രാജ്യത്തിന്റെ 77-ാം സ്വാതന്ത്ര്യദിന ആഘോഷങ്ങൾക്ക് തുടക്കമിട്ട് പ്രധാനമന്ത്രി നരേന്ദ്ര മോദി. ചരിത്രപ്രസിദ്ധമായ ചെങ്കോട്ടയില് പ്രധാനമന്ത്രി നരേന്ദ്ര മോദി ത്രിവർണ പതാക ഉയർത്തി. ഇത്തവണത്തേത് മോദിയുടെ തുടര്ച്ചയായ പത്താം സ്വാതന്ത്ര്യദിന പ്രസംഗമാണ്. ഗാർഡ് ഓണർ സ്വീകരിച്ച ശേഷമാണ് അദ്ദേഹം പതാക ഉയർത്തിയത്.
2047- ൽ ഇന്ത്യ ഒരു വികസിത രാജ്യമായി മാറുമെന്ന് പ്രധാനമന്ത്രി നരേന്ദ്ര മോദി പറഞ്ഞു. സ്വാതന്ത്ര്യ ദിനാഘോഷത്തിന്റെ ഭാഗമായി ചെങ്കോട്ടയിൽ നടത്തിയ പ്രസംഗത്തിലാണ് മോദിയുടെ പരാമർശം. സ്വാതന്ത്ര്യത്തിന്റെ 100 വർഷികം ആഘോഷിക്കുമ്പോൾ ഇന്ത്യ ഒരു വികസിത രാജ്യമായി മാറുമെന്നും അതിനായുള്ള പ്രയത്നത്തിലാണ് രാജ്യമെന്നും അദ്ദേഹം പറഞ്ഞു. എന്നാൽ അഴിമതി, രാജവംശം, പ്രീണനം എന്നിവയാണ് രാജ്യം നേരിടുന്ന മൂന്ന് വെല്ലുവിളികളെന്നും അവയ്ക്കെതിരെ പോരാടേണ്ടത് കാലഘട്ടത്തിന്റെ ആവശ്യമാണെന്നും അദ്ദേഹം കൂട്ടിച്ചേർത്തു.
2014ൽ അധികാരമേറ്റപ്പോൾ രാജ്യത്തിന്റെ സമ്പദ്വ്യവസ്ഥ പത്താം സ്ഥാനത്തായിരുന്നുവെന്നും തന്റെ സർക്കാർ അഴിമതി വിരുദ്ധ പോരാട്ടത്തിന് നേതൃത്വം നൽകിയതോടെ രാജ്യം ഇപ്പോൾ അഞ്ചാമത്തെ വലിയ സമ്പദ്വ്യവസ്ഥയായി മാറിയെന്നും അദ്ദേഹം പറഞ്ഞു.അഴിമതി, രാജവംശം, പ്രീണനം ഈ മൂന്ന് ഭീഷണികൾ രാജ്യത്തിന്റെ കഴിവുകളെ ബാധിച്ചുവെന്നും അഴിമതിയ്ക്കെതിരെ തന്റെ സർക്കാർ കർശനമായ നടപടി സ്വീകരിക്കുന്നുണ്ടെന്നും പ്രധാനമന്ത്രി പറഞ്ഞു.
സ്വാതന്ത്ര്യദിനാഘോഷ ചടങ്ങിന് സാക്ഷ്യം വഹിക്കാൻ കിസാൻ പദ്ധതിയുടെ ഗുണഭോക്താക്കൾ ഉൾപ്പെടെ 1,800 ഓളം പ്രത്യേക അതിഥികൾ പങ്കെടുത്തു. 20,000-ലധികം ഉദ്യോഗസ്ഥരും സാധാരണക്കാരും സ്വാതന്ത്ര്യ ദിനാഘോഷത്തിൽ പങ്കെടുക്കാൻ എത്തിയിരുന്നു. സ്വാതന്ത്ര്യ ദിനാഘോഷത്തോടനുബന്ധിച്ച് രാജ്യതലസ്ഥാനത്ത് സുരക്ഷ ശക്തമാക്കിയിരുന്നു. പ്രധാനമന്ത്രി നരേന്ദ്ര മോദി രാജ്യത്തെ അഭിസംബോധന ചെയ്യുന്ന ചെങ്കോട്ടയിലും പരിസര പ്രദേശങ്ങളിലും പതിനായിരത്തിലധികം ഉദ്യോഗസ്ഥരെ വിന്യസിച്ചിട്ടുണ്ട്. ഇതുകൂടാതെ, സുരക്ഷ ഉറപ്പാക്കുന്നതിനും വിവിഐപികളുടെ ചലനങ്ങള് നിരീക്ഷിക്കുന്നതിനുമായി ചെങ്കോട്ടയിലും പരിസരത്തും മറ്റ് തന്ത്രപ്രധാനമായ സ്ഥലങ്ങളിലും ഫേസ് റെക്കഗ്നിഷന്, വീഡിയോ അനലിറ്റിക് സംവിധാനങ്ങളുള്ള ആയിരത്തോളം ക്യാമറകള് എന്നിവയടക്കം കനത്ത സുരക്ഷാസംവിധാനങ്ങൾ സ്ഥാപിച്ചിരുന്നു.