മണിപ്പൂരില്‍ സംഘര്‍ഷം തുടരുകയാണ്. കലാപം അടിച്ചമർത്താനുള്ള ശ്രമങ്ങൾക്കിടയിലും മണിപ്പൂരിൽ കഴിഞ്ഞ ദിവസം വെടിവെപ്പ് നടന്നു. ബിഷ്ണുപൂര്‍ ജില്ലയില്‍ അക്രമികള്‍ ഒന്നിലധികം തവണ വെടിവെയ്പ്പ് നടത്തിയതായി മണിപ്പൂര്‍ പോലീസ് അറിയിച്ചു. ‘മുവല്‍ഗട്ട്, തെരാഖോങ്സാംഗ്ബി , ഗോഥോള്‍, ഫോല്‍ജാംഗ്, ക്വാക്ത വാര്‍ഡ് നമ്പര്‍ 8 എന്നീ പ്രദേശങ്ങളില്‍ അക്രമികള്‍ തമ്മില്‍ വെടിവെയ്പ്പ് നടന്നു. സുരക്ഷാ സേന അക്രമികളെ തിരിച്ചടിക്കുകയും വെടിവെയ്പ്പ് നിര്‍ത്തിക്കുകയും ചെയ്തു.
സമീപ പ്രദേശങ്ങളില്‍ നടത്തിയ തിരച്ചിലില്‍ സുരക്ഷാസേന 9 ആയുധങ്ങള്‍ കണ്ടെടുത്തു’ മണിപ്പൂര്‍ പോലീസ് ട്വിറ്ററിലൂടെ അറിയിച്ചു. വിവിധയിടങ്ങളിൽ നടന്ന പരിശോധനയിൽ ഒമ്പത് ആയുധങ്ങൾ പിടികൂടി. അതിനിടെ, അസമിലും വൻതോതിൽ സ്ഫോടക വസ്തുക്കൾ പിടികൂടിയതായാണ് റിപ്പോർട്ട്. മണിപ്പൂരിലേക്ക് കൊണ്ടുപോകാൻ എത്തിച്ച സ്ഫോടക വസ്തുക്കളാണ് പിടിച്ചെടുത്തതെന്ന് പൊലീസ് പറ‍ഞ്ഞു. മണിപ്പൂരിലെ കുന്നിന്‍ പ്രദേശങ്ങളിലെയും താഴ്‌വരകളിലെയും വിവിധ ജില്ലകളിലായി മൊത്തം 122 ചെക്ക്പോസ്റ്റുകള്‍ സ്ഥാപിച്ചിട്ടുണ്ട്. സംസ്ഥാനത്ത് നടത്തിയ നിയമലംഘനങ്ങളുമായി ബന്ധപ്പെട്ട് 843 പേരെ പോലീസ് ഇതുവരെ കസ്റ്റഡിയിലെടുക്കുകയും ചെയ്തിട്ടുണ്ട്.
അതേസമയം, പ്രധാനമന്ത്രിക്ക് നിവേദനം അയച്ച് മെയ് തെ സംഘടന രംഗത്തെത്തി. മണിപ്പൂരിനെ വിഭജിക്കരുത്, പ്രത്യേക ഭരണകൂടമെന്ന ആവശ്യം അംഗീകരിക്കരുത്, മണിപ്പൂരിൽ എൻ ആർ സി നടപ്പാക്കണം തുടങ്ങിയവയാണ് നിവേദനത്തിലെ ആവശ്യങ്ങൾ. കൂടാതെ എത്രയും വേഗം സംസ്ഥാന നിയമസഭ സമ്മേളനം വിളിക്കാൻ ഇടപെടണമെന്നും ആവശ്യപ്പെടുന്നുണ്ട്.