കൊല്ലം: പോപ്പുലർ ഫ്രണ്ട് കേസുമായി ബന്ധപ്പെട്ട് കസ്റ്റഡിയിൽ എടുത്ത കൊല്ലം ചവറ സ്വദേശി മുഹമ്മദ് സാദ്ദിഖ് പിഎഫ്ഐ റിപ്പോർട്ടറായി പ്രവർത്തിച്ച് വരികയായിരുന്നു എന്ന് എൻ ഐ എ വെളിപ്പെടുത്തി. ഹിറ്റ് സ്കോഡ് ആക്രമണം നടത്തുന്നതിന് വേണ്ടി ഇതരസമുദായക്കാരുടെ പേര് ശേഖരിക്കുന്നത് സാദ്ദിഖാണെന്നും എൻ ഐ എ പറഞ്ഞു. ആക്രമിക്കേണ്ട വ്യക്തിയുടെ വിവരങ്ങളാണ് ശേഖരിക്കുന്നത്. ഇത് സംബന്ധിച്ച് തെളിവുകളും രേഖകളും സാദ്ദിഖിന്റെ വീട്ടിൽ നിന്നും കണ്ടെടുത്തിരുന്നതായി എൻ ഐ എ പറഞ്ഞു.
കഴിഞ്ഞ ദിവസം പുലർച്ചയോട് കൂടിയാണ് കൊല്ലം ചവറയിലുള്ള മുഹമ്മദ് സാദ്ദിഖിന്റെ വീട്ടിൽ എൻഐഎ പരിശോധന നടത്തിയത്. പോപ്പുലർ ഫ്രണ്ടിന്റെ പ്രവർത്തനവുമായി ബന്ധപ്പെട്ട് യാത്രകൾ നടത്തിയത് അടക്കമുള്ള രേഖകൾ പിടിച്ചെടുത്തിരുന്നു. കസ്റ്റഡിയിലായിരുന്ന മുഹമ്മദ് സാദ്ദിഖിന്റെ അറസ്റ്റ് രേഖപ്പെടുത്തിയതായും എൻ ഐ എ അറിയിച്ചു.