തമിഴ് സാഹിത്യവും വായനയും പ്രോത്സാഹിപ്പിക്കാൻ ഇക്കുറിയും ഷാർജ അന്താരാഷ്ട്ര പുസ്തകോത്സവത്തിൽ നിറസാന്നിധ്യമായി തമിഴ് പ്രസാധകരും എത്തി. ഇന്ത്യൻ ഭാഷകളിൽ മലയാളം പുസ്തകങ്ങളാണ് ഏറ്റവും കൂടുതൽ മേളക്ക് എത്തിയിട്ടുള്ളതെങ്കിലും തമിഴ് സാന്നിധ്യം അറിയിക്കാൻ ഒരുങ്ങുകയാണ് പ്രസാധകർ.
കഴിഞ്ഞ വർഷം 3 തമിഴ് പ്രസാധകർ ആണ് എത്തിയിരുന്നത്. 4 സ്റ്റാളുകളും ഉണ്ടായിരുന്നു. എന്നാൽ ഇക്കുറി 7 പ്രസാധകരുമായി 8 സ്റ്റാളുകളിലാണ് തമിഴ്പുസ്തകങ്ങൾ സജ്ജമാക്കിയിരിക്കുന്നത്. നാഗർകോവിൽ ആസ്ഥാനമായ കാലച്ചുവട് പബ്ലിക്കേഷൻസും ഷാർജ അന്താരാഷ്ട്ര പുസ്തകമേളയിൽ തമിഴ് പുസ്തകങ്ങളുമായി സാന്നിധ്യം അറിയിക്കാൻ എത്തിയിട്ടുണ്ട്. തമിഴ് സംസ്കാരവും സാഹിത്യവും വായനയും പ്രോത്സാഹിപ്പിക്കാൻ പുസ്തകമേള മികച്ച അവസരമാണ് ഒരുക്കുന്നതെന്ന് കാലച്ചുവട് പബ്ലിക്കേഷൻസിലെ മൈഥിലി സുന്ദരം പറഞ്ഞു. ഇക്കുറി കൂടുതൽ വായനക്കാർ എത്തുമെന്നാണ് പ്രതീക്ഷയെന്നും മൈഥിലി സുന്ദരം പറഞ്ഞു. എല്ലാത്തരത്തിലുമുള്ള പുസ്തകങ്ങളുമായാണ് പ്രസാധകർ എത്തിയിട്ടുള്ളതെന്നും കുട്ടികൾക്കും മുതിർന്നവർക്കുമായി സാഹിത്യം, കഥകൾ, കവിതകൾ, നോവൽ തുടങ്ങി വിവിധ പുസ്തകങ്ങളും ലഭ്യമാണെന്നും മൈഥിലി പറഞ്ഞു. തമിഴ് വായനക്കരുടെ എണ്ണം കൂടിയിട്ടുണ്ടെന്നും ആളുകളിൽ വായനയോടുള്ള ഇഷ്ടം കൂടിയതായാണ് മനസ്സിൽ ആക്കാൻ സാധിക്കുന്നതിനും അവർ പറഞ്ഞു. 40 വർഷമായി ചെന്നൈയിൽ നടക്കുന്ന പുസ്തകമേളയിൽ ഇത് പ്രകടമാണെന്നും ദശലക്ഷക്കണക്കിന് തമിഴ് പുസ്തകങ്ങൾ ആണ് വിറ്റുപോവുന്നതെന്നും അവർ പറഞ്ഞു. തമിഴ്വായനക്കാരെ ഏവരെയും ഷാർജയിലേക്കും സ്വാഗതം ചെയ്യുന്നതായും ഏവർക്കും ആവശ്യമായ എല്ലാതരം പുസ്തകങ്ങളും ലഭ്യമാണെന്നും മൈഥിലി കൂട്ടിച്ചേർത്തു.
108 രാജ്യങ്ങളിൽ നിന്ന് 2,033 പ്രസാധകരുടെ വിവിധ ഭാഷകളിലെ 15ലക്ഷം പുസ്തകങ്ങളാണ് മേളക്കെത്തിയിരിക്കുന്നത്. 1043 അറബ് പ്രസാധകരും 990 അന്താരാഷ്ട്ര പ്രസാധകരും ഇക്കുറി മേളക്കെത്തിയിട്ടുണ്ട്. അന്താരാഷ്ട്ര പ്രസാധകരുടെ എണ്ണത്തിൽ ഇത്തവണ വർധനയുണ്ട്. ഏറ്റവും കൂടുതൽ പ്രസാധകർ യു.എ.ഇയിൽ നിന്നാണ്. ദക്ഷിണ കൊറിയയാണ് ഇത്തവണ മേളയുടെ അഥിതി രാജ്യം.
സുപ്രീംകൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ആണ് മേള ഉദ്ഘാടനം ചെയ്തത്. ഷെയ്ഖ് സുൽത്താൻ കൊറിയൻ പവലിയനും സന്ദർശിച്ചു. അറബി ഭാഷയുടെ പരിണാമം വിവരിക്കുന്ന പുതിയ പുസ്തകങ്ങളുടെ പ്രകാശനവും പുസ്തകമേളയുടെ ഉദ്ഘാടന ചടങ്ങിൽ നടന്നു. മേളയുടെ ദിവസങ്ങളിൽ ആകെ 1,700 പരിപാടികളും വിവിധ വിഷയങ്ങളിലെ ശിൽപശാലകളും നടക്കും. 460 സാംസ്കാരിക പരിപാടികൾ അരങ്ങേറും. ലോകത്തെ 69രാജ്യങ്ങളിൽ നിന്നായി 215 മുഖ്യാഥിതികളാണ് പുസ്തകോൽസവ വേദിയിലെത്തുക. നവംബർ 12 വരെ നീളുന്ന മേളയിൽ മലയാളത്തിൽ നിന്നടക്കം പ്രശസ്ത എഴുത്തുകാരും ജനപ്രതിനിധികളും പ്രസാധകരും പങ്കെടുക്കും.