ഇടുക്കിയില്‍ നാശനഷ്ടം വിതച്ചും ഭീതി ജനിപ്പിച്ചതും വിലസുന്ന അരിക്കൊമ്പനെ പിടിക്കാനുള്ള ആദ്യ ദൗത്യ സംഘം എത്തി. 26 അംഗം വനപാലക സംഘമാണ് ഇന്ന് മുത്തങ്ങയില്‍ നിന്നും എത്തിയത്. വിക്രമന്‍ എന്ന കുങ്കിയാനയെയും ആദ്യം എത്തിച്ചു. നാല് കുങ്കിയാനകളാണ് ദൗത്യത്തിനു ഉപയോഗിക്കുന്നത്. ബത്തേരിയില്‍ ഇറങ്ങിയ പിഎം 2 എന്ന കൊമ്പനെയും പിടി 7നേയും പിടികൂടിയതിനു ശേഷമാണ് അരിക്കൊമ്പന്‍ എന്ന കാട്ടാനയെ പിടികൂടാൻ സംഘം തയ്യാറെടുക്കുന്നത്. അരിക്കൊമ്പനെ പിടികൂടാന്‍ നാല് കുങ്കിയാനകളെയാണ് ഉപയോഗിക്കുന്നത്.
ഇടുക്കിയില്‍ എവിടെയാണ് അരിക്കൊമ്പന്‍ എന്ന് തിരിച്ചറിയാന്‍ വനംവകുപ്പിന് കഴിഞ്ഞിട്ടില്ല. അരിക്കൊമ്പനെ പിടികൂടുന്നതിനുള്ള ഒരുക്കങ്ങള്‍ പൂര്‍ത്തിയായിട്ടുണ്ട്. കൂട് നിര്‍മ്മാണം പൂര്‍ത്തിയാക്കിയിട്ടുണ്ട്. മറ്റ് നടപടികള്‍ ഡോ. അരുണ്‍ സക്കറിയയുടെ നേതൃത്വത്തിലുള്ള ദൗത്യ സംഘം എത്തിയതിന് ശേഷം യോഗം ചേര്‍ന്ന് വിലയിരുത്തും. പിന്നീടാകും ദൗത്യത്തിലേയ്ക്ക് കടക്കുക. അരുണ്‍ സക്കറിയ നയിക്കുന്ന സംഘത്തില്‍ 26 ഉദ്യോഗസ്ഥരുണ്ടാകും.
അതെ സമയം ഇടുക്കിയില്‍ അരിക്കൊമ്പന്റെ ആക്രമണങ്ങള്‍ തുടരുകയാണ്. കഴിഞ്ഞ ദിവസം കൊച്ചി ധനുഷ്‌കോടി ദേശീയ പാതയിലൂടെ തമിഴ്‌നാട്ടില്‍ നിന്നും മൂന്നാറിലേക്ക് പലച്ചരക്ക് സാധനങ്ങളുമായി എത്തിയ ലോറി വെളുപ്പിന് അഞ്ചു മണിയോടെ ആന തകര്‍ത്തു. അക്രമസക്തനായ ‘അരിക്കൊമ്പനെ’ കണ്ടതോടെ ലോറിയില്‍ ഉണ്ടായിരുന്നവര്‍ ഓടി രക്ഷപ്പെടുകയായിരുന്നു. വാഹനത്തില്‍ ഉണ്ടായിരുന്ന അരിയും പഞ്ചസാരയും ആന ഭക്ഷിച്ചു