ദുബായിലേക്കുള്ള വിമാനത്തിൽ ബോംബുണ്ടെന്ന് കാണിച്ച് ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിലേക്ക് ഇമെയിൽ അയച്ചതിന് 13 വയസ്സുള്ള ആൺകുട്ടിയെ കസ്റ്റഡിയിലെടുത്തു. ഡൽഹി എയർപോർട്ടിൽ നിന്നും ജൂൺ 18 ന് ദുബായിലേക്ക് ഷെഡ്യൂൾ ചെയ്ത വിമാനത്തിനാണ് ബോംബ് ഭീഷണി ഇമെയിൽ ലഭിച്ചത്. ഇതോടെ വിമാനത്താവളത്തിൽ അതീവ ജാഗ്രതാ നിർദ്ദേശം നൽകി. യാത്രക്കാരുടെ സുരക്ഷ ഉറപ്പാക്കാൻ എമർജൻസി പ്രോട്ടോക്കോളുകൾ പാലിച്ചു. ഇമെയിൽ വ്യാജമാണെന്ന് പിന്നീട് കണ്ടെത്തി.
മറ്റൊരു കുട്ടിയുടെ വ്യാജ ഭീഷണിയുടെ സോഷ്യൽ മീഡിയ റിപ്പോർട്ടുകളിൽ നിന്നാണ് തനിക്ക് ആശയം ലഭിച്ചതെന്ന് ഒമ്പതാം ക്ലാസ് വിദ്യാർത്ഥിയായ കുട്ടി പോലീസിനോട് പറഞ്ഞു. സ്കൂൾ പഠനത്തിനായി നൽകിയ മൊബൈൽ ഫോൺ ഉപയോഗിച്ച് ഇയാൾ ഇമെയിൽ അയക്കുകയും തുടർന്ന് ഇമെയിൽ അക്കൗണ്ട് ഡിലീറ്റ് ചെയ്യുകയും ചെയ്തു. ഇമെയിലുമായി ബന്ധിപ്പിച്ച ഫോൺ പോലീസ് പിടിച്ചെടുത്തു,
സംഭവത്തെക്കുറിച്ച് മാതാപിതാക്കളോട് പറയാൻ ഭയമുണ്ടെന്ന് കുട്ടി പറഞ്ഞു. കുട്ടിയെ പിന്നീട് മാതാപിതാക്കളുടെ കസ്റ്റഡിയിൽ വിട്ടു.
ഈ മാസം ആദ്യം ഡൽഹിയിൽ നിന്ന് കാനഡയിലെ ടൊറൻ്റോയിലേക്ക് പോവുകയായിരുന്ന എയർ കാനഡ വിമാനത്തിന് ഇമെയിൽ വഴി ബോംബ് ഭീഷണിയുണ്ടായിരുന്നു. പിന്നീട്, ഉത്തർപ്രദേശിലെ മീററ്റിൽ നിന്ന് 13 വയസ്സുള്ള ആൺകുട്ടിയാണ് മെയിൽ അയച്ചതെന്ന് പോലീസ് കണ്ടെത്തി.