രാമക്ഷേത്രത്തിലെ പ്രതിഷ്ഠാ ചടങ്ങിന് മുന്നോടിയായി പ്രധാനമന്ത്രി നരേന്ദ്ര മോദി നാളെ അയോദ്ധ്യ ക്ഷേത്രനഗരിയിലെത്തും. നാളെ ഡിസംബര് 30 ന് ക്ഷേത്രനഗരിയിലെത്തുന്ന പ്രധാനമന്ത്രി നരേന്ദ്ര മോദി വിമാനത്താവളം ഉദ്ഘാടനം ചെയ്യും. ഇതോടെ പുതുതായി നിര്മ്മിച്ച മര്യാദ പുര്ഷോത്തം ശ്രീറാം അയോധ്യ അന്താരാഷ്ട്ര വിമാനത്താവളം ക്ഷേത്ര നഗരത്തിലേക്കുള്ള പ്രധാന കവാടമായി മാറും. 2024 ജനുവരി 22 നാണ് അയോധ്യയിൽ നിർമ്മിച്ചു കൊണ്ടിരിക്കുന്ന രാമ ക്ഷേത്രത്തിൽ മഹാപ്രതിഷ്ഠാ ചടങ്ങുകൾ നടക്കുന്നത്.
തുടര്ന്ന് അയോധ്യയില് പുനര്നിര്മ്മിച്ച റെയില്വേ സ്റ്റേഷന്റെ ഉദ്ഘാടനവും പ്രധാനമന്ത്രി നടത്തും. ഇതിന് പിന്നാലെ അദ്ദേഹം റോഡ് ഷോയില് പങ്കെടുക്കും. പൊതുയോഗത്തില് അദ്ദേഹം ജനങ്ങളെ അഭിസംബോധന ചെയ്യുമെന്നും അറിയിച്ചിട്ടുണ്ട്. യു.പിയിൽ 15,700 കോടിയിലധികം രൂപയുടെ ഒന്നിലധികം വികസന പദ്ധതികളുടെ ഉദ്ഘാടനവും പ്രധാനമന്ത്രി നിർവ്വഹിക്കും. ഉദ്ഘാടന ദിവസം ഇൻഡിഗോയും എയർ ഇന്ത്യ എക്സ്പ്രസും ആയിരിക്കും അയോധ്യയിലെ വാല്മീകി ഇൻറർനാഷണൽ എയർപോർട്ടിലേക്ക് ആദ്യ വിമാന സർവീസുകൾ നടത്തുക. 2024 ജനുവരിയിൽ ഡൽഹി, മുംബൈ, അഹമ്മദാബാദ് എന്നിവിടങ്ങളിൽ നിന്ന് അയോധ്യയിലേക്ക് വിമാന സർവീസുകൾ ഉണ്ടാകുമെന്ന് രണ്ട് എയർലൈനുകളും ഇതിനകംതന്നെ പ്രഖ്യാപിച്ചിട്ടുണ്ട്.
അയോധ്യ വിമാനത്താവളത്തിന്റെ ആദ്യഘട്ട നിര്മാണത്തിന് ഏകദേശം 350 കോടി രൂപയാണ് ചെലവ് കണക്കാക്കുന്നത്. 6,500 ചതുരശ്ര മീറ്റര് വിസ്തൃതിയുള്ള പുതിയ ടെര്മിനല് കെട്ടിടം ഒരേസമയം 600 യാത്രക്കാര്ക്ക് ഉള്ക്കൊള്ളാന് കഴിയുന്ന തരത്തിലാണ് രൂപകല്പ്പന ചെയ്തിരിക്കുന്നത്. പ്രതിവര്ഷം 10 ലക്ഷം യാത്രക്കാരെ കൈകാര്യം ചെയ്യാനാകും. തിരക്കേറിയ സമയങ്ങളില് 3,000 യാത്രക്കാരെയും പ്രതിവര്ഷം 60 ലക്ഷം യാത്രക്കാരെയും കൈകാര്യം ചെയ്യാന് ശേഷിയുള്ള 50,000 ചതുരശ്ര മീറ്റര് വിസ്തൃതിയുള്ള പുതിയ ടെര്മിനല് കെട്ടിടത്തിന്റെ നിര്മ്മാണം രണ്ടാം ഘട്ട വികസനത്തില് ഉള്പ്പെടുമെന്ന് വൃത്തങ്ങള് അറിയിച്ചു. കോഡ് ഇ ബി-777 തരം വിമാനങ്ങള്, സമാന്തര ടാക്സി ട്രാക്ക്, 18 എയര്ക്രാഫ്റ്റ് പാര്ക്കിംഗ് സ്റ്റാന്ഡുകള്ക്കായി ആപ്രോണ് എന്നിവ ഉള്ക്കൊള്ളുന്നതിനായി 3,750 മീറ്റര് വരെ റണ്വേ നീട്ടലും ഈ ഘട്ടത്തില് ഉള്പ്പെടുന്നു.
അസുരരാജാവായ രാവണനെതിരെയുള്ള വിജയകരമായ യുദ്ധത്തിന് ശേഷം ശ്രീരാമന്റെ അയോധ്യയിലേക്കുള്ള തിരിച്ചുവരവിനെ വിളിച്ചോതുന്നതും രാമക്ഷേത്രത്തിന്റെ ആത്മാവിനെ പ്രതിഫലിപ്പിക്കുന്നതുമാണ് പുതിയ വിമാനത്താവളത്തിന്റെ പിന്നിലെ ആശയം ലക്ഷ്യമിടുന്നതെന്ന് എയര്പോര്ട്ട് വൃത്തങ്ങള് അറിയിച്ചു. ടെര്മിനല് കെട്ടിടത്തിന്റെ മേല്ക്കൂര വ്യത്യസ്ത ഉയരങ്ങളിലുള്ള ശിഖരങ്ങളാല് അലങ്കരിച്ചിരിക്കുന്നു. ടെര്മിനലില് രാമായണ ഇതിഹാസത്തിലെ പ്രധാന സംഭവങ്ങളെ വിശദീകരിക്കുന്ന അലങ്കാരങ്ങളും ഒരുക്കിയിട്ടുണ്ട്. ശ്രീരാമന്റെ കഥ വിഷ്വല് ആയി വിവരിക്കുന്നതിനാല് തൂണുകള്ക്കിടെയിലൂടെയുള്ള നടത്തം യാത്രക്കാര്ക്ക് ആഴത്തിലുള്ള അനുഭവം നല്കുമെന്ന് എയര്പോര്ട്ട് അധികൃതര് പറഞ്ഞു. കൂടാതെ, ടെര്മിനലില് അയോധ്യയിലെ കൊട്ടാരത്തിന്റെ അന്തരീക്ഷം പുനര്നിര്മ്മിക്കാനും ലക്ഷ്യമിടുന്നു.