ഖത്തറില് വധശിക്ഷയ്ക്ക് വിധിക്കപ്പെട്ട എട്ട് മുന് നാവിക ഉദ്യോഗസ്ഥരുടെ കുടുംബാംഗങ്ങളുമായി വിദേശകാര്യ മന്ത്രി എസ് ജയശങ്കര് കൂടിക്കാഴ്ച നടത്തി. ഇന്ത്യക്കാരുടെ മോചനത്തിന് ശ്രമം തുടരുമെന്ന് അദ്ദേഹം അറിയിച്ചു. കുടുംബങ്ങളുടെ ആശങ്കകളും വേദനകളും ഞങ്ങള് മനസ്സിലാക്കുന്നു.അവരുടെ മോചനം ഉറപ്പാക്കാനുള്ള എല്ലാ ശ്രമങ്ങളും സര്ക്കാര് തുടരുമെന്ന് അവര്ക്ക് ഉറപ്പ് നല്കിയിട്ടുണ്ടെന്നും അദ്ദേഹം വ്യക്തമാക്കി. വിദേശകാര്യ മന്ത്രി തന്നെയാണ് ഇക്കാര്യം സോഷ്യല് മീഡിയയിലൂടെ അറിയിച്ചത്.
ചാരവൃത്തി നടത്തിയെന്ന കുറ്റം ചുമത്തിയാണ് ഖത്തര് കോടതി ഇന്ത്യന് നാവികസേനയിലെ 8 മുന് ഉദ്യോഗസ്ഥർക്ക് വധശിക്ഷ വിധിച്ചത്. ഇവർ 2022 ഓഗസ്റ്റ് മുതല് ഖത്തറിലെ ജയിലിലാണ്. രാഷ്ട്രപതിയുടെ അവാര്ഡ് ലഭിച്ച കമാന്ഡര് പൂര്ണന്ദു തിവാരി ഉള്പ്പെടെയാണ് മോചനം കാത്ത് ജയിലില് കഴിയുന്നത്. 2019-ല് അന്നത്തെ രാഷ്ട്രപതി രാംനാഥ് കോവിന്ദ് അദ്ദേഹത്തെ പ്രവാസി ഭാരതീയ അവാര്ഡ് നല്കി ആദരിച്ചിരുന്നു.
നേരത്തെ കോടതി വിധി ഞെട്ടിക്കുന്നതാണെന്നും സാധ്യമായ എല്ലാ നിയമ നടപടികളും തേടുകയാണെന്നും വിദേശകാര്യ മന്ത്രാലയം പ്രാരംഭത്തിൽ പ്രതികരിച്ചിരുന്നു. ‘വധശിക്ഷ വിധി അഗാധമായ ഞെട്ടലുണ്ടാക്കി. വിശദമായ വിധിക്കായി കാത്തിരിക്കുകയാണ്. ഞങ്ങള് കുടുംബാംഗങ്ങളുമായും നിയമ സംഘവുമായും ബന്ധപ്പെടുന്നുണ്ട്. എല്ലാ നിയമ സാധ്യതകളും തേടുകയാണ് ചെയ്യുകയാണ്,’ വിദേശകാര്യ മന്ത്രാലയം (MEA) പുറത്തിറക്കിയ ഔദ്യോഗിക പ്രസ്താവനയില് പറഞ്ഞു.
വധശിക്ഷയ്ക്ക് വിധിക്കപ്പെട്ട എട്ട് പേരും ഖത്തറിലെ സ്വകാര്യ കമ്പനിയില് ജോലി ചെയ്യുന്നവരായിരുന്നു.
2022 ഓഗസ്റ്റ് 30ന് ഇസ്രായേലിന്റെ ചാരന്മാരായി പ്രവര്ത്തിച്ചുവെന്ന് ആരോപിച്ചാണ് ഖത്തർ രഹസ്യാന്വേഷണ ഏജന്സി അറസ്റ്റ് ചെയ്തത്. മുന് ഇന്ത്യന് നാവികസേനാ ഉദ്യോഗസ്ഥരായ ക്യാപ്റ്റന് നവതേജ് സിംഗ് ഗില്, ക്യാപ്റ്റന് ബീരേന്ദ്ര കുമാര് വര്മ്മ, ക്യാപ്റ്റന് സൗരഭ് വസിഷ്ത്, കമാന്ഡര് അമിത് നാഗ്പാല്, കമാന്ഡര് പൂര്ണേന്ദു തിവാരി, കമാന്ഡര് സുഗുണാകര് പകല, കമാന്ഡര് സഞ്ജീവ് ഗുപ്ത, നാവികന് രാഗേഷ് എന്നിവരാണ് പിടിയിലായത്. ഖത്തര് എമിരി നേവിക്ക് പരിശീലനവും മറ്റ് സേവനങ്ങളും നല്കുന്നതാണ് ദഹ്റ ഗ്ലോബല് ടെക്നോളജി ആന്ഡ് കണ്സള്ട്ടന്സി സര്വീസസ് എന്ന ഈ കമ്പനി. ഖത്തര് പ്രതിരോധ വകുപ്പ്, സുരക്ഷ, മറ്റ് സര്ക്കാര് ഏജന്സികള് എന്നിവയുടെ പ്രാദേശിക പങ്കാളിയെന്നാണ് കമ്പനി സ്വയം വിശേഷിപ്പിക്കുന്നത്.റോയല് ഒമാന് എയര്ഫോഴ്സ് റിട്ടയേര്ഡ് സ്ക്വാഡ്രണ് ലീഡര് ഖമീസ് അല് അജാമിയാണ് ഈ കമ്പനിയുടെ സിഇഒ.