ദുബൈ: കോഴിക്കോട് ഫാറൂഖ് കോളേജിന്‍റെ 75ാം വാർഷികത്തിന്‍റെ അന്താരാഷ്ട്ര ആഘോഷങ്ങൾക്ക് തുടക്കം കുറിച്ച് ഫോസ യു.എ.ഇ സംഘടിപ്പിക്കുന്ന ഡയമണ്ട് ഫിയസ്റ്റ ശനിയാഴ്ച ദുബൈ അൽ നഹ്ദയിലെ ഹയർ കോളജ് ഓഫ് ടെക്നോളജി ഓഡിറ്റോറിയത്തിൽ നടക്കും. ഇന്ത്യയുടേയും ഫാറൂഖ് കോളേജിന്‍റെയും 75 വർഷങ്ങളും യു.എ.ഇയുടെ 51 വർഷങ്ങളും സമന്വയിപ്പിച്ച് സംഘടിപ്പിക്കുന്ന പരിപാടി വൈകുന്നേരം നാലിന് ആരംഭിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. പാർലമെന്‍റേറിയനും നിയമ വിദഗ്ധനുമായ കപിൽ സിബൽ എം.പി, ഡോ. എം.പി. അബ്ദുസമദ് സമദാനി എം.പി, ഡോ. ആസാദ് മൂപ്പൻ, ഫാറൂഖ് കോളജ് പ്രിൻസിപ്പൽ കെ.എം. നസീർ, മാനേജർ സി.പി. കുഞ്ഞമ്മദ് തുടങ്ങിയ പ്രമുഖർ പങ്കെടുക്കും. ഫറൂഖ് കോളജിന്‍റെ 75 വർഷത്തെ ചരിത്രം അടയാളപ്പെടുത്തുന്ന മാഗസിനും ഇതോടനുബന്ധിച്ച് തയാറാക്കിയിട്ടുണ്ട്. മാദ്ധ്യമ പ്രവർത്തകൻ എം.സി.എ. നാസറിന്‍റെ നേതൃത്വത്തിൽ പുറത്തിറക്കുന്ന മാഗസിന്‍റെ പ്രകാശനവും വേദിയിൽ നടക്കും. രമ്യ നമ്പീശൻ, നജിം അർഷാദ്, രാജ് കലേഷ്, രിസ ഫാത്തിമ തുടങ്ങിയവർ നേതൃത്വം നൽകുന്ന സംഗീത നിശയും അരങ്ങേറും. പ്രവേശനം സൗജന്യമാണ്.
യു.എ.ഇയിൽ ആയിരക്കണക്കിന് പൂർവ വിദ്യാർഥികളുള്ള സംഘടനയാണ് ഫോസയെന്നും, യു എ ഇ യിലും നാട്ടിലുമായി നിരവധി ജീവകാരുണ്യ പ്രവർത്തനങ്ങളാണ് സംഘടന നടപ്പാക്കുന്നതെന്നും ഭാരവാഹികൾ പറഞ്ഞു. ഫോസ അംഗങ്ങളല്ലാത്തവർക്കും പരിപാടിയിൽ പങ്കെടുക്കാമെന്നും സംഘാടകർ അറിയിച്ചു. ഈ പരിപാടിയുടെ തുടർച്ചയായി വിവിധ രാജ്യങ്ങളിലെ ഫോസ ഘടകങ്ങൾ 75ാം വാർഷികാഘോഷം സംഘടിപ്പിക്കുമെന്നും അവർ വ്യക്തമാക്കി. ഫോസ മുൻ പ്രസിഡന്‍റുമാരായ ഡോ. അഹമ്മദ്, മലയിൽ മുഹമ്മദ് അലി, ജമീൽ ലത്തീഫ്, പ്രസിഡന്റ് റാഷിദ് കിഴക്കയിൽ, ജനറൽ സെക്രട്ടറി റാബിയ ഹുസൈൻ, സെക്രട്ടറി ജലീൽ മഷൂർ, അനീസ് ഫരീദ് എന്നിവർ വാർത്തസമ്മേളനത്തിൽ പങ്കെടുത്തു.