മണിപ്പൂരിൽ അടുത്തിടെയുണ്ടായ അക്രമങ്ങളുടെ പശ്ചാത്തലത്തിൽ കേന്ദ്രം 20 കമ്പനി അർദ്ധസൈനിക വിഭാഗത്തെ കൂടി മണിപ്പൂരിലേക്ക് അയച്ചു. കേന്ദ്ര ആഭ്യന്തര മന്ത്രി അമിത് ഷായുമായുള്ള കൂടിക്കാഴ്ചയ്ക്ക് ശേഷം 50 കമ്പനി സേനയെ മണിപ്പൂരിലേക്ക് അയച്ചിരുന്നു. ഇതിന് പിന്നാലെയാണ് 20,000 അധിക അർദ്ധസൈനിക ഉദ്യോഗസ്ഥർ അടങ്ങുന്ന 20 കമ്പനികളെ കൂടി അയച്ചത്.
കഴിഞ്ഞ 10 ദിവസത്തിനുള്ളിൽ അക്രമാസക്തമായ ഏറ്റുമുട്ടലുകളുടെ എണ്ണം അതിവേഗം ഉയർന്നത് പരിഗണിച്ച് മണിപ്പൂരിൽ 90,000 അധിക അർദ്ധസൈനിക ഉദ്യോഗസ്ഥർ ഉൾപ്പെടുന്ന മൊത്തം 90 കമ്പനികളെ വിന്യസിച്ചിട്ടുണ്ട്. നവംബർ 7 ന് ജിരിബാം ജില്ലയിലെ സൈറൗൺ ഗ്രാമത്തിലെ വീട്ടിൽ ഹ്മർ സമുദായത്തിൽ നിന്നുള്ള ഒരു സ്ത്രീയെ തീകൊളുത്തി കൊലപ്പെടുത്തിയതാണ് ഏറ്റവും പുതിയ അക്രമത്തിന് കാരണമായത്.
ചില മാധ്യമ റിപ്പോർട്ടുകൾ പ്രകാരം, ഒക്ടോബർ 1 നും നവംബർ 18 നും ഇടയിൽ കുറഞ്ഞത് 16 വ്യത്യസ്ത അക്രമ സംഭവങ്ങളെങ്കിലും റിപ്പോർട്ട് ചെയ്തിട്ടുണ്ട്. ഇത് കൊലപാതകങ്ങൾ, പരിക്കുകൾ, തീവെപ്പ്, കനത്ത വെടിവയ്പ്പ് എന്നിവയിൽ കലാശിച്ചു. നവംബർ 7 നും 18 നും ഇടയിൽ ജിരിബാമിൽ മാത്രം 20 പേരെങ്കിലും കൊല്ലപ്പെട്ടുവെന്നാണ് റിപ്പോർട്ട്.
കഴിഞ്ഞ വർഷം മെയ് 3 മുതൽ ഇംഫാൽ താഴ്വര ആസ്ഥാനമായുള്ള മെയ്തേയികളും വടക്കുകിഴക്കൻ സംസ്ഥാനത്തെ കുന്നുകൾ കേന്ദ്രീകരിച്ചുള്ള കുക്കി-സോ ഗ്രൂപ്പുകളും തമ്മിലുള്ള വംശീയ ഏറ്റുമുട്ടലിൽ 200-ലധികം ആളുകൾ കൊല്ലപ്പെടുകയും ആയിരക്കണക്കിന് ആളുകൾ ഭവനരഹിതരാകുകയും ചെയ്തു. മണിപ്പൂരിൽ ഇൻ്റർനെറ്റ് നിരോധനം മൂന്ന് ദിവസത്തേക്ക് കൂടി നീട്ടി. മണിപ്പൂർ സർക്കാർ ഉത്തരവ് പ്രകാരം ഏഴ് ജില്ലകളിലെ മൊബൈൽ ഇൻ്റർനെറ്റ് സേവനങ്ങൾ മൂന്ന് ദിവസത്തേക്ക് കൂടി നിർത്തിവച്ചു.
ക്രമസമാധാന പ്രശ്നങ്ങൾ സൃഷ്ടിച്ചേക്കാവുന്ന ഉള്ളടക്കം സാമൂഹിക വിരുദ്ധർ പ്രചരിപ്പിക്കുന്നത് തടയാൻ, അക്രമം വർധിച്ച സാഹചര്യത്തിൽ ഭരണകൂടം നവംബർ 16-ന് രണ്ട് ദിവസത്തേക്ക് സേവനങ്ങൾ നിർത്തിവച്ചു. തിങ്കളാഴ്ച മുതൽ രണ്ട് ദിവസത്തേക്ക് കൂടിയാണ് നിരോധനം നീട്ടിയിരിക്കുന്നത്. നവംബർ 16 നാണ് ബ്രോഡ്ബാൻഡ്, മൊബൈൽ ഇൻ്റർനെറ്റ് സേവനങ്ങൾക്ക് ഭരണകൂടം നിരോധനം ഏർപ്പെടുത്തിയിരുന്നത്.