വാണിജ്യ എൽ.പി.ജി വിതരണത്തിലെ തടസ്സങ്ങൾ കാരണം മുംബൈയിലെ ഏകദേശം 20% ഹോട്ടലുകളും റെസ്റ്റോറന്റുകളും ഇതുവരെ അടച്ചുപൂട്ടിയതായി നഗരത്തിലെ ഹോട്ടൽ ആൻഡ് റസ്റ്റോറന്റ് അസോസിയേഷൻ അറിയിച്ചു. ഗ്യാസ് വിതരണ സ്ഥിതി മെച്ചപ്പെട്ടില്ലെങ്കിൽ അടുത്ത രണ്ടു ദിവസത്തിനുള്ളിൽ നഗരത്തിലെ 50% വരെ ഹോട്ടലുകൾ അടച്ചുപൂട്ടേണ്ടിവരുമെന്ന് അസോസിയേഷൻ മുന്നറിയിപ്പ് നൽകി.
പശ്ചിമേഷ്യൻ സംഘർഷത്തെ തുടർന്ന് ആഗോള ഊർജ്ജ വിപണി സമ്മർദ്ദത്തിലായിരിക്കുന്ന സാഹചര്യത്തിലാണ് ഈ പ്രതിസന്ധി ഉണ്ടായിരിക്കുന്നത്. ഇത് ഇന്ധനക്കപ്പലുകളുടെ നീക്കത്തെ തടസ്സപ്പെടുത്തുകയും വിതരണ ശൃംഖലയെ കുറിച്ച് ആശങ്കയുണ്ടാക്കുകയും ചെയ്തിട്ടുണ്ട്. നഗരത്തിലുടനീളമുള്ള റെസ്റ്റോറന്റുകളിലെയും ഭക്ഷണശാലകളിലെയും അടുക്കള പ്രവർത്തനങ്ങളെ തടസ്സപ്പെടുത്തിയ വാണിജ്യ എൽ.പി.ജി സിലിണ്ടറുകളുടെ പെട്ടെന്നുള്ള ക്ഷാമത്തിന്റെ പശ്ചാത്തലത്തിലാണ് അസോസിയേഷന്റെ മുന്നറിയിപ്പ്. ദൈനംദിന പാചക പ്രവർത്തനങ്ങൾക്കായി പല റെസ്റ്റോറന്റുകളും വാണിജ്യ എൽപിജി സിലിണ്ടറുകളെ വളരെയധികം ആശ്രയിക്കുന്നതിനാൽ വിതരണ തടസ്സങ്ങൾ സേവനങ്ങൾ നിർത്തലാക്കാൻ നിർബന്ധിതരാക്കും.
ഗ്യാസ് ലഭ്യതയെ കുറിച്ചുള്ള അനിശ്ചിതത്വം കാരണം നിരവധി ഹോട്ടലുകളും റെസ്റ്റോറന്റുകളും മെനു ഇനങ്ങൾ കുറയ്ക്കുകയോ പ്രവർത്തനങ്ങൾ പരിമിതപ്പെടുത്തുകയോ ചെയ്തിട്ടുണ്ടെന്ന് വ്യവസായ പ്രതിനിധികൾ പറയുന്നു. കഴിഞ്ഞ രണ്ടു ദിവസമായി, മുംബൈ ഉൾപ്പെടെ നിരവധി നഗരങ്ങളിലെ റെസ്റ്റോറന്റുകളെ വാണിജ്യ എൽ.പി.ജി ക്ഷാമം ബാധിച്ചതായി റിപ്പോർട്ട് ചെയ്യപ്പെട്ടിട്ടുണ്ട്.
ഓരോ സ്ഥാപനങ്ങളുടെയും കൈവശമുള്ള എൽ.പി.ജി സ്റ്റോക്കിന്റെ ലഭ്യത അനുസരിച്ചായിരിക്കും ഇനി എത്ര റെസ്റ്റോറന്റുകൾ പ്രവർത്തിക്കുമെന്ന് തീരുമാനിക്കുക. എന്നിരുന്നാലും, ഹോട്ടലുകൾ കൂട്ടായി അടച്ചുപൂട്ടാൻ അസോസിയേഷൻ ഔദ്യോഗിക തീരുമാനമെടുത്തിട്ടില്ലെന്ന് സംഘടന വ്യക്തമാക്കി. റസ്റ്റോറന്റുകൾ തുറന്നിടാനോ താൽക്കാലികമായി പ്രവർത്തനം അവസാനിപ്പിക്കാനോ ഉള്ള തീരുമാനം വ്യക്തിഗത ഹോട്ടൽ ഉടമകളെയും അവരുടെ സ്ഥാപനങ്ങളിലെ ഗ്യാസ് വിതരണത്തിന്റെ ലഭ്യതയെയും ആശ്രയിച്ചിരിക്കും.