പാലക്കാട് പല്ലശ്ശനയിൽ പ്രാദേശികആചാരം എന്ന രീതിയിൽ വധൂവരൻമാരുടെ തലമുട്ടിച്ച സംഭവത്തിൽ ബന്ധുകൂടിയായ സുഭാഷ് അറസ്റ്റിൽ ആയി. വധൂവരൻമാരുടെ മൊഴി രേഖപ്പെടുത്തിയ ശേഷമാണ് സുഭാഷിനെ അറസ്റ്റ് ചെയ്തത്. ദേഹോപദ്രവമേൽപ്പിച്ചതിനും സ്ത്രീത്വത്തെ അപമാനിച്ചതിനുമാണ് ഇയാൾക്കെതിരെ പൊലീസ് കേസെടുത്തത്. വനിതാകമ്മീഷൻ ഇടപെടലിലാണ് പൊലീസ് കേസെടുത്തത്.
കഴിഞ്ഞ തിങ്കളാഴ്ചയായിരുന്നു പല്ലശ്ശന സ്വദേശി സച്ചിനും മുക്കം സ്വദേശി സജിലയും വിവാഹിതരായത്. വിവാഹ ദിനം ഗൃഹപ്രവേശന ചടങ്ങിനിടെയാണ് ബന്ധുവിന്‍റെ വക ആചാരമെന്ന പേരിൽ ആണ് ഇരുവരുടെയും തല പരസ്പരം കൂട്ടിമുട്ടിച്ചത്. തലയ്ക്ക് വേദനയിൽ കരഞ്ഞുകൊണ്ട് വീട്ടിലേക്ക് കയറുന്ന വധു സജിലയുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചിരുന്നു. സംഭവം വിവാദമായതോടെയാണ് വനിതാ കമ്മീഷൻ ഇടപെട്ടത്.