ബംഗ്ളാദേശ് കലാപത്തെത്തുടര്ന്ന് രാജിവച്ച് രാജ്യം വിട്ട പ്രധാനമന്ത്രി ഷെയഖ് ഹസിന ഇന്ത്യയില് തുടരുന്നതായി കേന്ദ്ര സര്ക്കാര് അറിയിച്ചു. സര്വ്വകക്ഷി യോഗത്തിലാണ് കേന്ദ്ര വിദേശകാര്യമന്ത്രി എസ്.ജയശങ്കര് ഇക്കാര്യം വ്യക്തമാക്കിയത്. ബംഗ്ളാദേശിലെ സ്ഥിതി കേന്ദ്ര സര്ക്കാര് നിരീക്ഷിക്കുന്നു. സൈനിക വിമാനത്തിൽ ഇന്ത്യയിലെത്തിയ ഹസീന ബ്രിട്ടനിൽ അഭയം തേടാൻ ഉദ്ദേശിക്കുന്നതായി റിപ്പോർട്ട്. കേന്ദ്ര സർക്കാരിന്റെ നടപടികൾക്ക് യോഗത്തില് പങ്കെടുത്തരാഹുൽ ഗാന്ധിയും കെസി വേണുഗോപാലും പിന്തുണ അറിയിച്ചു.
അതിനിടെ മുൻ ഭരണകക്ഷിയായ അവാമി ലീഗ് ഒഴികെയുള്ള രാഷ്ട്രീയ പാർട്ടികളുമായി ആലോചിച്ച് പുതിയ ഇടക്കാല സർക്കാർ ഉടൻ രൂപീകരിക്കുമെന്ന് ബംഗ്ലാദേശ് സൈനിക മേധാവി ജനറൽ വക്കർ-ഉസ്-സമാൻ പറഞ്ഞു. 300-ലധികം ആളുകളുടെ മരണത്തിനിടയാക്കിയ അടിച്ചമർത്തൽ അവസാനിപ്പിക്കുമെന്ന് അദ്ദേഹം പ്രസ്താവിച്ചു. ബംഗ്ലാദേശിൽ വൻ പ്രതിഷേധത്തെ തുടർന്ന് പ്രധാനമന്ത്രി സ്ഥാനം രാജിവച്ച് ഷെയ്ഖ് ഹസീന രാജ്യം വിട്ടത് കഴിഞ്ഞ ദിവസമാണ്.
ബംഗ്ലദേശിലുള്ള ഇന്ത്യക്കാരെ ഒഴിപ്പിക്കുന്നതിലും ചർച്ച നടന്നു. ഇന്ത്യക്കാരുടെ സുക്ഷ ഉറപ്പാക്കണമെന്ന് യോഗത്തിൽ കോൺഗ്രസ് ആവശ്യപ്പെട്ടു. പതിമൂവായിരത്തോളം പേർ നിലവില് ബംഗ്ളാദേശിലുണ്ട്. ബംഗ്ളാദേശിൽ തെരഞ്ഞെടുപ്പ് മുതൽ തുടങ്ങിയ വിഷയങ്ങളാണെന്ന് സർക്കാർ യോഗത്തില് അറിയിച്ചു. ബംഗ്ളാദേശ് സേനയുമായി സമ്പർക്കത്തിലാണ്. കലാപത്തിൽ വിദേശ ഇടപെടലുണ്ടോ എന്ന് ഇപ്പോൾ പറയാനാവില്ലെന്ന് വിദേശകാര്യമന്ത്രി എസ് ജയശങ്കർ പറഞ്ഞു. രാഹുൽ ഗാന്ധിയുടെ ചോദ്യത്തിനാണ് ജയശങ്കർ ഈ ഉത്തരം നല്കിയത്. ആഭ്യന്ത്രമന്ത്രി അമിത് ഷാ പങ്കെടുത്തു. എന്നാൽ പ്രധാനമന്ത്രി യോഗത്തില് പങ്കെടുത്തില്ല.
ക്വാട്ട സമ്പ്രദായത്തിനെതിരായ പ്രക്ഷോഭമായി ഒരു മാസത്തിലധികം മുമ്പ് ആരംഭിച്ച പ്രതിഷേധം ദശാബ്ദങ്ങളിലെ ഏറ്റവും മോശമായ അക്രമ സംഭവങ്ങളിലൊന്നായി വളർന്നു. 15 വർഷത്തിലേറെയായി രാജ്യം ഭരിക്കുന്ന ഷെയ്ഖ് ഹസീനയുടെ അവാമി ലീഗ് സർക്കാരിനെ പുറത്താക്കണമെന്നായിരുന്നു സമരക്കാരുടെ ആവശ്യം.
തിങ്കളാഴ്ച ബംഗ്ലാദേശിലെ ആയിരക്കണക്കിന് പ്രതിഷേധക്കാർ ഷെയ്ഖ് ഹസീനയുടെ ധാക്കയിലെ ഔദ്യോഗിക വസതിയിൽ അതിക്രമിച്ച് കയറി. പ്രധാനമന്ത്രി സ്ഥാനം രാജിവെച്ച് രാജ്യം വിട്ടതിന് തൊട്ടുപിന്നാലെയാണ് പ്രതിഷേധക്കാർ വസതിയിലെ മുറികൾ കൊള്ളയടിക്കുകയും ഉപകരണങ്ങൾ നശിപ്പിക്കുകയും ചെയ്തത്. ചിലർ പ്രധാനമന്ത്രിയുടെ വസതിയിലെ മുറിയിലെ കട്ടിലിൽ കിടന്നും വീഡിയോ എടുത്തു.
ഷെയ്ഖ് ഹസീന ഗവൺമെന്റിന്റെ പതനം ആഘോഷിക്കുകയും മുദ്രാവാക്യം വിളിക്കുകയും ചെയ്യുന്ന അനേകം ആളുകൾ തെരുവിലേക്ക് ഒഴുകിയെത്തി. പ്രധാനമന്ത്രിയുടെ ഔദ്യോഗിക വസതിയായ ഗണഭനിൽ വിജയം പ്രഖ്യാപിച്ച് ആയിരങ്ങൾ ഇരച്ചുകയറി.
സോഷ്യൽ മീഡിയയിലെ ദൃശ്യങ്ങൾ ഗണഭബന്റെ ഡ്രോയിംഗ് റൂമുകളിൽ ജനക്കൂട്ടത്തെ കാണിച്ചു. കൂടാതെ ചില ആളുകൾ പ്രധാനമന്ത്രിയുടെ വസതിയിലെ ടെലിവിഷനുകളും കസേരകളും മേശകളും കൊണ്ടുപോകുന്നതും കാണാമായിരുന്നു. ഷെയ്ഖ് ഹസീനയുടെ പിതാവും ബംഗ്ലാദേശ് സ്വാതന്ത്ര്യ നേതാവുമായ ഷെയ്ഖ് മുജീബുർ റഹ്മാന്റെ വലിയ പ്രതിമയ്ക്ക് മുകളിൽ പ്രതിഷേധക്കാർ കയറി അത് നശിപ്പിക്കാൻ ശ്രമിച്ചു. മുജീബുർ റഹ്മാൻ്റെ നിരവധി ഛായാചിത്രങ്ങളും നശിപ്പിക്കപ്പെട്ടു.
സർക്കാർ ഓഫീസുകളിൽ നിന്നും മറ്റ് കെട്ടിടങ്ങളിൽ നിന്നും ഷെയ്ഖ് ഹസീനയുടെ ഛായാചിത്രങ്ങൾ നീക്കം ചെയ്തപ്പോൾ ആഹ്ലാദ പ്രകടനങ്ങൾ മുദ്രാവാക്യങ്ങളും കരഘോഷങ്ങളുമായി ആഘോഷിച്ചു.