ദുബായ്: ഈദുൽ അദ്ഹ അവധിക്കാലത്ത് ദുബായിലേക്ക് സന്ദർശകപ്രവാഹം. 2025 ജൂൺ 5 മുതൽ ജൂൺ 8 വരെ ദുബായിലുള്ള അതിർത്തികളിലുടെ കടന്നുപോയത് 629,559 യാത്രക്കാരാണെന്ന് ദുബായിലെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA) വെളിപ്പെടുത്തി. ഇതിൽ ഭൂരിഭാഗവും യാത്രക്കാരും കടന്ന് പോയത് ദുബായ് അന്താരാഷ്ട്ര വിമാനത്താവളം വഴിയാണ്. 581,527 യാത്രക്കാർ ദുബായ് വിമാനത്താവളം വഴി സഞ്ചരിച്ചപ്പോൾ, ഹത്ത അതിർത്തി വഴി 46,863 യാത്രക്കാരും, കടൽ മാർഗ്ഗം 1,169 പേരുമാണെന്ന് ഡയറക്ടറേറ്റ് അറിയിച്ചു.
ഏയർപോർട്ട്സ് സെക്ടർ അസിസ്റ്റന്റ് ഡയറക്ടർ ജനറൽ മേജർ ജനറൽ തലാൽ അൽ ഷാൻഖീതി ഈ കണക്കുകൾ ദുബായിയുടെ വളർച്ചയെയും ലോകമെമ്പാടുമുള്ള യാത്രക്കാർക്ക് ഏറ്റവും ഇഷ്ടപ്പെട്ട യാത്രാ കേന്ദ്രമെന്ന നിലയിലുള്ള സ്ഥാനത്തെയും സൂചിപ്പിക്കുന്നുവെന്ന് പ്രസ്താവിച്ചു. ഇത് ദുബായിലെ അതിർത്തികളിലെ മികച്ച ഏകോപനവും സ്മാർട്ട് സംവിധാനങ്ങളുടെ ഫലപ്രദമായ ഉപയോഗവും കാരണമാണെന്നും അദ്ദേഹം കൂട്ടിച്ചേർത്തു. സ്മാർട്ട് ഗേറ്റുകളിലൂടെയും ആർട്ടിഫിഷ്യൽ ഇൻ്റലിജൻസ് സാങ്കേതികവിദ്യകളിലൂടെയും തടസ്സമില്ലാത്ത യാത്രാനുഭവം ഉറപ്പാക്കുന്നതിന് തങ്ങൾ മുൻഗണന നൽകിയിട്ടുണ്ടെന്നും, ഇത് നടപടിക്രമങ്ങൾ വേഗത്തിലാക്കാനും യാത്രക്കാരുടെ ഒഴുക്ക് മെച്ചപ്പെടുത്താനും സഹായിച്ചുവെന്നും അദ്ദേഹം പറഞ്ഞു. യാത്രാനുഭവങ്ങൾ, ജീവിതനിലവാരം എന്നിവ വർദ്ധിപ്പിക്കുന്നതിനുള്ള തങ്ങളുടെ പ്രതിബദ്ധതയുടെ ഭാഗമാണെന്ന് അദ്ദേഹം ഊന്നിപ്പറഞ്ഞു.
വ്യോമയാന, അതിർത്തി മേഖലകളിലെ തന്ത്രപരമായ പങ്കാളികളുമായി സഹകരിച്ചും ഏകോപിപ്പിച്ചും, ഉയർന്ന കാര്യക്ഷമതയോടെയും വഴക്കമുള്ള പ്രവർത്തന അന്തരീക്ഷത്തിലും അസാധാരണമായ യാത്രാ സീസണുകൾ കൈകാര്യം ചെയ്യാനുള്ള ജി ഡി ആർ എഫ് എ ദുബായുടെ കഴിവിനെ ഈ ഫലങ്ങൾ പ്രതിഫലിപ്പിക്കുന്നു. മനുഷ്യപരമായ ഘടകത്തിന് മുൻഗണന നൽകി വേഗതയേറിയതും, സ്മാർട്ടായതും, സുരക്ഷിതവുമായ യാത്രാനുഭവം നൽകുന്നതിലൂടെ, ആഗോള ജീവിതനിലവാരത്തിലും അന്താരാഷ്ട്ര ഗതാഗത സൂചികകളിലും ദുബായുടെ മത്സരക്ഷമത വർദ്ധിപ്പിക്കുന്നതിനുള്ള ദുബായുടെ സമീപനത്തിന്റെ മാതൃകയാണ് ഈ സ്ഥാപനപരമായ സജ്ജീകരണമെന്ന് ജി ഡി ആർ എഫ് എ വിശദീകരിച്ചു