രാജസ്ഥാനിൽ മന്ത്രിസഭാ വിപുലീകരിച്ചു. രാജ്യവർധൻ സിംഗ് റാത്തോഡ്, ഡോ. കിരോരി ലാൽ മീണ, ഗജേന്ദ്ര സിംഗ് ഖിംസർ, ബാബുലാൽ ഖരാഡി, ജോഗറാം പട്ടേൽ, സോരാറാം കുമാവത്, സുരേഷ് സിംഗ് റാവത്ത്, മദൻ ദിലാവർ എന്നിവർ മന്ത്രിമാരായി സത്യപ്രതിജ്ഞ ചെയ്തു. ഇന്ന് രാവിലെ തന്നെ മുഖ്യമന്ത്രി ഭജൻലാൽ ശർമ്മ രാജ്ഭവനിലെത്തി ഗവർണറെ കണ്ടിരുന്നു.
സംസ്ഥാനത്ത് അടുത്തിടെ നടന്ന നിയമസഭാ തിരഞ്ഞെടുപ്പിൽ, 200 അംഗ സഭയിൽ 115 സീറ്റുകൾ നേടിയാണ് ബിജെപി അധികാരം പിടിച്ചെടുത്തത്. ദിയാ കുമാരിയും പ്രേംചന്ദ് ബൈർവയും ഉപമുഖ്യമന്ത്രിമാരായും തിരഞ്ഞെടുത്തിരുന്നു. ജനുവരി 19ന് ഗവർണറുടെ പ്രസംഗത്തോടെയാണ് രാജസ്ഥാനിലെ നിയമസഭാ സമ്മേളനം ആരംഭിക്കുക.നിയുക്ത മന്ത്രിമാരുടെ പേരുകൾ പാർട്ടി ഇതുവരെ വെളിപ്പെടുത്തിയിട്ടില്ല. മുതിർന്നവരും പുതുമുഖങ്ങളും ഇടകലർന്ന മന്ത്രിസഭയായിരിക്കുമെന്ന അഭ്യൂഹങ്ങളും പുറത്തുവരുന്നുണ്ട്.
ഡിസംബർ 15നാണ് രാജസ്ഥാൻ മുഖ്യമന്ത്രിയായി ഭജൻ ലാൽ ശർമ്മ സത്യപ്രതിജ്ഞ ചെയ്ത് അധികാരമേറ്റത്. സംഗാനർ മണ്ഡലത്തിൽ കോൺഗ്രസിന്റെ സ്ഥാർത്ഥി പുഷ്പേന്ദ്ര ഭരദ്വാജിനെതിരെ 145,162 വോട്ടുകൾ നേടിയാണ് ശർമ്മ മികച്ച ഭൂരിപക്ഷത്തിൽ വിജയിച്ചത്. പുഷ്പേന്ദ്ര ഭരദ്വാജ് 97,081 വോട്ടുകൾ നേടി. ബിജെപിയുടെ സംസ്ഥാന ജനറൽ സെക്രട്ടറിയായി നാല് തവണ പ്രവർത്തിച്ചിട്ടുണ്ട്. ആൽബർട്ട് ഹാളിന് മുന്നിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ബിജെപി അധ്യക്ഷൻ ജെ പി നദ്ദ, നിരവധി കേന്ദ്ര മന്ത്രിമാർ, വിവിധ സംസ്ഥാനങ്ങളിലെ മുഖ്യമന്ത്രിമാർ എന്നിവർ പങ്കെടുത്തിരുന്നു. രാജസ്ഥാനിലെ ഭരത്പൂർ സ്വദേശിയായ ഭജൻ ലാൽ ശർമ്മ, ആദ്യമായാണ് എംഎൽഎ ആകുന്നത്. രാഷ്ട്രീയ സ്വയം സേവക് സംഘ് (ആർഎസ്എസ്), അഖില ഭാരതീയ വിദ്യാർത്ഥി പരിഷത്ത് (എബിവിപി) എന്നിവയുമായി ബന്ധപ്പെട്ട് അദ്ദേഹം പ്രവർത്തിച്ചിട്ടുണ്ട്