അസമിൽ കഴിഞ്ഞ ദിവസം ഉണ്ടായ വെള്ളപ്പൊക്കം രൂക്ഷമായി തുടരുകയാണ്. ഇതുവരെ ഒൻപത് ജില്ലകളിലായി 34,000-ത്തിലധികം ആളുകളെ വെള്ളപ്പൊക്കം ബാധിച്ചിട്ടുണ്ട്. അസം സ്റ്റേറ്റ് ഡിസാസ്റ്റർ മാനേജ്‌മെന്റ് അതോറിറ്റിയുടെ റിപ്പോർട്ട് അനുസരിച്ച്, ബക്‌സ, ബാർപേട്ട, ദരാംഗ്, ധേമാജി, ധുബ്രി, കൊക്രജാർ, ലഖിംപൂർ, നൽബാരി, സോനിത്പൂർ, ഉദൽഗുരി ജില്ലകളിലായി 1,19,800-ലധികം ആളുകൾ വെള്ളപ്പൊക്കത്തിൽ ദുരിതമനുഭവിക്കുന്നുണ്ട്. ബക്‌സ, നാൽബാരി, ബാർപേട്ട, സോനിത്പൂർ, ബോംഗൈഗാവ്, ദരാംഗ്, ചിരാംഗ്, ധുബ്രി, ഗോൾപാറ, കാംരൂപ്, കോക്രജാർ, ലഖിംപൂർ, എന്നിവിടങ്ങളിലെ വെള്ളപ്പൊക്കത്തിൽ റോഡുകളും പാലങ്ങളും മറ്റ് അടിസ്ഥാന സൗകര്യങ്ങളും തകർന്നിട്ടുണ്ട്.
45,000 ത്തോളം ആളുകൾ ദുരിതമനുഭവിക്കുന്ന സംസ്ഥാനത്തെ ഏറ്റവും കൂടുതൽ നാശനഷ്ടം സംഭവിച്ച ജില്ല നൽബാരിയാണ് തൊട്ടുപിന്നാലെ 26,500-ലധികം ആളുകളുള്ള ബക്‌സയും 25,000-ലധികം ആളുകളുള്ള ലഖിംപൂരും റിപ്പോർട്ട് പറയുന്നു. അഞ്ച് ജില്ലകളിലായി 14 ദുരിതാശ്വാസ ക്യാമ്പുകൾ ഭരണകൂടം തുറന്നിട്ടുണ്ട് 2,091 പേരാണ് ക്യാമ്പിലുള്ളത്. അഞ്ച് ജില്ലകളിലായി 17 ദുരിതാശ്വാസ വിതരണ കേന്ദ്രങ്ങളും ഉണ്ട്. സൈന്യം, അർദ്ധസൈനിക സേനകൾ, എൻഡിആർഎഫ് എല്ലാം സംയുക്തമായി വിവിധ സ്ഥലങ്ങളിൽ നിന്ന് 1,280 പേരെ രക്ഷപ്പെടുത്തി. മൊത്തം 780 ഗ്രാമങ്ങൾ വെള്ളത്തിനടിയിലാണെന്നും അസമിലുടനീളം 10,591.85 ഹെക്ടർ വിളകൾ നശിച്ചിട്ടുണ്ടെന്നും എഎസ്ഡിഎംഎ റിപ്പോർട്ട് ചൂണ്ടികാണിക്കുന്നു.
രാജ്യത്തെ ഏറ്റവും കൂടുതൽ വെള്ളപ്പൊക്ക സാധ്യതയുള്ള സംസ്ഥാനങ്ങളിലൊന്നാണ് അസം. മിക്കവാറും എല്ലാ വർഷവും വെള്ളപ്പൊക്കം അസമിലെ പ്രദേശങ്ങളിൽ നാശനഷ്ടം വിതയ്ക്കാറുണ്ട്.