തിരുവനന്തപുരം വിതുരയിൽ കരടിയുടെ ആക്രമണത്തിൽ ഒരാൾക്ക് ഗുരുതര പരിക്ക്. വിതുര കല്ലംകുടി സ്വദേശി ശിവദാസനെയാണ് കരടി ആക്രമിച്ചത്. ഗുരുതരമായി പരിക്കേറ്റ ശിവദാസനെ തിരുവനന്തപുരം മെഡിക്കൽ കോളേജിൽ പ്രവേശിപ്പിച്ചിരിക്കുകയാണ്. നിലവിളി കേട്ട് ഓടിക്കൂടിയ നാട്ടുകാരാണ് ശിവദാസനെ കരടിയിൽ നിന്നും രക്ഷിച്ചത്.
രാവിലെ ജോലിക്ക് പോകുന്നതിനിടെയാണ് ശിവദാസിനെ കരടി ആക്രമിച്ചത്. ശിവദാസിന് നേരെ കരടി പാഞ്ഞടുക്കുകയായിരുന്നു. കരടിയിൽ നിന്ന് രക്ഷപ്പെടാൻ ഇയാൾ സമീപത്തെ മരത്തിൽ കയറിയെങ്കിലും, കരടിയും കൂടെ കയറി. ശിവദാസനെ മരത്തിൽ നിന്ന് താഴേക്ക് തള്ളിയതിന് ശേഷവും കരടി ആക്രമണം തുടരുകയായിരുന്നു. കാലിന് ഗുരുതരമായി പരിക്കേറ്റ ശിവദാസിനെ ആദ്യം വിതുര താലൂക്ക് ആശുപത്രിയിൽ എത്തിച്ചെങ്കിലും പിന്നീട് തിരുവനന്തപുരം മെഡിക്കൽ കോളജിലേക്ക് മാറ്റി.