ഓരോ വർഷവും മുൻപത്തെ വർഷത്തേക്കാൾ കൂടുതൽ പുസ്തകങ്ങൾ വിറ്റുപോവുന്ന അവസ്ഥയാണ് ഉള്ളതെന്നും ഇക്കുറിയും പുസ്തകപ്രേമികളുടെ ഒഴുക്ക് പുസ്തക മേളയുടെ 42ാം എഡിഷനിൽ കാണാനാകുമെന്നാണ് കരുതുന്നതെന്നും പ്രസാധകർ പറയുന്നു.
ഈ വർഷം ഇന്ത്യൻ പ്രസാധകർ കൂടുതൽ എത്തിയിട്ടുണ്ടെന്നും കൂടുതൽ വായനക്കരെ പ്രതീക്ഷിക്കുന്നതായും ചിന്ത പബ്ലിക്കേഷൻ പ്രതിനിധിയും ഇടതുപക്ഷസഹയാത്രികനുമായ വാഹിദ് നാട്ടിക പറഞ്ഞു. ചിന്ത പബ്ലിക്കേഷൻ ഇക്കുറി പന്ത്രണ്ടാമത്തെ എഡിഷൻ ആന്നെന്നും ചിന്തയുടെ സ്റ്റാളുകൾ തേടി ആളുകൾ എത്തിത്തുടങ്ങിയെന്നും അദ്ദേഹം പറഞ്ഞു. “വെറുപ്പിന്റെ ശരീരശാസ്ത്രം” എന്ന പുസ്തകത്തിന് ആവശ്യക്കാർ കൂടുതൽ ആണെന്നും പലരും നേരത്തെ തന്നെ ആവശ്യപ്പെട്ടിട്ടുണ്ടെന്നും വാഹിദ് നാട്ടിക പറഞ്ഞു. ചിന്തയിലേക്ക് ഏറെ പേർ പുസ്തകം അന്വേഷിച്ച് വരുന്നതായും അദ്ദേഹം പറഞ്ഞു. ഇക്കുറിയും നല്ല രീതിയിൽ പുസ്തകങ്ങൾ വിറ്റുപോവുമെന്നാണ് പ്രതീക്ഷ എന്നും അദ്ദേഹം കൂട്ടിച്ചേർത്തു. ഈ വർഷം മുപ്പത്തിമൂന്നോളം പുതിയ പുസ്തകങ്ങൾ വന്നിട്ടുണ്ടെന്നും കേരളത്തിലെ നവോദനചരിത്രത്തിന്റെ പുസ്തകം, പുരോഗമന സാഹിത്യ ഗ്രന്ഥങ്ങൾ, നോവലുകൾ, കവിതകൾ അങ്ങനെ എല്ലാതരം പുസ്തകങ്ങൾ ഇണ്ടെന്നും കുട്ടികൾക്ക് വേണ്ട എല്ലാ പുസ്തകങ്ങളും ലഭ്യമാണെന്നും വാഹിദ് നാട്ടിക പറഞ്ഞു. സി പി എം സംസ്ഥാന കമ്മിറ്റി അംഗം പി ജയരാജൻ ആണ് ചിന്ത സ്റ്റാൾ ഉത്‌ഘാടനം ചെയ്തത്.
108 രാജ്യങ്ങളിൽ നിന്ന് 2,033 പ്രസാധകരുടെ വിവിധ ഭാഷകളിലെ 15ലക്ഷം പുസ്തകങ്ങളാണ് മേളക്കെത്തിയിരിക്കുന്നത്. 1043 അറബ് പ്രസാധകരും 990 അന്താരാഷ്ട്ര പ്രസാധകരും ഇക്കുറി മേളക്കെത്തിയിട്ടുണ്ട്. അന്താരാഷ്ട്ര പ്രസാധകരുടെ എണ്ണത്തിൽ ഇത്തവണ വർധനയുണ്ട്. ഏറ്റവും കൂടുതൽ പ്രസാധകർ യു.എ.ഇയിൽ നിന്നാണ്. ദക്ഷിണ കൊറിയയാണ് ഇത്തവണ മേളയുടെ അഥിതി രാജ്യം.
സുപ്രീംകൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ആണ് മേള ഉദ്ഘാടനം ചെയ്തത്. ഷെയ്ഖ് സുൽത്താൻ കൊറിയൻ പവലിയനും സന്ദർശിച്ചു. അറബി ഭാഷയുടെ പരിണാമം വിവരിക്കുന്ന പുതിയ പുസ്തകങ്ങളുടെ പ്രകാശനവും പുസ്തകമേളയുടെ ഉദ്ഘാടന ചടങ്ങിൽ നടന്നു. മേളയുടെ ദിവസങ്ങളിൽ ആകെ 1,700 പരിപാടികളും വിവിധ വിഷയങ്ങളിലെ ശിൽപശാലകളും നടക്കും. 460 സാംസ്കാരിക പരിപാടികൾ അരങ്ങേറും. ലോകത്തെ 69രാജ്യങ്ങളിൽ നിന്നായി 215 മുഖ്യാഥിതികളാണ് പുസ്തകോൽസവ വേദിയിലെത്തുക. നവംബർ 12 വരെ നീളുന്ന മേളയിൽ മലയാളത്തിൽ നിന്നടക്കം പ്രശസ്ത എഴുത്തുകാരും ജനപ്രതിനിധികളും പ്രസാധകരും പങ്കെടുക്കും.