യു.എ.ഇ യിലെ വിവിധഭാഗങ്ങളിൽ ജോലി ചെയ്യുന്ന ഏറ്റവും അർഹരായ പ്രവാസികളുടെ, നാട്ടിൽ പഠിക്കുന്ന പെൺകുട്ടികൾക്ക് 25 ലക്ഷം രൂപയുടെ ‘അൽമിറ’ സ്കോളർഷിപ്പ് വിതരണം ചെയ്തു. മിടുമിടുക്കികളായ മക്കളുടെ പേരിൽ, അഭിമാനത്തോടെ സ്കോളർഷിപ്പ് സ്വീകരിക്കാൻ രക്ഷിതാക്കളായ 25 പ്രവാസികൾ ദുബായിലെത്തി സ്കോളർഷിപ്പ് സ്വീകരിച്ചു. യു.എ.ഇ യിലെ പ്രമുഖ വനിത സംരംഭക ഹസീന നിഷാദിന്റെ നേതൃത്വത്തിൽ ആരംഭിച്ച പെൺകുട്ടികൾക്ക് വേണ്ടിയുള്ള ‘അൽമിറ’ സ്കോളർഷിപ്പ് കഴിഞ്ഞ ജനുവരി മാസത്തിലാണ് പ്രഖ്യാപിച്ചത്.
ഇത്തവണ നാട്ടിൽ ഹയർ സെക്കണ്ടറി പൊതുപരീക്ഷ എഴുതുന്ന ആയിരത്തോളം അപേക്ഷകരിൽ നിന്നും പെൺകുട്ടികൾക്ക് പ്ലസ് വണ്ണിൽ ലഭിച്ച മാർക്കിന്റെയും, യുഎയിൽ ജോലി ചെയ്യുന്ന രക്ഷിതാവിന്റെ സാമ്പത്തിക സാഹചര്യവും പരിഗണിച്ചാണ് 25 പെൺകുട്ടികളെ ഒരു ലക്ഷം രൂപ വീതമുള്ള സ്കോളർഷിപ്പിന് തിരഞ്ഞെടുത്തത്. 43 വർഷമായി അബുദാബിയിൽ പ്രവാസ ജീവിതം നയിച്ച് ഒരു വീട്ടിൽ ജോലി ചെയ്യുന്ന ഖാലിദ്, 40 വർഷമായി ദുബൈയിലെ കാഫിറ്റീരിയയിൽ ജോലി ചെയ്യുന്ന ഹുസൈൻ, ഷാർജയിലെ സ്കൂളിൽ ക്ളീനിംഗ് സ്റ്റാഫ് ആയി ജോലി ചെയ്യുന്ന ജിജി തുടങ്ങി 25 അർഹരായ രക്ഷിതാക്കൾക്കാണ് ദുബൈ ക്രൗൺ പ്ലാസ ഹോട്ടലിൽ വെച്ച് നടന്ന ചടങ്ങിൽ ‘അൽമിറ’ സ്കോളർഷിപ്പ് വിതരണം ചെയ്തത്.
“സ്കോളർഷിപ്പ് സ്വീകരിക്കാൻ എത്തിയ ഓരോ രക്ഷിതാവിനും മകളെ കുറിച്ച് സ്വപ്നങ്ങളുണ്ട്. അതുകൊണ്ടാണ് പെൺകുട്ടികളുടെ പുരോഗമനം വിദ്യാഭ്യാസത്തിലൂടെ എന്ന ആശയം ഉൾക്കൊണ്ടുകൊണ്ട്, തങ്ങളുടെ മകളുടെ പേരിലുള്ള ‘അൽമിറ’ സ്കോളർഷിപ്പ് വനിതാ ദിനത്തിൽ വിതരണം ചെയ്തത് എന്ന് വേൾഡ് സ്റ്റാർ ഹോൾഡിങ് എംഡി ഹസീന നിഷാദ് പറഞ്ഞു. പെൺകുട്ടികളെ എത്രയും പെട്ടന്ന് കല്യാണം കഴിപ്പിച്ച് പറഞ്ഞയക്കുക എന്ന ചിന്തയിൽനിന്നും ഭൂരിഭാഗം പ്രവാസികളും മാറിയെന്നതിന്റെ ഏറ്റവും മികച്ച തെളിവായിരുന്നു ഞങ്ങൾ ഈ സ്കോളർഷിപ്പ് അനൗൺസ് ചെയ്തപ്പോൾ ലഭിച്ച പ്രതികരണമെന്ന് കമ്പനി ചെയർമാൻ നിഷാദ് ഹുസ്സൈൻ പറഞ്ഞു.