പ്രധാനമന്ത്രി ഗരീബ് കല്യാൺ അന്ന യോജന 2024 ജനുവരി ഒന്നു മുതൽ അഞ്ചു വർഷത്തേക്ക് ദീർഘിപ്പിക്കുമെന്ന് കേന്ദ്ര സർക്കാർ പ്രഖ്യാപിച്ചു.പദ്ധതിക്കായി അടുത്ത അഞ്ചുവർഷത്തിനുള്ളിൽ കേന്ദ്രസർക്കാർ 11.80 ലക്ഷം കോടി രൂപ ചെലവഴിക്കുമെന്നും കേന്ദ്രമന്ത്രി അനുരാഗ് താക്കൂർ അറിയിച്ചു. കേന്ദ്രമന്ത്രിസഭ യോഗത്തിനു ശേഷം നടന്ന ബ്രീഫിങ്ങിൽ സംസാരിക്കുകയായിരുന്നു അദ്ദേഹം. ഈ പദ്ധതി പ്രകാരം തെരഞ്ഞെടുക്കപ്പെട്ട കുടുംബങ്ങളിലെ പാവപ്പെട്ടവർക്ക് പ്രതിമാസം അഞ്ചു കിലോ സൗജന്യ ഭക്ഷ്യധാന്യം ലഭിക്കും. അന്ത്യോദയ കുടുംബങ്ങൾക്ക് പ്രതിമാസം 35 കിലോ ഭക്ഷ്യധാന്യമാണ് സൗജന്യമായി ലഭിക്കുക.
ഏതാണ്ട് 81 കോടി ആളുകൾക്ക് പ്രയോജനം ചെയ്യുന്ന പദ്ധതിയാണിത്. കോവിഡ് കാലത്താണ് ആദ്യമായി പദ്ധതി തുടങ്ങിയത്. ദേശീയ ഭക്ഷ്യ സുരക്ഷാ നിയമത്തിന് കീഴിൽ സബ്‌സിഡിയുള്ള അഞ്ച് കിലോ ഭക്ഷ്യധാന്യത്തിന് പുറമേ ഒരു ഗുണഭോക്താവിന് പ്രതിമാസം അഞ്ചു കിലോ സൗജന്യ ഭക്ഷ്യധാന്യവും നൽകി. 2022 ഡിസംബറിൽ പ്രധാനമന്ത്രി ഗരീബ് കല്യാൺ ആൻ യോജന നിർത്തി.
2024-25 സാമ്പത്തിക വർഷം മുതൽ രണ്ട് വർഷത്തേക്ക് 1,261 കോടി രൂപ വിനിയോഗിച്ച് 15,000 വനിതാ സ്വയം സഹായ സംഘങ്ങൾക്ക് (എസ്.എച്ച്.ജി) ഡ്രോണുകൾ നൽകുന്നതിനുള്ള കേന്ദ്ര പദ്ധതിക്കും കേന്ദ്ര മന്ത്രിസഭ അംഗീകാരം നൽകി. കാർഷിക ആവശ്യങ്ങൾക്കായി കർഷകർക്ക് വാടക സേവനങ്ങൾ നൽകുന്നതിനായി 2024-25 മുതൽ 2025-2026 വരെയുള്ള കാലയളവിൽ തിരഞ്ഞെടുത്ത 15,000 വനിതാ സ്വയം സഹായ സംഘങ്ങൾക്ക് ഡ്രോണുകൾ നൽകാനാണ് പദ്ധതി ലക്ഷ്യമിടുന്നതെന്ന് താക്കൂർ പറഞ്ഞു.