സംസ്ഥാന സ്കൂൾ കലോത്സവം തിരുവനന്തപുരത്ത് മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. വയനാട് ഉരുൾപൊട്ടല്‍ ദുരന്തം തകർത്തെറിഞ്ഞ വെള്ളാർമല സ്കൂളിലെ കുട്ടികൾ അവതരിപ്പിച്ച സംഘനൃത്തമായിരുന്നു ഉദ്ഘാടന വേദിയിലെ പ്രധാന ആകർഷണം. സ്കൂൾ ബാഗുമായാണ് കുട്ടികൾ വേദിയിലേക്ക് വന്നത്. പിന്നീട് നൃത്തരൂപത്തിൽ അവതരിപ്പിച്ച ഉരുൾ പൊട്ടലിന്റെ നടുക്കവും മലവെള്ളപ്പാച്ചിലിന്റെ ഭീകരതയും കാണികളുടെ ഉള്ളുലയ്ക്കുന്ന കാഴ്ചകളായി. ‘വെള്ളാർമല സ്കൂൾ തിരികെ വരും, ഞങ്ങൾ ഉയർത്തെഴുന്നേല്‍ക്കും’ എന്ന പ്രതീക്ഷ പങ്കുവച്ചാണ് നൃത്തം അവസാനിച്ചത്.
തുടർന്ന് ഭരതനാട്യ മത്സരത്തോടെ വേദികളുണർന്നു. 5 ദിവസമാണ് അനന്തപുരിയിൽ കൗമാരോത്സവം അരങ്ങേറുന്നത്.കേരളത്തിലെ പ്രധാന നദികളുടെ പേരിട്ട 25 വേദികളായി പതിനയ്യായിരത്തോളം വിദ്യാർത്ഥികളാണ് ഇത്തവണ മാറ്റുരയ്ക്കുന്നത്. സെൻട്രൽ സ്റ്റേഡിയമാണ് പ്രധാനവേദി. 25 വേദികളിലായി 249 ഇനങ്ങളിലാണ് മത്സരങ്ങൾ നടക്കുക. മത്സരങ്ങൾ കൈറ്റ് വിക്ടേഴ്സ് ചാനലിലൂടെ തത്സമയം സംപ്രേഷണം ചെയ്യും. സംസ്കൃതോത്സവവും അറബിക് സാഹിത്യോത്സവവും ഇതിനോടനുബന്ധിച്ച് നടക്കും. ജനുവരി 8ന് വൈകിട്ട് 5ന് സമാപന സമ്മേളനം പ്രതിപക്ഷ നേതാവ് വി ഡി സതീശൻ ഉദ്ഘാടനം ചെയ്യും. ചലച്ചിത്രതാരം ടൊവിനോ തോമസ് മുഖ്യാതിഥിയാകും.
സ്‌കൂള്‍ കലോത്സവത്തിന്റെ ചരിത്രത്തില്‍ ആദ്യമായി തദ്ദേശീയ ജനതയുടെ അഞ്ച് നൃത്ത് രൂപങ്ങള്‍ കൂടി ഉൾപ്പെടുത്തിയിരിക്കുന്നു എന്ന പ്രത്യേകതയുമുണ്ട്. കാസർഗോഡെ മാവിലരുടെയും മലവേട്ടുവരുടെയും വിവാഹവുമായി ബന്ധപ്പെട്ട് അവതരിപ്പിക്കുന്ന മംഗലം കളി, ഇടുക്കിയിലെ മലപ്പുലയൻ വിഭാഗക്കാർ ഊരിലെ ഉത്സവാഘോഷത്തിന് അവതരിപ്പിക്കുന്ന മലപ്പുലയ ആട്ടം, അട്ടപ്പാടിയിലെ ഇരുള സമുദായക്കാർ ജനനം, മരണം, ശവസംസ്കാരം, കൃഷി എന്നിങ്ങനെയുള്ള സന്ദര്‍ഭങ്ങളിൽ അവതരിപ്പിക്കുന്ന ഇരുള നൃത്തം, വയനാട്ടിലെ ഗിരിവർഗക്കാരായ പണിയ വിഭാഗം വയലിൽ പണിയെടുക്കുന്ന സമയത്ത് അവതരിപ്പിക്കുന്ന പണിയ നൃത്തം, ഇടുക്കിയിലെ പളിയർ സമുദായത്തിലെ പരമ്പരാഗത നൃത്തരൂപമായ പളിയ നൃത്തം എന്നിവയാണ് ആദ്യമായി കലോത്സവ വേദിയിലെത്തിയത്.
അനന്തപുരി 8 വര്‍ഷങ്ങള്‍ക്കുശേഷമാണ് സംസ്ഥാന സ്‌കൂള്‍ കലോത്സവത്തിന് വേദിയാകുന്നത്. 2016ല്‍ തിരുവനന്തപുരത്തു നടന്ന കലോത്സവത്തില്‍ കിരീടം ചൂടിയത് കോഴിക്കോട് ജില്ലയായിരുന്നു. പാലക്കാടായിരുന്നു റണ്ണറപ്പ്. കഴിഞ്ഞ വര്‍ഷം കൊല്ലത്തുനടന്ന സംസ്ഥാന കലോത്സവത്തില്‍ കണ്ണൂരായിരുന്നു ചാംപ്യന്‍മാര്‍. കോഴിക്കോട് രണ്ടാംസ്ഥാനത്തായിരുന്നു. കഴിഞ്ഞ ദിവസമാണ് സംസ്ഥാന സ്കൂൾ കലോത്സവത്തിന് ഉള്ള സ്വർണ്ണക്കപ്പ് തിരുവനന്തപുരത്ത് എത്തിയത്. തിരുവനന്തപുരം കൊല്ലം ജില്ലകളുടെ അതിർത്തിയായ കിളിമാനൂർ തട്ടത്തുമലയിൽ കപ്പ് എത്തിച്ചു. ജനപ്രതിനിധികളും വിദ്യാഭ്യാസ വകുപ്പ് ഉദ്യോഗസ്ഥരും ചേർന്ന് കപ്പ് ഏറ്റുവാങ്ങി. 117 പവൻ സ്വർണ്ണം ഉപയോഗിച്ചാണ് ഏഷ്യയിലെ ഏറ്റവും വലിയ കൗമാര കലോത്സവത്തിനുള്ള സ്വർണ കപ്പ് നിർമ്മിച്ചിരിക്കുന്നത്. കാഞ്ഞങ്ങാട് ദുർഗ ഹയർ സെക്കൻഡറി സ്കൂളിൽ നിന്നാണ് സ്വർണക്കപ്പുമായുള്ള ഘോഷയാത്ര ആരംഭിച്ചത്. തട്ടത്തുമല ഗവൺമെൻ്റ് ഹയർ സെക്കൻഡറി സ്കൂളിളാണ് ജില്ലാ അതിർത്തിയിൽ കപ്പിനെ വരവേറ്റത്. തുടർന്ന് ജില്ലയിലെ വിവിധ ഭാഗങ്ങളിലുള്ള വിദ്യാലയങ്ങളുടെ സ്വീകരണം ഏറ്റുവാങ്ങിയ ശേഷമാണ് തലസ്ഥാന നഗരിയിലേക്ക് കപ്പ് എത്തിച്ചത്.