ലോകം ഭീകരതയുടെ പിടിയിലാണെന്ന് പ്രധാനമന്ത്രി നരേന്ദ്ര മോദി യുദ്ധവും സംഘർഷങ്ങളും മാനവരാശിയുടെ താല്‍പര്യങ്ങള്‍ക്കെതിരാണെന്നും പ്രധാനമന്ത്രി നരേന്ദ്ര മോദി പറഞ്ഞു. ഡൽഹിയിൽ നടക്കുന്ന ഒൻപതാമത് ജി20 പാർലമെന്ററി സ്‌പീക്കേഴ്‌സ് ഉച്ചകോടിയുടെ (പി20) ഉദ്ഘാടന സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
ഇന്ത്യ പതിറ്റാണ്ടുകളായി അതിർത്തി കടന്നുള്ള ഭീകരതയെ അഭിമുഖീകരിക്കുന്നു, തീവ്രവാദികൾ ആയിരക്കണക്കിന് നിരപരാധികളെ കൊന്നൊടുക്കി,” ഭീകരവാദം എത്ര വലിയ വെല്ലുവിളിയാണെന്ന് ലോകം ഇപ്പോൾ തിരിച്ചറിയുകയാണെന്നും അത് മനുഷ്യരാശിക്കെതിരാണെന്നും പ്രധാനമന്ത്രി മോദി കൂട്ടിച്ചേർത്തു. “ഇന്ന് ലോകം അഭിമുഖീകരിക്കുന്ന സംഘർഷങ്ങളും ഏറ്റുമുട്ടലുകളും ആർക്കും ഗുണം ചെയ്യുന്നില്ല. വിഭജിക്കപ്പെട്ട ലോകത്തിന് മനുഷ്യരാശിക്ക് മുന്നിലുള്ള വെല്ലുവിളികൾക്ക് പരിഹാരം നൽകാനും കഴിയില്ല.” ഇപ്പോൾ നടക്കുന്ന ഇസ്രയേൽ-ഹമാസ് യുദ്ധത്തെക്കുറിച്ച് പരാമർശിച്ച് കൊണ്ട്, പ്രധാനമന്ത്രി നരേന്ദ്ര മോദി മുന്നറിയിപ്പ് നൽകി
എല്ലാ രൂപത്തിലുമുള്ള ഭീകരവാദവും ഉന്മൂലനം ചെയ്യണമെന്നും ഇക്കാര്യത്തിൽ സമവായം ഇല്ലാത്തത് ഭീകരർ മുതലെടുക്കുന്നുവെന്നും പ്രധാനമന്ത്രി അഭിപ്രായപ്പെട്ടു. ഭീകരവാദ ആക്രമണങ്ങൾ നേരിട്ടാണ് ഇന്ത്യയും മുന്നോട്ടു പോകുന്നതെന്നും പ്രധാനമന്ത്രി കൂട്ടിചേർത്തു. നേരത്തെ ഇസ്രായേലിൽ ഹമാസ് നടത്തിയ ആക്രമണത്തിൽ പ്രധാനമന്ത്രി നരേന്ദ്ര മോദി ഇസ്രായേലിന് ഒപ്പമാണ് രാജ്യം എന്ന നിലപാടെടുത്തിരുന്നു. അതേസമയം, പലസ്തീനെക്കുറിച്ചുള്ള ഇന്ത്യന്‍ നിലപാടിൽ മാറ്റമില്ലെന്നും പരമാധികാര പലസ്തീൻ രാജ്യം രൂപീകരിക്കണം എന്നതാണ് ഇന്ത്യയുടെ നിലപാടെന്നും എന്നാൽ ഹമാസ് നടത്തിയത് ഭീകരാക്രമണം തന്നെയാണെന്നും വിദേശകാര്യ മന്ത്രാലയം ഇന്നലെ വാർത്തസമ്മേള്ളനത്തിൽ വ്യക്തമാക്കി.
“ജി 20 അധ്യക്ഷ പദവി വർഷം മുഴുവനും ഇന്ത്യയിൽ ആഘോഷങ്ങൾ ഉറപ്പാക്കി, ഇന്ത്യ ചന്ദ്രനിൽ ഇറങ്ങിയത് ഈ ആഘോഷങ്ങൾക്ക് മാറ്റ് കൂട്ടി” പ്രധാനമന്ത്രി കൂട്ടിച്ചേർത്തു. “ഇന്ത്യ ഇതുവരെ 17 പൊതു തിരഞ്ഞെടുപ്പുകളും 300-ലധികം സംസ്ഥാന നിയമസഭാ തിരഞ്ഞെടുപ്പുകളും നടത്തി.” തിരഞ്ഞെടുപ്പിനെക്കുറിച്ച് സംസാരിച്ച പ്രധാനമന്ത്രി നരേന്ദ്ര മോദി പറഞ്ഞു. “2019ലെ പൊതു തിരഞ്ഞെടുപ്പിൽ ആളുകൾ എന്റെ പാർട്ടിയെ തുടർച്ചയായി രണ്ടാം തവണയും വിജയിപ്പിച്ചു. ഇത് ലോകത്തിലെ ഏറ്റവും വലിയ തിരഞ്ഞെടുപ്പായിരുന്നു.” അദ്ദേഹം പറഞ്ഞു.
കഴിഞ്ഞ മാസം നടന്ന ന്യൂഡൽഹി ജി20 നേതാക്കളുടെ ഉച്ചകോടിയിൽ വച്ച് ആഫ്രിക്കൻ യൂണിയൻ ജി20 അംഗമായതിന് ശേഷം ആദ്യമായി പാൻ-ആഫ്രിക്കൻ പാർലമെന്റും പി20 ഉച്ചകോടിയിൽ പങ്കെടുത്തു. ഈ P20 ഉച്ചകോടിയിലെ സെഷനുകൾ നാല് വിഷയങ്ങളിലാണ് ശ്രദ്ധ കേന്ദ്രീകരിച്ചത്– പൊതു ഡിജിറ്റൽ പ്ലാറ്റ്‌ഫോമുകളിലൂടെ ജനങ്ങളുടെ ജീവിതത്തിൽ മാറ്റമുണ്ടാക്കൽ, സ്ത്രീകൾ നയിക്കുന്ന വികസനം, ത്വരിതപ്പെടുത്തുന്ന സുസ്ഥിര വികസന ലക്ഷ്യങ്ങൾ, സുസ്ഥിര ഊർജ്ജ സംക്രമണം എന്നിവയായിരുന്നു ഈ വിഷയങ്ങൾ.