കള്ളപ്പണം വെളുപ്പിക്കൽ കേസിൽ ഡൽഹി മുഖ്യമന്ത്രി അരവിന്ദ് കെജ്രിവാൾ ഇ.ഡിക്ക് മുമ്പിൽ ഹാജരായേക്കില്ല. ഡൽഹി ജൽ ബോർഡിലെ ക്രമക്കേടുമായി ബന്ധപ്പെട്ട കേസിലായിരുന്നു ഇ.ഡി സമൻസ് അയച്ചിരുന്നത്. ഡൽഹി സർക്കാരിന്റെ വകുപ്പ് നൽകിയ കരാറിലെ അഴിമതിയിലൂടെ നേടിയ ഫണ്ട് ആം ആദ്മി പാർട്ടിക്ക് തിരഞ്ഞെടുപ്പ് ഫണ്ടായി കൈമാറിയെന്നായിരുന്നു അന്വേഷണ ഏജൻസി അവകാശപ്പെട്ടത്. അതേസമയം ഏജൻസിയുടെ അവകാശവാദങ്ങളെ “വ്യാജം” എന്നാണ് എഎപി വിശേഷിപ്പിച്ചത്. കള്ളപ്പണം വെളുപ്പിക്കൽ നിരോധന നിയമപ്രകാരം കെജ്രിവാളിന് സമൻസ് ലഭിക്കുന്ന രണ്ടാമത്തെ സംഭവമാണിത്. നേരത്തെ ഡൽഹി എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിലും കെജ്രിവാൾ അന്വേഷണം നേരിടുകയാണ്.
കള്ളപ്പണം വെളുപ്പിക്കൽ നിരോധന നിയമം (പിഎംഎൽഎ) പ്രകാരം രജിസ്റ്റർ ചെയ്ത കേസിൽ മൊഴി രേഖപ്പെടുത്താൻ എഎപിയുടെ 55 കാരനായ ദേശീയ കൺവീനർ ഇന്ന് ഏജൻസിക്ക് മുന്നിൽ ഹാജരാകേണ്ടതുണ്ട്. അതേസമയം എൻഫോഴ്‌സ്‌മെന്റ് ഡയറക്ടറേറ്റിന്റെ സമൻസിന് പിന്നാലെ ഡൽഹി പോലീസ് തയ്യാറെടുപ്പ് ശക്തമാക്കിയിട്ടുണ്ട്. അന്വേഷണ ഏജൻസിക്ക് മുന്നിൽ ഹാജരാകാൻ തീരുമാനിച്ചാൽ രാവിലെ കെജ്രിവാൾ രാജ്ഘട്ട് സന്ദർശിച്ചേക്കുമെന്ന് ഡൽഹി പോലീസിന്റെ ആഭ്യന്തര റിപ്പോർട്ടിൽ പറഞ്ഞിരുന്നു. അങ്ങനെയെങ്കിൽ അദ്ദേഹത്തിന് പിന്തുണയുമായി നിരവധി പാർട്ടി പ്രവർത്തകരും രാജ്ഘട്ടിൽ തടിച്ചുകൂടിയേക്കും. ഇതിന് പിന്നാലെ ബി.ജെ.പി ഓഫീസിന് പുറത്ത് പ്രതിഷേധത്തിനും സാധ്യതയുണ്ട്. ഈ സാഹചര്യങ്ങളെ നേരിടാൻ ഡ്രോണുകൾ അടക്കം വിന്യസിക്കാൻ പോലീസ് തീരുമാനിച്ചിട്ടുണ്ട്. കൂടാതെ, ഏത് പ്രതികൂല സാഹചര്യവും നേരിടാൻ അധിക സേനയെയും വിന്യസിക്കും.
നേരത്തെ എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ആദ്യത്തെ മൂന്ന് സമൻസുകളിൽ ഹാജരാകാത്തതിന് കെജ്‌രിവാളിനെതിരെ നടപടി ആവശ്യപ്പെട്ട് അന്വേഷണ ഏജൻസി പ്രാദേശിക കോടതിയെ സമീപിച്ചിരുന്നു. എക്സൈസ് പോളിസി കേസിൽ എൻഫോഴ്‌സ്‌മെന്റ് ഡയറക്ടറേറ്റ് സമർപ്പിച്ച കുറ്റപത്രത്തിൽ കെജ്‌രിവാളിന്റെ പേര് ഒന്നിലധികം തവണ പരാമർശിച്ചിട്ടുണ്ട്. 2021-22 ലെ എക്സൈസ് നയം തയ്യാറാക്കുന്നത് സംബന്ധിച്ച് പ്രതികൾ കെജ്‌രിവാളുമായി ബന്ധപ്പെട്ടിരുന്നതായി ഏജൻസി അറിയിച്ചു. ഇതുവരെ, ഈ കേസിൽ എഎപി നേതാക്കളായ മനീഷ് സിസോദിയ, സഞ്ജയ് സിംഗ്, പാർട്ടി കമ്മ്യൂണിക്കേഷൻസ് ഇൻചാർജ് വിജയ് നായർ, ചില മദ്യ വ്യവസായികൾ എന്നിവരെ അന്വേഷണ ഏജൻസി അറസ്റ്റ് ചെയ്തിട്ടുണ്ട്.