മണിപ്പൂരിലെ മോറെ ടൗണിൽ കുക്കി സമരക്കാരെന്ന് സംശയിക്കുന്നവരുമായി നടത്തിയ ക്രോസ് വെടിവയ്പ്പിൽ ഒരു പോലീസ് ഉദ്യോഗസ്ഥൻ കൊല്ലപ്പെട്ടു. മോറെയിലെ സബ് ഡിവിഷണൽ പോലീസ് ഓഫീസർ (എസ്ഡിപിഒ), ചിന്ങം ആനന്ദ് കുമാറാണ് വയറ്റിൽ വെടിയേറ്റതിനെ തുടർന്ന് മരണത്തിന് കീഴടങ്ങിയത്. മോറെയിലെ ഒരു ഗ്രൗണ്ടിൽ ഫുട്ബോൾ കളിക്കുന്നതിനിടെ പോലീസ് ടീമിന് നേരെ കുക്കി പ്രതിഷേധക്കാരെന്ന് സംശയിക്കുന്ന ആയുധധാരികളായ അക്രമികൾ വെടിയുതിർക്കുകയായിരുന്നുവെന്ന് വൃത്തങ്ങൾ അറിയിച്ചു. ഇതാണ് പോലീസ് സംഘത്തെ തിരിച്ച് വെടിവെക്കാൻ പ്രേരിപ്പിച്ചത്. എന്നാൽ വെടിവെപ്പിൽ മറ്റ് ഉദ്യോഗസ്ഥർക്ക് പരിക്കേറ്റിട്ടില്ലെന്നും വൃത്തങ്ങൾ അറിയിച്ചു. ഇന്ന് രാവിലെ മുതൽ ആണ് ടൗണിൽ വെടിവെപ്പ് ആരംഭിച്ചതെന്ന് പോലീസ് പറഞ്ഞു.
മണിപ്പൂർ പോലീസ് മേധാവി പുറപ്പെടുവിച്ച അറിയിപ്പ് പ്രകാരം, സംസ്ഥാനത്ത് ഇപ്പോഴും സുരക്ഷാ സേനയുമായി പൊതുജനങ്ങൾ ഏറ്റുമുട്ടുകയും, ജനപ്രതിനിധികളുടെ വസതികളെ ആക്രമിക്കലും, പോലീസ് സ്‌റ്റേഷനുകൾക്ക് മുന്നിൽ പ്രതിഷേധം നടത്തലും ഉൾപ്പെടെ വിവിധ അക്രമ സംഭവങ്ങൾ റിപ്പോർട്ട് ചെയ്യപ്പെടുന്നുണ്ട്. മണിപ്പൂരിലെ ക്രമസമാധാന നിലയ്ക്ക് ഗുരുതരമായ പ്രത്യാഘാതങ്ങൾ ഉണ്ടാക്കിയേക്കാവുന്ന ചിത്രങ്ങളും വിദ്വേഷ പ്രസംഗങ്ങളും വിദ്വേഷ വീഡിയോ സന്ദേശങ്ങളും പ്രചരിപ്പിക്കുന്നതിന് ചില സാമൂഹിക വിരുദ്ധർ സോഷ്യൽ മീഡിയയെ വ്യാപകമായി ഉപയോഗിക്കുമെന്ന് ആശങ്കയുണ്ടെന്നും ഈ അറിയിപ്പിൽ കൂട്ടിച്ചേർക്കുന്നു.
സ്പെഷ്യൽ കമാൻഡോ സൂപ്രണ്ടിനെ കൊല്ലാനുള്ള പദ്ധതിയാണ് ആക്രമണത്തിന് പിന്നിലെന്ന് മോറെ പോലീസ് സ്റ്റേഷനിൽ നിന്നുള്ള റിപ്പോർട്ടുകൾ വ്യക്തമാക്കുന്നു. മെയ് മൂന്ന് മുതൽ മെയ്തേയ് സമുദായവും കുക്കികളും തമ്മിലുള്ള വംശീയ സംഘർഷങ്ങൾക്കാണ് മണിപ്പൂർ സാക്ഷ്യം വഹിക്കുന്നത്.
അതേസമയം സംസ്ഥാനത്ത് മൊബൈൽ ഇന്റർനെറ്റ് സേവനങ്ങൾക്കുള്ള നിരോധനം ഇന്ന് അവസാനിക്കും. സംസ്ഥാനത്തെ സംഘർഷ സാഹചര്യങ്ങൾ കണക്കിലെടുത്ത് മെയ് നാലിന് മൊബൈൽ ഇന്റർനെറ്റ് നിരോധിച്ചതിന് ശേഷം സെപ്റ്റംബർ 23ന് സംസ്ഥാന സർക്കാർ മൊബൈൽ ഇന്റർനെറ്റ് നിരോധനം പിൻവലിച്ചിരുന്നു. സെപ്റ്റംബർ 26ന് വീണ്ടും നിരോധനം പ്രഖ്യാപിച്ചു.