നിത്യഹരിതഗാനങ്ങളിലൂടെ സ്വരമധുരം വിളമ്പിയ തെന്നിന്ത്യയുടെ പ്രിയഗായികയായി മാറിയ എസ് ജാനകിക്ക് ഇന്ന് എൺപത്തി അഞ്ചാം പിറന്നാൾ. എസ്.ജാനകിയെന്ന പേരില്ലാതെ ഇന്ത്യന് സിനിമാസംഗീത ചരിത്രം പൂര്ണമാകില്ല. 18 ഓളം ഭാഷകളില് പാടിയ ജാനകി തന്റെ സ്വരമധുരം കൊണ്ട് കീഴടക്കിയ വരികൾ ഇന്നും സംഗീതപ്രേമികൾക്ക് അമൃതാണ്. ഉച്ചാരണശുദ്ധികൊണ്ടും ആലാപനമികവുകൊണ്ടും മനോഹരമായ പാട്ടുകളിലൂടെ വിസ്മയിപ്പിക്കുന്ന ഗായിക.
1957ൽ പുറത്തിറങ്ങിയ ‘മിന്നുന്നതെല്ലാം പൊന്നല്ല’ എന്ന ചിത്രത്തിലെ ‘ഇരുൾ മൂടുകയോ എൻ വാഴ്വിൽ..’ എന്ന ഗാനത്തിലൂടെയാണ് ജാനകിയമ്മ മലയാളത്തിലേക്കെത്തുന്നത്. ഓൾ ഇന്ത്യ റേഡിയോയിൽ ലളിതഗാനമത്സരത്തിലൂടെയാണ് എസ്. ജാനകി സംഗീതലോകത്തേക്ക് ചുവടുവച്ചത്. 1957ൽ ‘വിധിയിൻ വിളയാട്ട്’ എന്ന തമിഴ് സിനിമയിലൂടെ പിന്നണിഗാനരംഗത്തെത്തിയ ജാനകി, പിന്നീട് സംഗീതപ്രേമികൾക്കായി സംഭാവന ചെയ്തത് തന്റെ സംഗീതജീവിതത്തിന്റെ ആറ് പതിറ്റാണ്ടാണ്.
പിന്നീടിങ്ങോട്ട് തൊട്ടതെല്ലാം പൊന്നാക്കിയ ഗായിക. തേനും വയമ്പും, മലർകൊടി പോലെ, ആടി വാ കാറ്റേ, നാഥാ നീ വരും, തുമ്പീ വാ, മോഹം കൊണ്ടു ഞാൻ, സന്ധ്യേ, കിളിയേ കിളിയേ, കണ്ണും കണ്ണും, ഉണ്ണി ആരാരിരോ, ആരാരോ ആരിരാരോ, എന്നിങ്ങനെ ആ വിശ്രുത ഗായികയെ അടയാളപ്പെടുത്തുന്ന പാട്ടുകൾ നിരവധിയാണ്. ഇന്നും എസ് ജാനകി ആലപിച്ച ഗാനം മൂളാതെ ഒരു മലയാളിയുടെയും ഒരു ദിവസം കടന്നുപോവില്ല. അത്രക്ക് മധുരഗീതങ്ങളുടെ തേൻമഴ പൊഴിക്കുകയാണ് ശാബ്ദങ്ങളായി ജാനകിയമ്മ.
‘താനേ തിരിഞ്ഞും മറിഞ്ഞും’ ‘മാവു പൂത്തു മാതളം പൂത്തു’ ‘ഈ നീലിമ തൻ ചാരുതയിൽ’ ‘മിഴിയോരം നനഞ്ഞൊഴുകും’ ‘പൊന്നുരുകും പൂക്കാലം’ ‘സ്വർണ മുകിലേ’… തുടങ്ങിയ ഗാനങ്ങൾ ദശാബ്ദങ്ങൾക്കിപ്പുറവും
മലയാളികളുടെ സംഗീതാസ്വാദനത്തിന് മാധുര്യം കൂട്ടിയിട്ടേയുള്ളൂ.
അഞ്ച് ഭാഷകളിലായി നാൽപ്പത്തിഎണ്ണായിരത്തിലേറെ ഗാനങ്ങൾ, മികച്ച ഗായികക്കുള്ള നിരവധി പുരസ്കാരങ്ങൾ, ഇന്ത്യയിലെ മികച്ച സംഗീതസംവിധായകർ ഈണമിട്ട പാട്ടുകൾ. മലയാളി നെഞ്ചോടുചേർത്തുവച്ച എത്രയോ പാട്ടുകളാണ് ആ മധുരശബ്ദത്തിൽ അനശ്വരമായി മാറിയത്. പാട്ടുനിര്ത്താനുളള തീരുമാനം ധൈര്യത്തോടെ പ്രഖ്യാപിച്ചത് 78-ാംം വയസ്സിലാണ്. നാല് ദേശീയ അവാര്ഡുകളും 41 സംസ്ഥാന ചലച്ചിത്ര ബഹുമതികളും നേടിയ ജാനകി, ഏറെ വൈകിയെത്തിയ പദ്മഭൂഷണ് നിരസിച്ചു.