒരു കമ്പനിക്ക് പാട്ടത്തിന് ഭൂമി നൽകിയിരുന്നു. ഭൂമി ജാമ്യത്തില് കാണിച്ച് കമ്പനി വായ്പയെടുത്തിരുന്നു. എന്നാല് ഈ തുക പൂര്ണമായും അടച്ചുതീര്ക്കാന് കമ്പനിക്ക് കഴിഞ്ഞില്ല. തുടര്ന്ന് അന്വര് ഈ ഭൂമിയേറ്റെടുക്കുകയായിരുന്നു. പിന്നീടാണ് പോക്കുവരവ് നടത്തി സ്വന്തമാക്കിയത്. കോടിക്കണക്കിന് രൂപ മൂല്യമുള്ള ഭൂമിയില് ഒരു കെട്ടിടവും സ്ഥിതി ചെയ്യുന്നുണ്ട്.