ആർട്ടിക്കിൾ 370 ബാനർ ഉയർത്തി ജമ്മു കശ്മീർ നിയമസഭയിൽ കയ്യാങ്കളി. ജയിലിൽ കഴിയുന്ന ബാരാമുള്ള ലോക്സഭാ എംപി എഞ്ചിനീയർ റാഷിദിന്റെ സഹോദരൻ ഖുർഷിദ് അഹമ്മദ് ഷെയ്ഖ് ആർട്ടിക്കിൾ 370 ന്റെ ബാനർ പ്രദർശിപ്പിച്ചതിനെ തുടർന്ന് ജമ്മു കശ്മീർ നിയമസഭ നാടകീയ രംഗങ്ങൾക്ക് സാക്ഷ്യം വഹിച്ചു. ഇത് ചില അംഗങ്ങൾ തമ്മിലുള്ള കയ്യാങ്കളിയിലേക്കും നയിച്ചു. ലാംഗേറ്റ് മണ്ഡലത്തെ പ്രതിനിധീകരിക്കുന്ന അവാമി ഇത്തേഹാദ് പാർട്ടി എംഎൽഎയായ ഖുർഷിദ് അഹമ്മദ് ഷെയ്ഖ് ബാനർ പ്രദർശിപ്പിച്ചതിനെ ബിജെപി നേതാവും നിയമസഭയിലെ പ്രതിപക്ഷ നേതാവുമായ സുനിൽ ശർമ എതിർത്തതിനെ തുടർന്നാണ് സംഘർഷം ഉടലെടുത്തത്. തുടർന്ന് സ്പീക്കർ അബ്ദുൾ റഹീം റാത്തർ സഭാനടപടികൾ തൽക്കാലത്തേക്ക് നിർത്തിവച്ചു.
ആറ് വർഷത്തെ ഇടവേളയ്ക്ക് ശേഷം തിങ്കളാഴ്ച മുതൽ ആരംഭിച്ച ജമ്മു കശ്മീരിലെ അഞ്ച് ദിവസത്തെ സമ്മേളനത്തിനിടെയാണ് ഈ സംഭവം അരങ്ങേറുന്നത്. ആർട്ടിക്കിൾ 370 റദ്ദാക്കിയതിനെതിരെ പീപ്പിൾസ് ഡെമോക്രാറ്റിക് പാർട്ടി എംഎൽഎ വഹീദ് പാറ പ്രമേയം അവതരിപ്പിക്കുകയും കേന്ദ്രഭരണ പ്രദേശത്തിന്റെ പ്രത്യേക പദവി പുനഃസ്ഥാപിക്കണമെന്ന് ആവശ്യപ്പെടുകയും ചെയ്തതിനെത്തുടർന്ന് സമ്മേളനത്തിന്റെ ആദ്യദിനവും അരാജകത്വത്തോടെയാണ് ആരംഭിച്ചത്.
മുൻ സംസ്ഥാനത്തിന്റെ പ്രത്യേക പദവി പുനഃസ്ഥാപിക്കുന്നതിന് ഭരണഘടനാപരമായ സംവിധാനം രൂപീകരിക്കാൻ കേന്ദ്രത്തോട് ആവശ്യപ്പെടുന്ന പ്രമേയം സഭ പാസാക്കിയതിന് പിന്നാലെ ബുധനാഴ്ചയും ബഹളമുണ്ടായി. കശ്മീർ അധിഷ്ഠിത പാർട്ടികൾ ഈ നീക്കത്തെ പ്രശംസിച്ചപ്പോൾ, പ്രതിപക്ഷമായ ബി.ജെ.പി ഇത് പിൻവലിക്കണമെന്ന് ആവശ്യപ്പെട്ടു. ഇത് പാർട്ടി അംഗങ്ങളുടെ പ്രതിഷേധത്തിന് കാരണമാവുകയും നടപടിക്രമങ്ങൾ പതിവായി തടസ്സപ്പെടുത്തുകയും ചെയ്തു.
പ്രത്യേക പദവി “ഏകപക്ഷീയമായി നീക്കം ചെയ്യുന്നതിൽ” ആശങ്ക പ്രകടിപ്പിക്കുന്ന പ്രമേയം ബഹള രംഗങ്ങൾക്കിടയിൽ സ്പീക്കർ വോയ്സ് വോട്ടിന് വെച്ചതിനാൽ ചർച്ച കൂടാതെ പാസായി. 2019 ഓഗസ്റ്റ് 5-ന്, കേന്ദ്രം ആർട്ടിക്കിൾ 370 റദ്ദാക്കി, ജമ്മു കശ്മീരിന്റെ പ്രത്യേക പദവി ഫലപ്രദമായി നീക്കം ചെയ്യുകയും ജമ്മു കശ്മീർ, ലഡാക്ക് എന്നി രണ്ട് കേന്ദ്രഭരണ പ്രദേശങ്ങളായി പുനഃസംഘടിപ്പിക്കുകയും ചെയ്തു. ആർട്ടിക്കിൾ 370 ജമ്മു കശ്മീരിന്റെ പ്രദേശത്തിന് പ്രത്യേക സ്വയംഭരണാവകാശം നൽകുന്ന ഭരണഘടനയിലെ വ്യവസ്ഥയായിരുന്നു. പ്രതിരോധം, വാർത്താവിനിമയം, വിദേശകാര്യം എന്നിവ ഒഴികെയുള്ള ആഭ്യന്തര കാര്യങ്ങളിൽ സംസ്ഥാനത്തിന് അതിന്റെതായ ഭരണഘടനയും പതാകയും സ്വയംഭരണാവകാശവും അനുവദിച്ചു.