കസാക്കിസ്ഥാനിൽ ഈയാഴ്ച തകർന്നുവീണ അസർബൈജാൻ എയർലൈൻസ് വിമാനം തകർന്നത് റഷ്യയിൽ നിന്ന് വെടിയേറ്റതിനെ തുടർന്നാണെന്ന് അസർബൈജാൻ പ്രസിഡൻ്റ് ഇൽഹാം അലിയേവ് പറഞ്ഞു. വിമാന അപകടത്തിൻ്റെ കാരണം മറച്ചുവെക്കാൻ റഷ്യ ശ്രമിച്ചുവെന്നും ദുരന്തത്തിൽ റഷ്യ കുറ്റംസമ്മതിക്കണമെന്നും അദ്ദേഹം ആവശ്യപ്പെട്ടു. തകർച്ചയുടെ കാരണങ്ങളെക്കുറിച്ച് തെറ്റായ വിവരങ്ങൾ നൽകി ചില റഷ്യൻ സർക്കിളുകൾ സത്യം മറച്ചുവെക്കാൻ ശ്രമിച്ചതിൽ താൻ ഖേദിക്കുന്നതായി പ്രസിഡൻ്റ് അലിയേവ് പറഞ്ഞതായി അസർബൈജാൻ സ്റ്റേറ്റ് ടെലിവിഷൻ റിപ്പോർട്ട് ചെയ്തു. വിമാന അപകടത്തിൽ റഷ്യ കുറ്റം സമ്മതിക്കുകയും സൗഹൃദ രാജ്യമായി കണക്കാക്കപ്പെടുന്ന അസർബൈജാനോട് ക്ഷമാപണം നടത്തുകയും വെണമെന്നും പ്രസിഡൻ്റ് അലിയേവ് കൂട്ടിച്ചേർത്തു.
കഴിഞ്ഞ ദിവസം അപകടത്തിന് പിന്നാലെ പുടിൻ അലിയേവിനോട് മാപ്പ് പറയുകയും ദാരുണമായ സംഭവമെന്ന് പറയുകയും ചെയ്തിരുന്നു. എന്നാൽ, റഷ്യയുടെ വെടിയേറ്റാണ് വിമാനം തകർന്നതെന്ന് അദ്ദേഹം സമ്മതിച്ചിരുന്നില്ല. വിമാനം കാസ്പിയൻ കടലിനു കുറുകെ കസാക്കിസ്ഥാനിലേക്ക് തിരിച്ചുവിടുന്നതിന് മുമ്പ് റഷ്യൻ വ്യോമ പ്രതിരോധ സംവിധാനത്തിൽ നിന്ന് വെടിയേറ്റതായാണ് നിഗമനം. അപകടത്തിൽ 38 പേർ മരിച്ചു.
അതെസമയം 38 പേരുടെ മരണത്തിനിടയാക്കിയ അസർബൈജാൻ എയർലൈൻസ് വിമാന ദുരന്തത്തിൽ ക്ഷമാപണവുമായി റഷ്യൻ പ്രസിഡന്റ് വ്ലാഡിമിർ പുട്ടിൻ. അസർബൈജാൻ പ്രസിഡന്റ് ഇൽഹാം അലിയേവിനെ ഫോണിൽ വിളിച്ചായിരുന്നു ക്ഷമാപണം. റഷ്യൻ വ്യോമപരിധിയിലുണ്ടായ അപകടത്തിൽ അഗാധ ദുഃഖം രേഖപ്പെടുത്തിയ പുട്ടിൻ , പരിക്കേറ്റവർ വേഗം സുഖം പ്രാപിക്കട്ടെയെന്നും പറഞ്ഞു. റഷ്യൻ വ്യോമപ്രതിരോധ സംവിധാനം അബദ്ധത്തിൽ വെടിവച്ചതാണ് വിമാനാപകടത്തിന് കാരണം എന്ന റിപ്പോർട്ടുകൾക്കിടെയാണ് ക്ഷമാപണം. അതേസമയം, അപകടത്തിന്റെ ഉത്തരവാദി റഷ്യയാണെന്നോ റഷ്യൻ വ്യോമപ്രതിരോധ സംവിധാനം വിമാനത്തെ വെടിവച്ചെന്നോ പുട്ടിൻ പറഞ്ഞിട്ടില്ല. എന്നാൽ, അപകടസമയം മേഖലയിൽ യുക്രെയിൻ ഡ്രോൺ ആക്രമണങ്ങളുണ്ടായെന്നും റഷ്യ അവയെ ചെറുത്തിരുന്നെന്നും അറിയിച്ചു. സംഭവത്തിൽ റഷ്യ അന്വേഷണം ആരംഭിച്ചെന്നും വ്യക്തമാക്കി. വിമാനം തകർന്നതിന് പിന്നിൽ ബാഹ്യ ഇടപെടലുണ്ടായെന്ന് പ്രാഥമിക അന്വേഷണ റിപ്പോർട്ടിൽ കണ്ടെത്തിയിരുന്നു. അപകടത്തിൽ അസർബൈജാൻ റഷ്യയെ കുറ്റപ്പെടുത്തിയിട്ടില്ല.