കുവൈത്ത് തീപിടുത്തത്തിൽ മരണമടഞ്ഞവരുടെ കുടുംബങ്ങള്ക്ക് പ്രമുഖ വ്യവസായികളും ധനസഹായം പ്രഖ്യാപിച്ചു. കുവൈത്തിലെ മംഗഫ് ഫ്ലാറ്റ് സമുച്ചയത്തിലുണ്ടായ തീപിടുത്തത്തിൽ മരിച്ചവരുടെ കുടുംബങ്ങൾക്ക് നോർക്ക വൈസ് ചെയർമാനും ലുലു ഗ്രൂപ്പ് ചെയർമാനുമായ എം.എ. യൂസഫലി 5 ലക്ഷം രൂപ വീതം ആശ്വാസധനസഹായം നൽകും. ഇക്കാര്യം എം.എ. യൂസഫലി മുഖ്യമന്ത്രി പിണറായി വിജയനെ അറിയിച്ചു. നോർക്ക വഴിയായിരിക്കും ധനസഹായം കുടുംബങ്ങൾക്ക് നൽകുക. ദുരന്തത്തിൽ അതിയായ ദു:ഖം രേഖപ്പെടുത്തിയ യൂസഫലി പരിക്കേറ്റവർ എത്രയും വേഗം സുഖം പ്രാപിക്കട്ടെയെന്ന് ആശംസിച്ചു.
വ്യവസായി രവിപിള്ളയും രണ്ട് ലക്ഷം രൂപ വീതം നൽകും. നോര്ക്ക മുഖേനയാണ് ഈ സഹായം എത്തിക്കുക. സംസ്ഥാന സർക്കാർ പ്രഖ്യാപിച്ചതും വ്യവസായികൾ പ്രഖ്യാപിച്ചതും കൂട്ടി 12 ലക്ഷം രൂപ മരണമടഞ്ഞവരുടെ കുടുംബങ്ങള്ക്ക് ലഭിക്കും. കഴിഞ്ഞ ദിവസം കേന്ദ്ര സർക്കാർ രണ്ട് ലക്ഷം രൂപയുടെ സഹായ ധനം പ്രഖ്യാപിച്ചിരുന്നു. പ്രധാനമന്ത്രിയുടെ ദുരിതാശ്വാസ നിധിയില് നിന്നാണ് തുക അനുവദിക്കുക.