സുപ്രീം കോടതിയിലെ കേസ് നിലനില്ക്കെ സംസ്ഥാനത്തിനുള്ള കടമെടുപ്പ് പരിധി ഉയര്ത്തണമെന്ന കേരളത്തിന്റെ ആവശ്യം പരിഗണിച്ച് കേന്ദ്രം. 13600 കോടി കടമെടുക്കാന് കേരളത്തിന് കേന്ദ്രം അനുമതി നല്കി. കേന്ദ്രം നിർദ്ദേശിച്ച 13600 കോടി സ്വീകാര്യമാണെന്ന് കേരളം കോടതിയിൽ അറിയിച്ചു. 15000 കോടി കൂടി വേണ്ടി വരുമെന്ന് കേരളം അറിയിച്ചു. ബാക്കി തുകയ്ക്ക് കേന്ദ്രവും കേരളവും ചർച്ച നടത്തണമെന്ന് കോടതി നിർദ്ദേശം നല്കി.
അതേസമയം കടമെടുപ്പ് പരിധിയിൽ സുപ്രീം കോടതി ഇടപെടരുതെന്ന് കേന്ദ്രം ആവശ്യപ്പെട്ടിട്ടുണ്ട്. കേരളത്തിന് അധിക വായ്പയ്ക്ക് അനുമതി നല്കണമെങ്കില് സുപ്രീം കോടതിയില് നല്കിയ ഹര്ജി പിന്വലിക്കണമെന്ന് കേന്ദ്രം നേരത്തെ പറഞ്ഞിരുന്നു. ഇതോടെയാണ് കേരളം കോടതിയെ സമീപിച്ചത്.
കേന്ദ്രം ഹർജി പിൻവലിക്കാൻ ആവശ്യപ്പെട്ടതിനെ ജസ്റ്റിസ് കെ.വി. വിശ്വനാഥൻ വിമർശിച്ചു. ഹർജി നല്കാനുള്ളത് എല്ലാവരുടെയും അവകാശമെന്ന് നിരീക്ഷിച്ചു. ഗുരുതര സാമ്പത്തിക പ്രതിസന്ധിയെന്ന് കേരളം സുപ്രീംകോടതിയിൽ വ്യക്തമാക്കി. പെൻഷൻ, ക്ഷാമബത്ത, ആനുകൂല്യങ്ങൾ തുടങ്ങിയവ നല്കാൻ പണമില്ല. ഓവർഡ്രാഫ്റ്റിൻറെ സാഹചര്യമാണുള്ളതെന്ന് കേരളം അറിയിച്ചു. ശമ്പളം നല്കാനുള്ള പണം മാത്രം കൈയ്യിലുണ്ടെന്നും കേരളം അറിയിച്ചു. കേരളത്തിന്റെ ഹർജിയിലെ എല്ലാ ആവശ്യങ്ങളും തീർപ്പാക്കാൻ സമയം എടുക്കുമെന്ന് സുപ്രിം കോടതി വ്യക്തമാക്കി. കോടതിക്ക് എത്ര ഇതിൽ ഇടപെടാൻ കഴിയും എന്നും പരിശോധിക്കുന്നുണ്ട്.
അതേസമയം കേരളത്തിന്റേയും കേന്ദ്രത്തിന്റേയും ധനക്കമ്മി താരതമ്യം ചെയ്യാനാകില്ലെന്ന നിലപാടാണ് കേന്ദ്രം സ്വീകരിച്ചത്. രണ്ടും വ്യത്യസ്തമാണ് .ചർച്ചയിൽ പോസിറ്റീവ് നിലപാടാണ് കേന്ദ്രം സ്വീകരിച്ചത്. കേരളത്തിലെ സാമ്പത്തിക പ്രതിസന്ധി പരിഹരിക്കുന്നത് പരിഗണിക്കണമെന്ന് കോടതി നിര്ദേശിച്ചു.
മുമ്പ് 13,600 കോടി വായ്പയെടുക്കാന് കൂടി അനുമതി നല്കാമെന്നും എന്നാല് കോടതിയില് നല്കിയ ഹര്ജി പിന്വലിക്കണമെന്നുമാണ് കേന്ദ്ര സര്ക്കാര് സത്യവാങ്മൂലത്തില് പറഞ്ഞിരുന്നത്. അതേസമയം ഈ നിലപാട് അംഗീകരിക്കാനാവില്ലെന്ന് ഉടൻ തന്നെ കേരളം കോടതിയിൽ അറിയിക്കുകയായിരുന്നു. അര്ഹതപ്പെട്ട വായ്പയ്ക്കാണ് അനുമതി തേടിയിരിക്കുന്നതെന്നും ഹര്ജി പിന്വലിക്കില്ലെന്നും സംസ്ഥാനം വ്യക്തമാക്കി. വിഷയത്തില് ചര്ച്ചയ്ക്ക് ഇനി കാര്യമില്ലെന്നും വിശദമായ വാദം കേള്ക്കണമെന്നും കേരളത്തിനു വേണ്ടി ഹാജരായ സീനിയര് അഭിഭാഷകന് കപില് സിബൽ ആവശ്യപ്പെട്ടു.
ഈ വിഷയത്തിൽ കേരളത്തിന്റെ വാദം മുഴുവന് ശരിയല്ലെന്നാണ് കേന്ദ്രത്തിന്റെ നിലപാട്. എന്നാൽ ഇരുപക്ഷത്തില് നിന്നും രാഷ്ട്രീയമല്ല, ഗൗരവമായ ചര്ച്ചകളാണ് പ്രതീക്ഷിക്കുന്നതെന്ന് സുപ്രീം കോടതി വ്യക്തമാക്കി. കൂടാതെ കടമെടുപ്പ് പരിധിയിൽ വീണ്ടും ചര്ച്ച നടത്തിക്കൂടെയെന്നും ജസ്റ്റിസ് കെ വി വിശ്വനാഥന് ചോദിച്ചു. എന്നാൽ അടിയന്തര ആവശ്യം കണക്കിലെടുക്കുകയാണ് വേണ്ടതെന്നും ഇനി അതിന്റെ ആവശ്യമില്ലെന്നും കേരളം നിലപാടറിയിച്ചു.
മുമ്പ് ധനമന്ത്രി കെ എന് ബാലഗോപാലിന്റെ നേതൃത്വത്തിലുള്ള ഉദ്യോഗസ്ഥ സംഘം കേന്ദ്ര ധനമന്ത്രാലയ ഉദ്യോഗസ്ഥരുമായി ചര്ച്ച നടത്തിയിരുന്നു. ഡല്ഹിയില് നടത്തിയ ചർച്ചയിൽ ധനകാര്യ സെക്രട്ടറി, സോളിസിറ്റര് ജനറല് ഉള്പ്പെടെ പങ്കെടുത്തിരുന്നു. കേന്ദ്രവും കേരളവും തമ്മില് ആദ്യം ചര്ച്ച നടത്തമെന്ന സുപ്രീം കോടതിയുടെ നിര്ദേശത്തിന് പിന്നാലെയാണ് സംസ്ഥാനം സമിതി രൂപീകരിച്ചത്.