ദുബായിൽ ഗതാഗതനിയമത്തിനുള്ള പിഴകൾ പരിഷ്കരിച്ച് പുതിയ ട്രാഫിക് നിയമം ഇന്ന് മുതൽ പ്രാബല്യത്തിൽ വന്നു. റോഡിൽ ഗുരുതരമായ ലംഘനങ്ങൾ നടത്തുന്ന ഉടമകള്ക്ക് ഇനി മുതൽ കർശന ശിക്ഷ ലഭിക്കും. ഗതാഗത സുരക്ഷ ഉറപ്പാക്കുക, അപകടങ്ങൾ കുറയ്ക്കുക, റോഡുകളിൽ സുരക്ഷിതമായ അന്തരീക്ഷം പ്രോത്സാഹിപ്പിക്കുക എന്നിവയാണ് പുതിയ ഭേദഗതികളുടെ ലക്ഷ്യം. ഗതാഗത സുരക്ഷ ഉറപ്പാക്കുന്നതിനും എമിറേറ്റിലെ വ്യക്തികളുടെ ജീവനും സ്വത്തുക്കൾക്കും സംരക്ഷണം നൽകുന്നതിനുമാണ് നിയമം പരിഷ്കരിച്ചതെന്ന് അധികൃതർ അറിയിച്ചു.
മുൻകൂർ അനുമതിയില്ലാതെ റോഡിൽ വേഗ മത്സരങ്ങളിൽ പങ്കെടുക്കുന്ന വാഹനങ്ങൾ കണ്ടുകെട്ടുമെന്ന് പുതിയ ഭേദഗതികളിൽ പറയുന്നു. ചുവന്ന സിഗ്നൽ മറികടക്കുന്നവർക്ക് 50,000 ദിർഹം പിഴ ചുമത്തും. അശ്രദ്ധമായോ ജീവനോ സ്വത്തിനോ അപകടമുണ്ടാക്കുന്ന തരത്തിൽ വാഹനമോടിക്കുക, മുൻകൂർ അനുമതിയില്ലാതെ റോഡ് റേസിൽ പങ്കെടുക്കുക, നിയമവിരുദ്ധമായി ഉപയോഗിച്ചതോ വ്യാജമായതോ ആയ നമ്പർ പ്ലേറ്റ് ഉപയോഗിച്ച് വാഹനം വാഹനമോടിക്കുക, പോലീസ് വാഹനവുമായി ബോധപൂർവം കൂട്ടിയിടിക്കുകയോ മനഃപൂർവം അതിന് കേടുവരുത്തുകയോ ചെയ്യുക, 18 വയസ്സിന് താഴെയുള്ളവർ വാഹനമോടിക്കുക തുടങ്ങിയ ലംഘനങ്ങൾക്ക് 50,000 ദിർഹം പിഴ നൽകേണ്ടിവരും.
വാഹനങ്ങളുടെ വേഗതയിൽ, ശബ്ദത്തിൽ, എൻജിനിൽ എല്ലാം മാറ്റങ്ങൾ വരുത്തുന്നത്, പോലീസിൽ നിന്ന് രക്ഷപ്പെടാൻ ഒളിക്കുന്നത്, ലൈസൻസ് പ്ലേറ്റ് ഇല്ലാതെ വാഹനം ഓടിക്കുന്നത്, വാഹനത്തിന്റെ ജനാലകൾക്ക് അനുവദനീയമായ ടിന്റ് ശതമാനം കവിയുകയോ അനുമതിയില്ലാതെ മുൻവശത്തെ വിൻഡ്ഷീൽഡിന് നിറം നൽകുകയോ ചെയ്യുക തുടങ്ങിയ ലംഘനങ്ങൾക്ക് വാഹനങ്ങൾ പിടിച്ചുവക്കും. വാഹനങ്ങൾ 10,000 ദിർഹം അടച്ചതിനുശേഷം മാത്രമേ വിട്ടുനൽകൂ.
ഓട്ടമത്സരങ്ങൾ കാണുന്നതിനോ തത്ഫലമായുണ്ടാകുന്ന മറ്റ് പ്രവർത്തനങ്ങളിൽ പങ്കെടുക്കുന്നതിനോ അല്ലെങ്കിൽ റോഡിൽ ഡ്രൈവർമാർ ഒത്തുചേരുക എന്നിവയുമായി ബന്ധപെട്ട് കണ്ടുകെട്ടിയ വാഹനങ്ങൾ വീണ്ടെടുക്കാൻ ഒരു ലക്ഷം ദിർഹം പിഴ നൽകേണ്ടിവരും. മൊത്തം ട്രാഫിക് പിഴ 6,000 ദിർഹം കവിഞ്ഞാൽ ദുബായ് പോലീസിന് ഒരു വാഹനം പിടിച്ചെടുക്കാനുള്ള അവകാശമുണ്ടായിരിക്കും. കണ്ടുകെട്ടിയ വാഹനം അതിന്റെ ഉടമ നടത്തിയ എല്ലാ നിയമലംഘനങ്ങൾക്കും ചുമത്തിയ പിഴകള് അടച്ചാൽ മാത്രമേ മോചിപ്പിക്കാൻ കഴിയൂ.