കേന്ദ്രത്തിന്റെ ചാര് ധാം പദ്ധതിയുടെ ഭാഗമായ സില്ക്യാര തുരങ്കം നവംബര് 12 ന് ആണ് മണ്ണിടിച്ചിലിനെ തുടര്ന്ന് തകര്ന്നത്. ഇതോടെ 41 തൊഴിലാളികള് തുരങ്കത്തിനുള്ളില് കുടുങ്ങുകയായിരുന്നു. ചൊവ്വാഴ്ച വൈകീട്ട് ഏഴ് മണിയോടെ റാറ്റ് ഹോള് ഖനന വിദഗ്ധര് അവശിഷ്ടങ്ങളുടെ അവസാനഭാഗം തകര്ത്ത് തൊഴിലാളികളിലേക്ക് എത്തുകയായിരുന്നു. തുടര്ന്ന് ദേശീയ ദുരന്ത നിവാരണ സേനയുടെയും (എന്ഡിആര്എഫ്) അസമിലെ സംസ്ഥാന ദുരന്ത നിവാരണ സേനയുടെയും (എസ്ഡിആര്എഫ്) ഒരു സംഘം കുടുങ്ങിയ തൊഴിലാളികളെ വീല് സ്ട്രെച്ചറുകളിലൂടെ പുറത്തെത്തിച്ചു.
ഉത്തരകാശിയിലെ സില്ക്യാര തുരങ്കത്തില് കുടുങ്ങിയവരെ പുറത്തെത്തിക്കുന്ന മുഴുവന് നടപടികളും ടെലിവിഷനിലൂടെ തത്സമയം പ്രധാനമന്ത്രി നരേന്ദ്ര മോദി വീക്ഷിച്ചു. പ്രധാനമന്ത്രിയോടൊപ്പം മുഴുവന് മന്ത്രിസഭയും രക്ഷാപ്രവര്ത്തനത്തിന് സാക്ഷ്യം വഹിച്ചു. രാത്രി എട്ട് മണിയോടെ തൊഴിലാളികളെ പുറത്തെത്തിച്ചപ്പോള് പ്രധാനമന്ത്രി വളരെ വികാരാധീനനായിരുന്നുവെന്ന് കേന്ദ്രമന്ത്രി അനുരാഗ് താക്കൂര് പറഞ്ഞു. 17 ദിവസമായി തുരങ്കത്തില് കുടുങ്ങിക്കിടന്ന 41 തൊഴിലാളികളെയും ഇന്നലെ രാത്രിയാണ് രക്ഷപ്പെടുത്തിയത്. വെല്ലുവിളി നിറഞ്ഞ സമയത്ത് തൊഴിലാളികളുടെ കുടുംബങ്ങളെല്ലാം കാണിച്ച ക്ഷമയും ധൈര്യവും എത്ര അഭിനന്ദിച്ചാലും മതിയാകില്ലെന്ന് മോദി പറഞ്ഞു.
ബ്രഹ്മഖൽ-യമുനോത്രി ദേശീയ പാതയിൽ സിൽക്യാരയ്ക്കും ദണ്ഡൽഗാവിനും ഇടയിൽ നിർമ്മാണം നടക്കുന്ന തുരങ്കത്തിന്റെ ഒരു ഭാഗമാണ് തകർന്നത്. 4.5 കിലോമീറ്റർ നീളമുള്ള തുരങ്കം, സിൽക്യാരയുടെ അറ്റത്ത് നിന്ന് 2,340 മീറ്ററും ദണ്ഡൽഗാവിന്റെ ഭാഗത്ത് നിന്ന് 1,750 മീറ്ററുമാണ് നിർമ്മിച്ചിരിക്കുന്നത്.
ആദ്യത്തെ തൊഴിലാളിയെ പുറത്തെത്തിച്ച് ഒരു മണിക്കൂറിനുള്ളിലാണ് രക്ഷാദൗത്യം പൂര്ത്തിയാക്കിയത്. രക്ഷപ്പെടുത്തിയ ശേഷം തൊഴിലാളികള്ക്ക് പ്രാഥമിക ചികിത്സ തുരങ്കത്തിനുള്ളില് തന്നെ നല്കിയിരുന്നു. പിന്നീട് ഇവരെ ചിന്യാലിസൂര് ആശുപത്രിയില് പ്രവേശിപ്പിച്ചു. ഇവിടെ കിടക്കകളും മറ്റും പ്രത്യേകമായി ഒരുക്കിയിരുന്നു. ഉത്തരാഖണ്ഡ് മുഖ്യമന്ത്രി പുഷ്കര് ധാമി ആശുപത്രിയിലെത്തി തൊഴിലാളികളെ കണ്ടു. തൊഴിലാളികള് ആരോഗ്യത്തോടെയിരിക്കുന്നുവെന്ന് അദ്ദേഹം കൂടിക്കാഴ്ചയ്ക്ക് ശേഷം സ്ഥിരീകരിച്ചു. തുടര്ന്ന് ഋഷികേശിലെ എയിംസിലേക്ക് കൊണ്ടുപോയ ഇവരെ കൂടുതല് വൈദ്യപരിശോധനയ്ക്ക് വിധേയരാക്കി.
സില്ക്യാര തുരങ്കം തകര്ന്നതോടെ 60 മീറ്റര് നീളത്തില് അവശിഷ്ടങ്ങള് മൂടിയതാണ് തൊഴിലാളികള്ക്ക് തിരിച്ചടിയായത്. 41 പേര് തുര രക്ഷാപ്രവര്ത്തകരും വിദഗ്ധരും സര്ക്കാര് ഉദ്യോഗസ്ഥരും സ്ഥലത്തേക്ക് കുതിച്ചെത്തി. വിദേശത്ത് നിന്നടക്കം വിദഗ്ധരെത്തിയാണ് രക്ഷാപ്രവര്ത്തനത്തിന് നേതൃത്വം നല്കിയത്. അവസാന ഘട്ടത്തിൽ തൊഴിലാളികളെ പുറത്തെത്തിക്കാൻ ദേശീയ ദുരന്തനിവാരണ സേനയുടെ മൂന്ന് ടീമുകൾ തുരങ്കത്തിനുള്ളിലേക്ക് പോയിരുന്നു. ചെറിയ ഇരുമ്പ് സ്ട്രെച്ചര് അകത്തേക്ക് അയച്ച് തൊഴിലാളികളെ അതില് ഇരുത്തി ഓരോരുത്തരെയായി പുറത്തെത്തിച്ചു. തുരങ്കത്തിനുള്ളില് 800 എംഎം വ്യാസമുള്ള പൈപ്പ് ഘടിപ്പിച്ചിട്ടുണ്ട്. പൈപ്പുകളിലൂടെയാണ് എന്ഡിആര്എഫ് സംഘം തൊഴിലാളികളിലേക്ക് എത്തിയത്. പിന്നീട് പൈപ്പ് വഴി തൊഴിലാളികളെ പുറത്തെത്തിച്ചു.