മാനന്തവാടി എംഎൽഎ ഒ ആർ കേളു ഇന്ന് പട്ടിക ജാതി പട്ടിക വർഗ ക്ഷേമ വകുപ്പ് മന്ത്രിയായി ചുമതലയേൽക്കും. ഇതോടെ വയനാട്ടിൽ നിന്നുള്ള സിപിഎമ്മിൻ്റെ ആദ്യ മന്ത്രിയാകും അദ്ദേഹം. ലോക്സഭയിലേക്കു തിരഞ്ഞെടുക്കപ്പെട്ട കെ രാധാകൃഷ്ണൻ രാജിവെച്ചതിന് പിന്നാലെയാണ് ഒ ആർ കേളുവിനെ മന്ത്രിയാക്കാൻ സി പി എം സംസ്ഥാന സമിതി തീരുമാനിച്ചത്. സംസ്ഥാന സെക്രട്ടറി എം വി ഗോവിന്ദനാണ് കേളുവിനെ മന്ത്രിയാക്കാനുള്ള നിർദേശം യോഗത്തിൽ അറിയിച്ചത്. എല്ലാവരും ഇത് അംഗീകരിക്കുകയായിരുന്നു.
രാജ്ഭവനിൽ നടക്കുന്ന സത്യപ്രതിജ്ഞ ചടങ്ങിൽ 500 പേരാണ് ആകെ പങ്കെടുക്കുന്നത്. പികെ ജയലക്ഷ്മിക്കു ശേഷം ആദിവാസി വിഭാഗത്തിൽനിന്നു സംസ്ഥാന മന്ത്രിസഭയിലേക്കെത്തുന്ന ജനപ്രതിനിധി കൂടിയാണ് കേളു.
രാധാകൃഷ്ണനു ചുമതലയുണ്ടായിരുന്ന എല്ലാ വകുപ്പുകളും കേളുവിനു ലഭിക്കില്ല. പട്ടികജാതി-പട്ടികവർഗ വികസനം മാത്രമാകും അദ്ദേഹത്തിന്റെ ചുമതല. ദേവസ്വംവകുപ്പ് മന്ത്രി വി.എൻ.വാസവനും പാർലമെന്ററികാര്യം മന്ത്രി എം.ബി.രാജേഷിനും നൽകും. ഇക്കാര്യവും സംസ്ഥാനസമിതി യോഗത്തിൽ റിപ്പോർട്ട് ചെയ്തു.