75-ാമത് റിപ്പബ്ലിക് ദിനാഘോഷത്തിനൊരുങ്ങുകയാണ് രാജ്യം. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ആണ് റിപ്പബ്ലിക് ദിനാഘോഷത്തിലെ മുഖ്യാതിഥി. രണ്ട് ദിവസത്തെ സന്ദർശനത്തിനായെത്തുന്ന മാക്രോൺ രാജസ്ഥാനിലെ ജയ്പൂരിലേക്ക് പോവും. തുടർന്ന് ജന്തർമന്ദറിലേക്ക് പോകുന്ന അദ്ദേഹം അവിടെ പ്രധാനമന്ത്രി നരേന്ദ്ര മോദിയെ കാണും. പ്രധാനമന്ത്രി മോദിയും മാക്രോണും ജന്തർ മന്തറിൽ നിന്ന് സംഗനേരി ഗേറ്റിലേക്ക് സംയുക്ത റോഡ് ഷോ നടത്തും. കരകൗശല വിദഗ്ധർ, ഇൻഡോ-ഫ്രഞ്ച് സാംസ്കാരിക പദ്ധതികളിലെ പങ്കാളികൾ, വിദ്യാർത്ഥികൾ എന്നിവരുമായി ഇരുനേതാക്കളും സംവദിക്കും.
പരേഡിന് ശേഷം മാക്രോൺ ഫ്രഞ്ച് എംബസി സന്ദർശിച്ച് അവിടത്തെ ജീവനക്കാരുമായി സംവദിക്കും. വൈകുന്നേരം, അദ്ദേഹം രാഷ്ട്രപതി ഭവനിൽ ‘അറ്റ് ഹോം’ ചടങ്ങിൽ പങ്കെടുക്കും. ഇന്ത്യയും ഫ്രാൻസും തമ്മിലുള്ള തന്ത്രപ്രധാനമായ പങ്കാളിത്തത്തിന്റെ 25-ാം വാർഷിക ആഘോഷങ്ങൾക്കാണ് മാക്രോണിന്റെ സന്ദർശനം. പ്രതിരോധ, തന്ത്രപ്രധാന മേഖലകളിൽ ഇരുപക്ഷവും പ്രധാന പ്രഖ്യാപനങ്ങൾ നടത്താൻ സാധ്യതയുണ്ട്. പ്രതിരോധം, സുരക്ഷ, ശുദ്ധ ഊർജം, വ്യാപാരം, നിക്ഷേപം, പുതിയ സാങ്കേതിക വിദ്യകൾ തുടങ്ങി ഇരു രാജ്യങ്ങളും തമ്മിലുള്ള ബന്ധത്തിൽ അതിവേഗം ഉയർച്ചയുണ്ടായ സാഹചര്യത്തിലാണ് റിപ്പബ്ലിക് ദിനാഘോഷത്തിന് മാക്രോണിന് ക്ഷണം ലഭിച്ചത്.
ഇരു നേതാക്കളും ഹവാ മഹലും തുടർന്ന് ചരിത്രപ്രസിദ്ധമായ ആൽബർട്ട് ഹാൾ മ്യൂസിയം സന്ദർശിക്കും. രാംബാഗ് കൊട്ടാരത്തിൽ പ്രധാനമന്ത്രി മോദി മാക്രോണിന് സ്വകാര്യ അത്താഴം നൽകും. അതിനുശേഷം ഫ്രഞ്ച് പ്രസിഡന്റ് റിപ്പബ്ലിക് ദിന പരേഡിനായി ഡൽഹിയിലേക്ക് പോകും. ഡൽഹിയിൽ കർത്തവ്യ പാതയിൽ നടക്കുന്ന റിപ്പബ്ലിക് ദിന പരേഡിൽ മുഖ്യാതിഥിയായി മാക്രോൺ പങ്കെടുക്കും. ഈ വർഷത്തെ റിപ്പബ്ലിക് ദിന പരേഡിൽ ഫ്രഞ്ച് സൈന്യത്തിൽ നിന്നുള്ള ഒരു സംഘം പങ്കെടുക്കുന്നുണ്ട്.
റിപ്പബ്ലിക് ദിന പരേഡില് മുഖ്യാതിഥിയായി പങ്കെടുക്കുന്ന ആറാമത്തെ ഫ്രഞ്ച് നേതാവാണ് മാക്രോണ്. മുന് ഫ്രഞ്ച് പ്രധാനമന്ത്രി ജാക്വസ് ചിറാക്ക് 1976ലും 1998ലും രണ്ട് തവണ പരിപാടിയില് പങ്കെടുത്തിട്ടുണ്ട്. മുന് പ്രസിഡന്റുമാരായ വലേരി ഗിസ്കാര്ഡ് ഡി എസ്റ്റിംഗ്, നിക്കോളാസ് സര്ക്കോസി, ഫ്രാന്സ്വാ ഹോളണ്ട് എന്നിവര് യഥാക്രമം 1980, 2008, 2016 വര്ഷങ്ങളില് ആഘോഷങ്ങളില് പങ്കെടുത്തു. 2023ലെ റിപ്പബ്ലിക് ദിനാഘോഷത്തില് ഈജിപ്ത് പ്രസിഡന്റ് അബ്ദുല് ഫത്താഹ് അല് സിസി മുഖ്യാതിഥിയായിരുന്നു. ഇത്തവണ അമേരിക്കൻ പ്രസിഡന്റ് ജോ ബൈഡനെ മുഖ്യാതിഥിയായി ക്ഷണിച്ചിരുന്നുവെങ്കിലും ജനുവരിയിൽ ന്യൂഡൽഹി സന്ദർശിക്കാൻ സാധിക്കില്ലെന്ന് അദ്ദേഹം അറിയിക്കുകയായിരുന്നു. ഇതേ തുടർന്നാണ് മാക്രോണിനെ റിപ്പബ്ലിക് ദിന മുഖ്യാതിഥിയായി ക്ഷണിച്ചത്
ഈ വര്ഷത്തെ റിപ്പബ്ലിക് ദിന പരേഡില് പ്രതിരോധ സേനയിലെ രണ്ട് വനിതാ സംഘങ്ങള് പങ്കെടുക്കുന്നുണ്ട്. 144 പേര് അടങ്ങുന്ന ഒരു സംഘത്തില് വനിതാ സൈനികര് അണിനിരക്കും. അറുപത് പേര് കരസേനയില് നിന്നും ബാക്കിയുള്ളവര് വ്യോമസേനയില് നിന്നും നാവിക സേനയില് നിന്നുമുള്ളവരായിരിക്കും. നാവികസേനയിലെയും വ്യോമസേനയിലെയും വനിതാ അഗ്നിവീര് സൈനികരും ഈ സംഘത്തില് ഉള്പ്പെടും. ആംഡ് ഫോഴ്സ് മെഡിക്കല് സര്വീസസ് ഡയറക്ടറേറ്റ് ജനറലില് നിന്നുള്ള രണ്ടാമത്തെ സംഘത്തില് വനിതാ ഡോക്ടര്മാരുടെ നേതൃത്വത്തിലുള്ള സൈനിക നഴ്സുമാര് ഉള്പ്പെടുമെന്നാണ് വിവരം