ദുബായ് മലങ്കര സുറിയാനി കത്തോലിക്കാ സഭാ സമൂഹരൂപീകരണത്തിന്റെ രജത ജൂബിലി ആഘോഷിച്ചു. നവംബർ 5 ഞായറാഴ്ച ഉച്ചയ്ക്ക് മലങ്കര സുറിയാനി കത്തോലിക്കാ സഭയുടെ അദ്ധ്യക്ഷൻ കർദ്ദിനാൾ ബസേലിയോസ് ക്‌ളീമീസ് കാതോലിക്കാ ബാവായുടെ മുഖ്യകാർമികത്വത്തിൽ ദുബായ് സെയിന്റ് മേരീസ് ദേവാലയത്തിൽ ആഘോഷമായ സമൂഹബലി നടത്തി. ദേവാലയ അങ്കണത്തിൽ അത്യഭിവന്ദ്യ കാതോലിക്കാ ബാവ, പരിശുദ്ധ ഫ്രാൻസിസ് മാർപ്പാപ്പയുടെ യു എ യിലെ പ്രതിനിധി ആർച്ച്ബിഷപ്പ് ക്രിസ്റ്റഫേ സാക്കിയ എൽ-കാസിസ്, ബിഷപ്പ് പൗളോ മാർട്ടിനെല്ലി, ബിഷപ്പ് പോൾ ഹിൻഡർ, ബഹുമാനപ്പെട്ട വൈദീകർക്കും പള്ളി അങ്കണത്തിൽ സ്വീകരണം നൽകി.
തുടർന്ന് സിൽവർ ജൂബിലി സമാപന സമ്മേളനം അഭിവന്ദ്യ കർദിനാൾ ബസേലിയോസ് ക്‌ളീമീസ് കാതോലിക്കാ ബാവ ഉൽഘാടനം ചെയ്തു. ജൂബിലിയോടനുബന്ധിച്ച് പ്രസിദ്ധീകരിച്ച സുവനീർ പ്രകാശനവും, വിവിധ അവാർഡുകളും സർട്ടിഫിക്കറ്റുകളും വിതരണവും ചെയ്തു.
അഭിവന്ദ്യ പിതാക്കന്മാർ, സെയിന്റ് മേരീസ് ഇടവക വികാരി ഫാ. ലെനി Connully OFM Cap., മലങ്കര കത്തോലിക്കാ സഭയുടെ ഗൾഫ് കോർഡിനേറ്റർ റെവ .ഫാ. ജോൺ തുണ്ടിയത്ത് കോർ എപ്പിസ്‌കോപ്പോ, സഭയുടെ യു എ ഇ കോർഡിനേറ്റർ റെവ.ഫാ.ഡോ.റെജി മനക്കലെത്ത്, റെവ ഫാ മത്തായി ഐറാണത്തറ, ഷാജു ബേബി (പ്രസിഡന്റ് – യു എ ഇ മലങ്കര കൌൺസിൽ) ജോവന്ന ഫെർണാണ്ടസ് (പാരിഷ് കൗൺസിൽ വൈസ് പ്രസിഡന്റ്), പോൾസൺ മാത്യു (സമൂഹ സ്ഥാപക സെക്രട്ടറി), ജോർജ് വറുഗീസ് (സുവനീർ ജോയിന്റ് കോർഡിനേറ്റർ) എന്നിവർ പ്രസംഗിച്ചു. കമ്യൂണിറ്റി വൈസ് പ്രസിഡന്റ് ബിരൺ ഫിലിപ്പ് സ്വാഗതവും സെക്രട്ടറി ബിജോ ബാബു നന്ദിയും അർപ്പിച്ചു. റെവ.ഫാ. മാത്യൂസ് ആലുമൂട്ടിൽ (പ്രീസ്റ്റ്-ഇൻ-ചാർജ്), ഫാ. വറുഗീസ് കോഴിപ്പാടൻ (മലയാളം കമ്യൂണിറ്റി) എന്നിവർ സന്നിഹിതരായിരുന്നു.
തുടന്ന് സമൂഹാംഗങ്ങൾ ഒരുക്കിയ കലാസന്ധ്യയ്ക്കും സ്നേഹവിരുന്നോടും കൂടി ജൂബിലിക്ക് തിരശീല വീണു. ഇടവക കമ്മിറ്റിയും 10 സബ് കമ്മറ്റികളും ജൂബിലിയുടെ പ്രവത്തനങ്ങൾക്ക് നേതൃത്വം വഹിച്ചു.