ഉത്തര്പ്രദേശില് കോണ്ഗ്രസുമായുള്ള സഖ്യ ചര്ച്ചകള് പുരോഗമിക്കുകയാണെന്ന് സമാജ് വാദി പാര്ട്ടിഅധ്യക്ഷന് അഖിലേഷ് യാദവ് സ്ഥിരീകരിച്ചതിന് പിന്നാലെ വിവാദം ഉയരുന്നു. കോണ്ഗ്രസ് നേതാവ് പ്രിയങ്ക ഗാന്ധിയാണ് സംഭാഷണത്തിന് തുടക്കമിട്ടതെന്നും രാഹുല് ഗാന്ധിയുമായി വിഷയം ചര്ച്ച ചെയ്ത ശേഷം അഖിലേഷ് യാദവുമായി പ്രിയങ്ക സംസാരിച്ചുവെന്നും റിപോർട്ടുകൾ ഉണ്ട്. കോണ്ഗ്രസുമായുള്ള ബന്ധം വഷളായെന്നും സഖ്യം അവസാനിപ്പിച്ചെന്നുമുള്ള ഊഹാപോഹങ്ങള് ഒറ്റ പ്രതികരണത്തിലൂടെയാണ് സമാജ്വാദി പാര്ട്ടി അധ്യക്ഷന് അഖിലേഷ് യാദവ് തള്ളിക്കളഞ്ഞത്. ഉത്തര്പ്രദേശില് പാര്ട്ടിയുമായി സഖ്യം തുടരുകയാണെന്നും രാഹുല് ഗാന്ധിയുമായി തര്ക്കമില്ലെന്നും അദ്ദേഹം പറഞ്ഞു.
മൊറാദാബാദ് സീറ്റിനുള്ള ആവശ്യം കോണ്ഗ്രസ് ഉപേക്ഷിച്ച് പകരം സീതാപൂര്, ശ്രാവസ്തി, വാരണാസി എന്നിവ ആവശ്യപ്പെട്ടതിനെ തുടര്ന്നാണ് ചര്ച്ചകള് മുന്നോട്ട് നീങ്ങിയത്. അമേഠി, റായ്ബറേലി, പ്രയാഗ്രാജ്, വാരണാസി, മഹാരാജ്ഗഞ്ച്, ഡിയോറിയ, ബന്സ്ഗാവ്, സീതാപൂര്, അംറോഹ, ബുലന്ദ്ഷഹര്, ഗാസിയാബാദ്, കാണ്പൂര്, ഝാന്സി, ബരാബങ്കി, ഫത്തേപൂര് സിക്രി, സഹാറന്പൂര്, മഥുര എന്നീ സീറ്റുകളില് കോണ്ഗ്രസ് മത്സരിക്കും. സഖ്യം ഔദ്യോഗികമായി പ്രഖ്യാപിക്കാന് ഇരുപാര്ട്ടികളും ഉടന് വാര്ത്താസമ്മേളനം നടത്തിയേക്കും എന്നും റിപ്പോർട്ടുകൾ പുറത്തുവരുന്നു .
കഴിഞ്ഞ ദിവസം രാത്രി ഏറെ വൈകി നടന്ന ചര്ച്ചയില് ഫലം കാണാത്തതിനെ തുടര്ന്ന് ഇരുപാർട്ടികളും തമ്മിലുള്ള സീറ്റ് വിഭജന ചര്ച്ച നിര്ത്താന് തീരുമാനിച്ചതായി അഭ്യൂഹങ്ങളുണ്ടായിരുന്നു. മുതിര്ന്ന കോണ്ഗ്രസ് നേതാവ് ജയറാം രമേശിന്റെ പ്രസ്താവനയ്ക്ക് തൊട്ടുപിന്നാലെയാണ് ചര്ച്ചകള് പരാജയപ്പെട്ടെന്ന വിവരം പുറത്തുവന്നത്.സീറ്റ് വിഭജനം സംബന്ധിച്ച ചര്ച്ചകള് അന്തിമഘട്ടത്തിലാണെന്ന് ജയറാം രമേശ് അവകാശപ്പെട്ടിരുന്നു.എസ്പിയും കോണ്ഗ്രസും സഖ്യം സംബന്ധിച്ച കാര്യത്തില് അനുകൂല നിലപാടിലാണെന്നും ചര്ച്ചകള് നല്ല അന്തരീക്ഷത്തിലാണ് നടക്കുന്നതെന്നും അദ്ദേഹം പറഞ്ഞിരുന്നു.സീറ്റ് പ്രശ്നം ഉടന് പരിഹരിക്കുമെന്നുഅദ്ദേഹം അവകാശപ്പെട്ടിരുന്നു.
17 ലോക്സഭാ സീറ്റുകളെന്ന അന്തിമ വാഗ്ദാനം എസ്പി കോണ്ഗ്രസിന് നല്കിയിരുന്നു. ഇതിൽ കൂടുതൽ സീറ്റുകള് കോണ്ഗ്രസിന് നല്കാന് കഴിയില്ലെന്നും എസ്പി തുറന്നടിച്ചു. റായ്ബറേലിയിലോ അമേഠിയിലോ നടക്കുന്ന രാഹുല് ഗാന്ധിയുടെ സന്ദര്ശനത്തില് അഖിലേഷ് യാദവും പങ്കെടുക്കുമെന്നാണ് വിലയിരുത്തിയിരുന്നത്. രാഹുലിന്റെ യാത്ര അമേഠിയിലെത്തിയ ദിവസമാണ്, സഖ്യം രൂപീകരിക്കുന്നത് വരെ ഈ യാത്രയില് പങ്കെടുക്കില്ലെന്ന് അഖിലേഷ് തുറന്നടിച്ചത്.