കടലാസ് ഉൽപന്നങ്ങളുടെ പ്രദർശന വിപണന മേളയായ പേപ്പർ അറേബ്യ 2023 നാളെ മുതൽ വേൾഡ് ട്രേഡ് സെന്ററിൽ നടക്കും. 30 രാജ്യങ്ങളില് നിന്നുള്ള നൂറോളം കമ്പനികള് പങ്കെടുക്കുന്ന ബി2ബി പ്രദര്ശനത്തിന്റെ 12-ാം പതിപ്പാണ് ഇത്തവണ നടക്കുന്നത്. കടലാസ് ഉല്പന്നങ്ങള്ക്കായുള്ള മിഡില് ഈസ്റ്റിലെ വര്ധിച്ചുവരുന്ന ആവശ്യകത ലക്ഷ്യമിട്ടാണ് പ്രദർശനം സംഘടിപ്പിക്കണതെന്ന് സംഘാടകർ അറിയിച്ചു. ദുബായ് 18വരെ നടക്കുന്ന മേളയിൽ കടലാസ്, ടിഷ്യു, പേപ്പർ ബോർഡ് എന്നിവയെ കുറിച്ചുള്ള വിശദാംശങ്ങളും ബിസിനസ് വിപുലീകരണ മീറ്റിങ്ങുകളും ഉണ്ടാകും.
കോവിഡ് മഹാമാരി ലോകമെമ്പാടുമുള്ള പേപ്പര് മില്ലുകള്ക്ക് അഭൂതപൂര്വമായ വെല്ലുവിളികള് സൃഷ്ടിച്ച പശ്ചാത്തലത്തിലും പേപ്പര് പാക്കേജിംഗിലും പേപ്പര് ഡിസ്പോസിബിളുകളിലും പുതിയ അവസരങ്ങള് സൃഷ്ടിക്കപ്പെട്ടുവെന്നത് പ്രത്യേകം കാണേണ്ടതാണ്. ഇത് ഇകൊമേഴ്സ് കുതിച്ചുചാട്ടത്തിന് കൂടുതല് ആക്കം കൂട്ടിയെന്നും സംഘാടകരായ അല് ഫജര് ഇന്ഫര്മേഷന് & സര്വീസസ് ജനറല് മാനേജര് നദാല് മുഹമ്മദ് വാര്ത്താ സമ്മേളനത്തിൽ അറിയിച്ചു. പേപ്പർ വ്യവസായം ലോകത്തിലെ ഏറ്റവും വേഗത്തിൽ വളരുന്ന വിപണികളിലൊന്നാണെന്നും പ്ലാസ്റ്റിക്കുകൾ പോലുള്ള ഒറ്റത്തവണ ഉപയോഗിക്കാനാകുന്ന ഉൽപന്നങ്ങളുടെ ഉപയോഗത്തിനു യുഎഇ നിയന്ത്രണങ്ങൾ ഏർപ്പെടുത്തിയതും പേപ്പർ വ്യവസായത്തിനു ഗുണകരമാണെന്നും നദാൽ മുഹമ്മദ് പറഞ്ഞു. റഷ്യ, യുക്രെയ്ൻ യുദ്ധത്തിന്റെ പശ്ചാത്തലത്തിൽ മധ്യപൂർവ്വദേശത്ത് പേപ്പർ വ്യവസായ നിക്ഷേപങ്ങൾ വളരുകയാണെന്നും സംഘാടകർ പറഞ്ഞു.
അടുത്ത അഞ്ച് വര്ഷത്തിനുള്ളില് വിപണി 28.72 ബില്യണ് ഡോളറിലെത്താന് ഒരുങ്ങുകയാണെന്നും 3.28 ശതമാനം സിഎജിആറില് വളര്ച്ചയുണ്ടായിട്ടുണ്ടെന്നും ഇന്ത്യയിലെ പിഎച്ച്ഡി ചേംബര് ഓഫ് കൊമേഴ്സ് അസിസ്റ്റന്റ് സെക്രട്ടറി നവീന് സേഥ് പറഞ്ഞു. പ്രകൃതി സൗഹൃദ പാക്കേജുകൾക്കായുള്ള ആവശ്യം വർധിച്ചതു പേപ്പർ, പൾപ്പ് വിപണിയിൽ ഉണർവുണ്ടാക്കി. കോവിഡിന് ശേഷമുള്ള ജിസിസി പേപ്പര് വ്യവസായ നിക്ഷേപങ്ങള് 1.6 ബില്യണ് യുഎസ് ഡോളറിലധികമായി ഉയര്ന്നിരിക്കുന്നു. വര്ധിച്ചുവരുന്ന പാരിസ്ഥിതിക അവബോധം കടലാസുല്പന്നങ്ങളുടെ ഉപയോഗം വ്യാപിപ്പിച്ചിരിക്കുന്നു. ആരോഗ്യ, ശുചിത്വ ബോധം വർധിച്ചത് പേപ്പർ പാക്കേജിംഗിലും ടിഷ്യൂകളിലുമുള്ള പ്രതിശീർഷ ഉപയോഗം കൂട്ടി. വർധിച്ചുവരുന്ന പാരിസ്ഥിതിക അവബോധം കടലാസുൽപന്നങ്ങളുടെ ഉപയോഗം വ്യാപിപ്പിച്ചിരിക്കുന്നു വെന്നും നവീന് സേഥ് വ്യക്തമാക്കി.
അൽ ഫജർ ഇൻഫർമേഷൻ ആൻഡ് സർവീസസ് ജനറൽ മാനേജർ നദാൽ മുഹമ്മദ്, എപിപി ഹെഡ് ഓഫ് എക്സ്സ്പോർട് സെയിൽസ് സന്ദീപ് റെയ്ന, ഇന്ത്യയിലെ പിഎച്ച്ഡി ചേംബര് ഓഫ് കൊമേഴ്സ് അസിസ്റ്റന്റ് സെക്രട്ടറി നവീന് സേഥ്, പേപ്പർ അറേബ്യ എക്സിബിഷൻ മാനേജർ രാജേഷ് നായർ എന്നിവരും മറ്റുദ്യോഗസ്ഥരും വാർത്താസമ്മേളനത്തിൽ പങ്കെടുത്തു.