രാമ ക്ഷേത്ര നിർമ്മാണത്തോട് അനുബന്ധിച്ച് ഇന്ന് ഉദ്ഘാടനം ചെയ്യുന്ന അയോധ്യയിലെ വിമാനത്താവളം ഇനി അറിയപ്പെടുന്നത് ഇതിഹാസ കവി വാല്മീകിയുടെ പേരിൽ ആയിരിക്കും. വിമാനത്താവളത്തിൻ്റെ പേര് ‘മഹർഷി വാല്മീകി അന്താരാഷ്ട്ര വിമാനത്താവളം അയോധ്യധാം’ എന്ന് പുനർനാമകരണം ചെയ്തതായി അധികൃതർ അറിയിച്ചു. ഇതിഹാസമായ രാമായണത്തിൻ്റെ രചയിതാവായ വാൽമീകിയുടെ പേരാണ് വിമാനത്താവളത്തിന് നൽകിയിരിക്കുന്നത്. നേരത്തെ ഈ വിമാനത്താവളത്തിൻ്റെ പേര് ‘മര്യാദ പുർഷോത്തം ശ്രീറാം അയോധ്യ ഇൻ്റർനാഷണൽ എയർപോർട്ട്’ എന്നായിരുന്നു.
ഇന്ന് പ്രധാനമന്ത്രി നരേന്ദ്ര മോദിയാണ് പുതുതായി നിർമ്മിച്ച വിമാനത്താവളം ഉദ്ഘാടനം ചെയ്യുന്നത്. വിമാനത്താവളത്തിൻ്റെ ആദ്യഘട്ട നിർമാണത്തിന് ഏകദേശം 1450 കോടി രൂപയാണ് ചെലവ് കണക്കാക്കുന്നത്. 6,500 ചതുരശ്ര മീറ്റർ വിസ്തൃതിയുള്ള പുതിയ ടെർമിനൽ കെട്ടിടത്തിൽ തിരക്കേറിയ സമയങ്ങളിൽ 600 യാത്രക്കാരെ ഉൾക്കൊള്ളാൻ കഴിയുന്ന തരത്തിലാണ് രൂപകൽപ്പന ചെയ്തിരിക്കുന്നത്, പ്രതിവർഷം 10 ലക്ഷം യാത്രക്കാരെ വിമാനത്താവളത്തിന് ഉൾക്കൊള്ളാൻ കഴിയും. 2024 ജനുവരി 22 നാണ് അയോധ്യയിൽ നിർമ്മിച്ചു കൊണ്ടിരിക്കുന്ന രാമ ക്ഷേത്രത്തിൽ മഹാപ്രതിഷ്ഠാ ചടങ്ങുകൾ നടക്കുന്നത്.
ഉദ്ഘാടന ദിവസമായ ഇന്ന് ഇൻഡിഗോയും എയർ ഇന്ത്യ എക്സ്പ്രസും ആയിരിക്കും അയോധ്യയിലെ വാല്മീകി ഇൻറർനാഷണൽ എയർപോർട്ടിലേക്ക് ആദ്യ വിമാന സർവീസുകൾ നടത്തുക. 2024 ജനുവരിയിൽ ഡൽഹി, മുംബൈ, അഹമ്മദാബാദ് എന്നിവിടങ്ങളിൽ നിന്ന് അയോധ്യയിലേക്ക് വിമാന സർവീസുകൾ ഉണ്ടാകുമെന്ന് രണ്ട് എയർലൈനുകളും ഇതിനകംതന്നെ പ്രഖ്യാപിച്ചിട്ടുണ്ട്.