വിവാദങ്ങൾക്കൊടുവിൽ കർണാടക നിയമസഭ തെരഞ്ഞെടുപ്പിനുള്ള ആദ്യഘട്ടപട്ടിക ബിജെപി പ്രഖ്യാപിച്ചു. 189 സ്ഥാനാർത്ഥികളാണ് ആദ്യപട്ടികയിൽ ഇടംപിടിച്ചത്. കോൺഗ്രസ് ഇത് വരെ 168 സ്ഥാനാർത്ഥികളെയാണ്പ്രഖ്യാപിച്ചത് . ജെഡിഎസ് 90 സ്ഥാനാർത്ഥികളെയും പ്രഖ്യാപിച്ചു.
യെദിയൂരപ്പയുടെ മകൻ വിജയേന്ദ്ര ശിക്കാരിപുരയിൽ നിന്ന് മത്സരിക്കും. മുഖ്യമന്ത്രി ബസവരാജ് ബൊമ്മെ ഷിഗോനിൽ മത്സരിക്കും. കൂറുമാറിവന്ന ശ്രീമന്ത് പാട്ടീലിനും സീറ്റ് ലഭിച്ചു. മുൻ മുഖ്യമന്ത്രിയും കോൺഗ്രസ് നേതാവുമായ സിദ്ദരാമയ്യയുടെ മണ്ഡലമായ കോലാറിൽ നിന്ന് വി സോമണ്ണ മത്സരിക്കും. സോമണ്ണയുടെ മണ്ഡലമായ ഗോവിന്ദരാജ് നഗറിലെ സ്ഥാനാർത്ഥിയെ പ്രഖ്യാപിച്ചിട്ടില്ല. പ്രായം മാനദണ്ഡമാക്കിയതിനെതിരെ കേന്ദ്ര നേതൃത്വത്തിനെതിരെ പൊട്ടിത്തെറിച്ച ജഗദീഷ് ഷെട്ടറിന്റെ മണ്ഡലമായ ഹുബ്ബള്ളി സെൻട്രലിൽ സ്ഥാനാർത്ഥിയെ പ്രഖ്യാപിച്ചിട്ടില്ല. മത്സരിക്കാനില്ലെന്ന് കേന്ദ്ര നേതൃത്വത്തെ അറിയിച്ച ഈശ്വരപ്പയുടെ മണ്ഡലമായ ശിവമൊഗ്ഗയിൽ നിന്ന് കെ ബി അശോക് നായിക് മത്സരിക്കും.
യുവാക്കൾക്ക് പ്രാധാന്യം നൽകുന്ന പട്ടികയെന്ന് ധർമേന്ദ്ര പ്രധാൻ പറഞ്ഞു. എട്ട് സ്ത്രീകൾക്ക് ആദ്യപട്ടികയിൽ സീറ്റ് നൽകിയിട്ടുണ്ട്. ഒബിസി – 32, എസ്സി – 30, എസ്ടി – 16 എന്നിങ്ങനെയാണ് സീറ്റ് നൽകിയിരിക്കുന്നത്. 52 പേർ പുതിയ സ്ഥാനാർത്ഥികളാണ്.