ദാദാ സാഹേബ് ഫാൽക്കെ അവാർഡ് നേടിയ നടൻ മോഹൻലാലിനെ സംസ്ഥാന സർക്കാർ ഇന്ന് ആദരിക്കും. ‘മലയാളം വാനോളം, ലാൽസലാം’ എന്ന് പേരിട്ടിരിക്കുന്ന പരിപാടി ഇന്ന് വൈകുന്നേരം അഞ്ച് മണിക്ക് സെന്ട്രല് സ്റ്റേഡിയത്തില് വച്ച് നടക്കും. മുഖ്യമന്ത്രി പിണറായി വിജയൻ സർക്കാരിന് വേണ്ടി മോഹൻലാലിനെ ആദരിക്കും. പരിപാടിയിൽ പൊതു ജനങ്ങൾക്ക് പ്രവേശനം സൗജന്യമാണ്.
പരിപാടിയിൽ ഇന്ത്യൻ ചലച്ചിത്രരംഗത്തെ പ്രമുഖരും പങ്കെടുക്കും. മന്ത്രിമാർ, സാമൂഹിക സാംസ്കാരിക രംഗത്തെ പ്രമുഖർ തുടങ്ങിയവരും പരിപാടിയിലെത്തും. ചടങ്ങിനുള്ള ഒരുക്കങ്ങളെല്ലാം പൂർത്തിയായി. പൊലീസ്, ഗതാഗതം, ഫയർ ആൻഡ് സേഫ്റ്റി, നഗരസഭ, ആരോഗ്യം തുടങ്ങിയ വിവിധ വകുപ്പുകളുടെ ഏകോപനത്തിൽ ജില്ലാ ഭരണകൂടത്തിൻ്റെ നേതൃത്വത്തിലാണ് പരിപാടിയുടെ ക്രമീകരണം. പ്രത്യേക പരിശീലനം ലഭിച്ച വോളൻ്റിയർമാരുമുണ്ട്. കാലാവസ്ഥ പരിഗണിച്ചാണ് സ്റ്റേഡിയത്തിലെ പന്തൽ ഒരുക്കിയിട്ടുള്ളതെന്നും മന്ത്രി വി. ശിവൻകുട്ടി പറഞ്ഞു.
സെപ്റ്റംബർ 23നാണ് മോഹൻലാൽ ദാദാ സാഹേബ് ഫാൽക്കെ പുരസ്കാരം ഏറ്റുവാങ്ങിയത്. ഇന്ത്യന് സിനിമയ്ക്ക് നല്കിയ സമഗ്രസംഭാവനകള്ക്കുള്ള ദാദാ സാഹേബ് ഫാല്ക്കെ പുരസ്കാരം ഭാര്യ സുചിത്രയ്ക്കും നിർമാതാവ് ആൻറണി പെരുമ്പാവൂരിനും ഒപ്പമെത്തിയാണ് മോഹൻലാൽ ഏറ്റുവാങ്ങിയത്. താരം വേദിയിലേക്ക് കയറിയതോടെ വിഗ്യാൻ ഭവനിൽ എത്തിയവർ ഒന്നടങ്കം എഴുന്നേറ്റ് നിന്ന് കയ്യടിച്ചു.
സ്വപ്നത്തില്പോലും ഇത്തരമൊരു നിമിഷം പ്രതീക്ഷിച്ചില്ലെന്നും എന്റെ ആത്മാവിന്റെ സ്പന്ദനമാണ് സിനിമയെന്നും പുരസ്കാരം ഏറ്റുവാങ്ങിയശേഷം മോഹന്ലാല് പറഞ്ഞു. നിറഞ്ഞ കയ്യടികൾക്കിടെയായിരുന്നു പുരസ്കാരം സ്വീകരിച്ചതും നന്ദി അറിയിച്ചതും. പുരസ്കാര വേദിയില് മോഹന്ലാലിനെ ഉഗ്രന് ആക്ടറെന്ന് കേന്ദ്ര മന്ത്രി അശ്വിനി വൈഷ്ണവ് വിശേഷിപ്പിച്ചു. മലയാളത്തില് പ്രശംസിച്ച ശേഷം ട്രൂ ലെജന്ഡെന്നും മന്ത്രി താരത്തെ വിശേഷിപ്പിച്ചു.
സംവിധായകന് അടൂര് ഗോപാലകൃഷ്ണനു ശേഷം രണ്ടാമത് ഈ പുരസ്കാരം ലഭിച്ച മലയാളി ആണ് മോഹൻലാൽ.
മിഥുൻ ചക്രവർത്തി, ആശാ പരേഖ്, വഹീദ റഹ്മാൻ, രജനീകാന്ത്, അമിതാഭ് ബച്ചൻ, വിനോദ് ഖന്ന, കെ വിശ്വനാഥ്, മനോജ് കുമാർ, ശശി കപൂർ, ഗുൽസാർ, പ്രൺ, സൗമിത്ര ചാറ്റർജി, ശ്യാം ബെനഗൽ, മൃണാൾ സെൻ, തപൻ സിൻഹ, തപൻ സെൻ, തപൻ സിൻഹ തുടങ്ങിയ ഇതിഹാസങ്ങൾക്കൊപ്പം മോഹൻലാൽ എത്തി. മുഖർജി, ബിആർ ചോപ്ര, ദിലീപ് കുമാർ, മജ്റൂഹ് സുൽത്താൻപുരി, ലതാ മങ്കേഷ്കർ, ഭൂപൻ ഹസാരിക, രാജ് കപൂർ, സത്യജിത് റേ എന്നിവരും ദാദാസാഹിബ് ഫാൽക്കെ അവാർഡ് ക്ലബ്ബിൽ ഉൾപ്പെടുന്നു.