ജവഹര്ലാല് നെഹ്റു സര്വകലാശാല കാമ്പസില് പ്രതിഷേധങ്ങള്ക്ക് നിയന്ത്രണം ഏർപ്പെടുത്തി. ക്ലാസ് മുറികളും ലാബുകളും ഉള്പ്പെടെയുള്ള അക്കാദമിക് കെട്ടിടങ്ങളുടെ 100 മീറ്ററിനുള്ളിൽ പ്രതിഷേധ പ്രകടനങ്ങള് നിരോധിച്ചിച്ചു. നേരത്തെ ജെഎൻയു വൈസ് ചാന്സലര്, രജിസ്ട്രാര്, പ്രോക്ടര് തുടങ്ങിയവരുടെ ഓഫീസുകള് സ്ഥിതി ചെയ്യുന്ന അഡ്മിനിസ്ട്രേറ്റീവ് ബ്ലോക്കുകളുടെ 100 മീറ്ററിനുള്ളില് പ്രതിഷേധം നടത്തുന്നത് ഹൈക്കോടതി നിരോധിച്ചിരുന്നു. നിയന്ത്രണങ്ങള് ലംഘിക്കുന്ന വിദ്യാര്ത്ഥികള് കനത്ത പിഴ മുതല് പുറത്താക്കല് വരെയുള്ള ശിക്ഷകള് നേരിടേണ്ടിവരും
ഇതിനിടെ പുതിയ നിയമങ്ങളെ വിമര്ശിച്ച് ജെഎന്യു സ്റ്റുഡന്റ്സ് യൂണിയന് (ജെഎന്യുഎസ്യു) രംഗത്തെത്തി. ഇപ്പോള് നടക്കുന്നത് വിയോജിപ്പുകളെ അടിച്ചമര്ത്താനും കാമ്പസ് ആക്ടിവിസത്തെ നിയന്ത്രിക്കാനുമുള്ള ശ്രമമാണെന്ന് ജെഎന്യുഎസ്യു ആരോപിച്ചു. പുതുക്കിയ മാനുവല് ഉടന് പിന്വലിക്കണമെന്നും അവര് ആവശ്യപ്പെട്ടിട്ടുണ്ട്.
എന്നാല് അക്കാദമികവും ഭരണപരവുമായ ക്രമം നിലനിര്ത്തുന്നതിനും തടസ്സങ്ങള് കുറയ്ക്കുന്നതിനുമാണ് പുതിയ നിയന്ത്രണങ്ങളെന്ന് സര്വകലാശാലാ ഭരണകൂടം വാദിക്കുന്നു. വിദ്യാര്ത്ഥികളുടെ ആശങ്കകള് പ്രകടിപ്പിക്കാന് ക്യാമ്പസിനുള്ളിലെ നിലവിലുള്ള പ്രതിഷേധ മേഖലകള് മതിയെന്നും അവര് ചൂണ്ടിക്കാട്ടുന്നു. ഒക്ടോബറില് സ്കൂള് ഓഫ് ലാംഗ്വേജസ് കെട്ടിടത്തിന്റെ ചുവരില് ദേശവിരുദ്ധ മുദ്രാവാക്യം എഴുതിയ സംഭവം വലിയ ചര്ച്ചയായിരുന്നു. ഇത് അന്വേഷിക്കാന് ഒരു കമ്മിറ്റി രൂപീകരിക്കുമെന്ന് ഭരണകൂടം പ്രഖ്യാപിക്കുകയും ചെയ്തിരുന്നു. അതിന് ശേഷമാണ് ഈ സംഭവവികാസം. പുതിയ ചട്ടങ്ങള് ലംഘിച്ചാല് 20,000 രൂപ പിഴയോ കാമ്പസില് നിന്ന് പുറത്താക്കുകയോ ചെയ്യാം. കൂടാതെ, ‘ദേശവിരുദ്ധ’,മതം, ജാതി, സമുദായം എന്നിവയോട് അസഹിഷ്ണുത വളര്ത്തുന്ന ഏതൊരു പ്രവര്ത്തനവും ശിക്ഷാര്ഹമാണ്. അത്തരക്കാര് 10,000 രൂപ പിഴ നല്കേണ്ടിവരും.
മോദിക്കെതിരായ ബിബിസി ഡോക്യുമെന്ററിയുടെ പ്രദർശനം തടഞ്ഞ് ജെഎൻയു
നേരത്തെ ജെഎൻയു കാമ്പസിലെ ചുവരുകളിൽ ദേശവിരുദ്ധ മുദ്രാവാക്യങ്ങൾ എഴുതിയ സംഭവത്തിൽ അന്വേഷണം ആവശ്യപ്പെട്ട് എബിവിപി സർവകലാശാല മാനേജ്മെന്റിന് കത്തയച്ചിരുന്നു. ഇത്തരം സംഭവങ്ങൾ തടയാൻ കഴിയാത്തതിന് ഉത്തരവാദികളായവരെ കണ്ടെത്താനും, പ്രശ്നം പരിഹരിക്കാനും മാനേജ്മെന്റ് അടിയന്തര നടപടി സ്വീകരിക്കണമെന്നും വിദ്യാർത്ഥി സംഘടന ആവശ്യപ്പെട്ടു.