ഡൽഹി മദ്യനയ കേസിൽ ബിആർഎസ് നേതാവ് കെ കവിതയ്ക്കും മറ്റ് നാല് പേർക്കുമെതിരെ എൻഫോഴ്സ്മെൻ്റ് ഡയറക്ടറേറ്റ് (ഇഡി) വെള്ളിയാഴ്ച പുതിയ കുറ്റപത്രം സമർപ്പിച്ചതായി റിപോർട്ടുകൾ. കേസിൽ ഇഡി സമർപ്പിക്കുന്ന ഏഴാമത്തെ കുറ്റപത്രമാണിത്. കവിതയെ കൂടാതെ എഎപിയുടെ ഗോവ തിരഞ്ഞെടുപ്പിലെ ഫണ്ട് മാനേജർ ചൻപ്രീത് സിംഗ്, ദാമോദർ ശർമ്മ, പ്രിൻസ് കുമാർ, അരവിന്ദ് സിംഗ് എന്നിവരെ കുറ്റപത്രത്തിൽ ഉൾപ്പെടുത്തിയിട്ടുണ്ട്.
തെലങ്കാന മുൻ മുഖ്യമന്ത്രി കെ ചന്ദ്രശേഖർ റാവുവിൻ്റെ മകൾ കവിതയെ ഹൈദരാബാദിൽ നിന്ന് മാർച്ച് 15 നാണ് ഇഡി അറസ്റ്റ് ചെയ്തിരുന്നത്. ഡൽഹി മുഖ്യമന്ത്രി അരവിന്ദ് കേജ്രിവാളടക്കം 18 പേരാണ് കേസിൽ ഇതുവരെ അറസ്റ്റിലായത്. ഇന്നലെയാണ് സുപ്രീം കോടതി കേജ്രിവാളിന് ജൂൺ 1 വരെ ഇടക്കാല ജാമ്യം അനുവദിച്ചത്. കള്ളപ്പണം വെളുപ്പിക്കൽ തടയൽ നിയമത്തിൻ്റെ (പിഎംഎൽഎ) സെക്ഷൻ 45, 44(1) പ്രകാരം നിയുക്ത കോടതിയിൽ പരാതി നൽകിയിട്ടുണ്ടെന്ന് വാർത്താ ഏജൻസിയായ പിടിഐ റിപ്പോർട്ട് ചെയ്യുന്നു.
ദേശീയ തലസ്ഥാനത്തെ മദ്യവിൽപ്പന ലൈസൻസുകളുടെ വലിയൊരു വിഹിതത്തിന് പകരമായി ഡൽഹി ഭരിക്കുന്ന എഎപി സർക്കാരിന് 100 കോടി രൂപ അഴിമതിപ്പണം നൽകിയതായി ആരോപിക്കപ്പെടുന്ന “സൗത്ത് ഗ്രൂപ്പിലെ” പ്രധാന അംഗമാണ് കവിതയെന്ന് ഇഡി ആരോപിച്ചു. ഇഡിയും സെൻട്രൽ ബ്യൂറോ ഓഫ് ഇൻവെസ്റ്റിഗേഷനും ചേർന്നാണ് കേസ് അന്വേഷിക്കുന്നത്.