ലോക കാലാവസ്ഥാ ആക്ഷൻ ഉച്ചകോടിയിൽ പങ്കെടുക്കാൻ പ്രധാനമന്ത്രി നരേന്ദ്രമോദി ദുബായിലെത്തി. യുഎഇ ആഭ്യന്തര മന്ത്രിയും ഉപപ്രധാനമന്ത്രിയുമായ ഷെയ്ഖ് സെയ്ഫ് ബിൻ സായിദ് അൽ നഹ്യാൻ വിമാനത്താവളത്തിലെത്തി പ്രധാനമന്ത്രിയെ സ്വീകരിച്ചു. ആഗോള നേതാക്കളുമായി കൂടിക്കാഴ്ച്ച നടത്തുമെന്നും കാലാവസ്ഥാ നടപടികൾ കൂടുതൽ ശക്തമാക്കാൻ ലക്ഷ്യമിട്ടുള്ള പ്രത്യേക പരിപാടികളിൽ പങ്കെടുക്കുമെന്നും വിദേശകാര്യ മന്ത്രാലയം വക്താവ് അരിന്ദം ബാഗ്ചി പറഞ്ഞു. ദുബായിലെ ഇന്ത്യൻ സമൂഹത്തിൽ നിന്നുള്ള ഊഷ്മളമായ സ്വീകരണം തന്നെ വളരെയധികം സന്തോഷവാനാക്കിയതായും പ്രധാനമന്ത്രി മോദി ട്വീറ്റിൽ പറഞ്ഞു.
“COP-28 ഉച്ചകോടിയിൽ പങ്കെടുക്കുന്നതിനാണ് ദുബായിൽ വിമാനമിറങ്ങിയത്. മികച്ച ഒരു ലോകം സൃഷ്ടിക്കാൻ ലക്ഷ്യമിട്ടുള്ള ഉച്ചകോടിയുടെ നടപടിക്രമങ്ങൾക്കായി കാത്തിരിക്കുകയാണ്”-നരേന്ദ്രമോദി എക്സിൽ കുറിച്ചു. യുഎഇയിൽ നടക്കുന്ന വേൾഡ് ക്ലൈമറ്റ് ആക്ഷൻ ഉച്ചകോടിയുടെ ഉദ്ഘാടന സെഷനെ പ്രധാനമന്ത്രി മോദി ഇന്ന് അഭിസംബോധന ചെയ്യും. COP28 ഉച്ചകോടിയുടെ ഭാഗമായി അഞ്ച് പരിപാടികളിൽ പ്രധാനമന്ത്രി മോദി സംസാരിക്കും. ഇന്ത്യയിൽ നടന്ന ജി 20 പ്രസിഡൻസിയിൽ കാലാവസ്ഥാ പ്രവർത്തനത്തിന് മുൻഗണന നൽകിയിരുന്നു. “നമ്മുടെ നാഗരിക ധാർമ്മികതയ്ക്ക് അനുസൃതമായി, സാമൂഹികവും സാമ്പത്തികവുമായ വികസനം പിന്തുടരുമ്പോഴും കാലാവസ്ഥാ പ്രവർത്തനത്തിന് ഇന്ത്യ എപ്പോഴും ഊന്നൽ നൽകിയിട്ടുണ്ട്,” മോദി കൂട്ടിച്ചേർത്തു.
ഉച്ചകോടിയിൽ പങ്കെടുക്കുന്ന പ്രധാന രാഷ്ട്രത്തലവൻമാരുമായും സർക്കാർ തലവൻമാരുമായും പ്രധാനമന്ത്രി മോദി കൂടിക്കാഴ്ച നടത്തിയേക്കും. യുകെ പ്രധാനമന്ത്രി ഋഷി സുനക്ക്, ഫ്രഞ്ച് പ്രസിഡന്റ് ഇമ്മാനുവൽ മാക്രോൺ എന്നിവരടക്കമുള്ള നേതാക്കളുമായി പ്രധാനമന്ത്രി കൂടിക്കാഴ്ച നടത്തും.
COP28 ന്റെ ഉയർന്ന തലത്തിലുള്ള വിഭാഗമാണ് ലോക കാലാവസ്ഥാ ആക്ഷൻ ഉച്ചകോടി. ഹരിതഗൃഹ വാതക ഉദ്വമനം കുറയ്ക്കുന്നതിനും കാലാവസ്ഥാ വ്യതിയാനത്തെ ഫലപ്രദമായി നേരിടുന്നതിനുമുള്ള മാർഗങ്ങൾ ചർച്ച ചെയ്യുന്നതിനായാണ് ലോക കാലാവസ്ഥാ ആക്ഷൻ ഉച്ചകോടി സംഘടിപ്പിച്ചിരിക്കുന്നത്. 200 ഓളം രാജ്യങ്ങളിൽ നിന്നുള്ള പ്രതിനിധികൾ ഉച്ചകോടിയിൽ പങ്കെടുക്കും. മറ്റ് മൂന്ന് ഉന്നതതല പരിപാടികളിലും പ്രധാനമന്ത്രി മോദി പങ്കെടുക്കുമെന്ന് അറിയിച്ചിട്ടുണ്ട്. നവംബർ 30 മുതൽ ഡിസംബർ 12 വരെയാണ് യുഎഇയുടെ അധ്യക്ഷതയിൽ COP28 നടക്കുന്നത്.