78-ആം സ്വാതന്ത്ര്യ ദിനാഘോഷത്തിന് ഒരുങ്ങുകയാണ് രാജ്യം. ചെങ്കോട്ടയ്ക്കും സമീപ പ്രദേശങ്ങള്ക്കും അതിനൂതന സാങ്കേതികവിദ്യകളുടെ സുരക്ഷയാണ് ഒരുക്കുന്നത്. ചെങ്കോട്ടയിലും മറ്റു നിര്ണായക ഇടങ്ങളിലും10,000 ലേറെ സുരക്ഷാ ഉദ്യോഗസ്ഥരെയായിരിക്കും വിന്യസിക്കുക നിര്മിത ബുദ്ധിയും (എഐ), മറ്റ് നൂതന സംവിധാനങ്ങളും പ്രയോജനപ്പെടുത്തിയായിരിക്കും ഇത്തവണ സുരക്ഷാ സംവിധാനങ്ങളുടെ കരുത്ത് ഊട്ടിയുറപ്പിക്കുക. ആള്ക്കൂട്ട നിയന്ത്രണവും കൂടുതല് മെച്ചപ്പെടുത്തും.സ്വാതന്ത്ര്യ ദിനവുമായി ബന്ധപ്പെട്ട സുരക്ഷാ സംവിധാനം പുതിയ തലത്തിലേക്ക് ഉയര്ത്തുന്നതിന്റെ ഭാഗമായി പുതിയ 700 സിസിടിവികള് സ്ഥാപിക്കും. ഇവയില് 150ലേറെ എണ്ണത്തിന് അതിനൂതന വിഡിയോ വിശകലന ശേഷിയും ഉണ്ടായിരിക്കും. ഇവയ്ക്ക് നല്കിയിരിക്കുന്ന ലിസ്റ്റ് അനുസരിച്ച് ആളുകളെ തിരിച്ചറിയാനാകും. ആളുകളുടെ എണ്ണമെടുക്കാനും സാധിക്കും. നുഴഞ്ഞുകയറ്റം തിരിച്ചറിയും. ശബ്ദങ്ങളും നിരീക്ഷിക്കും.
ഫേഷ്യല് റെക്കഗ്നിഷന്, ആള്ക്കൂട്ടത്തിന്റെ വലുപ്പം അറിയാനുള്ള കഴിവ്, വാഹനങ്ങളുടെ നമ്പര് പ്ലേറ്റ് വിവരങ്ങള് രേഖപ്പെടുത്തിയെടുക്കാനുള്ള ശേഷി തുടങ്ങിയവ അടക്കമുള്ള മികവായിരിക്കും ക്യാമറകള്ക്ക് ഉണ്ടാകുക എന്ന് എഎന്ഐ റിപ്പോര്ട്ടു ചെയ്യുന്നു. അളുകള് കടന്നു വരുന്നതും തിരിച്ചു പോകുന്നതും ശ്രദ്ധിക്കുകയും ഈ വിവരങ്ങള് തത്സമയം സുരക്ഷാഉദ്യോഗസ്ഥര്ക്ക് നല്കുകയും ചെയ്യും. ഇതിനെല്ലാം പുറമെ, ഉപേക്ഷിക്കപ്പെട്ട വസ്തുക്കള്, അനുവാദമില്ലാത്തിടത്തേക്ക് കടന്നു കയറാനുള്ള ശ്രമം തുടങ്ങിയവ ഒക്കെ നിരീക്ഷണവിധേയമായിരിക്കും.