യു എ ഇ യിലെ അറ്റ്ലസ് ഗ്രൂപ് ഓഫ് ഇന്‍സ്റ്റിറ്റ്യൂഷൻസിൽ നിന്ന് പഠനം പൂർത്തിയാക്കിയവർക്കുള്ള ബിരുദ ദാന ചടങ്ങ് കഴിഞ്ഞ ദിവസം നടന്നു. ഷാർജ ഭരണകുടുംബാംഗമായ ഷെയ്ഖ് ഹുമൈദ് ബിൻ റാശിദ് ഹുമൈദ് അബ്ദുല്ല അൽ ഖാസിമി ചടങ്ങ് ഉദ്ഘാടനം ചെയ്തു. അറ്റ്ലസ് ഇന്‍സ്റ്റിറ്റ്യൂഷൻസിന്റെ കീഴിൽ യുകെ, മലേഷ്യ, സ്വിറ്റ്സർലന്‍റ്, ഇന്ത്യ എന്നിവിടങ്ങളില്‍ നിന്നുളള സർവ്വകലാശാലകളില്‍ നിന്നും അവാർഡിംഗ് ബോഡികളില്‍ നിന്നും കോഴ്സുകള്‍ വിജയകരമായി പൂർത്തിയാക്കിയ വിദ്യാർത്ഥികള്‍ക്കാണ് ദുബായ് ഗ്രാൻഡ് ഹായത്തിൽ ഒരുക്കിയ വർണ്ണാഭമായ ചടങ്ങിൽ സർട്ടിഫിക്കറ്റുകള്‍ സമ്മാനിച്ചത്.
പരമ്പരാഗത അക്കാദമിക് വസ്ത്രങ്ങളും തൊപ്പികളും അണിഞ്ഞ് വിവിധ സർവ്വകലാശാലകളിൽ നിന്നുള്ള വിദ്യാർത്ഥികളും വിശിഷ്ടവ്യക്തികളും അടങ്ങുന്ന ഘോഷയാത്രയോടെയാണ് ചടങ്ങ് ആരംഭിച്ചത്. ടി എന്‍ പ്രതാപന്‍ എംപിയും ചടങ്ങിൽ പങ്കെടുത്തു. മലേഷ്യയിലെ ഓപ്പൺ യൂണിവേഴ്സിറ്റി വൈസ് ചാൻസലർ ഡോ. അഹമ്മദ് ഇസാനി അവാങ്, യു കെ യിലെ ആംഗ്ലിയ റസ്‌കിൻ യൂനിവേഴ്സിറ്റിയുടെ ഇന്റർനാഷണൽപാർട്ണർഷിപ്പ് ഡയറക്ടർ ഡോ. സൈമൺ ഇവാൻസ്, പാൻ ആഫ്രിക്കൻ ചേംബർ ഓഫ് കൊമേഴ്‌സിന്റെ എക്‌സിക്യൂട്ടീവ് ഡയറക്ടർ കെബോർ ഗെന്ന തുടങ്ങിയവർ സർട്ടിഫിക്കറ്റുകൾ വിതരണം ചെയ്തു.
എ ജി ഐ ഡയറക്ടർ അഖിൽ സതീഷ്‌ സ്വാഗതം പറഞ്ഞു. ചെയർമാൻ മുഹമ്മദ് മുൻസീർ, സി ഇ ഒ പ്രമീളാ ദേവി തുടങ്ങിയവരും സംസാരിച്ചു. ബിരുദദാന ചടങ്ങില്‍ എണ്ണൂറോളം വിദ്യാർഥികളും രക്ഷിതാക്കളും പങ്കെടുത്തു. തങ്ങളുടെ അക്കാദമിക് യാത്രയിൽ പിന്തുണച്ച അധ്യാപകർക്ക് ചടങ്ങിൽ വിദ്യാർത്ഥി പ്രതിനിധികൾ നന്ദി രേഖപ്പെടുത്തി.