ഇന്ത്യ-കാനഡ നയതന്ത്ര തര്ക്കത്തിനിടെ കാനഡയ്ക്ക് അനുകൂല നിലപാടുമായി ന്യൂസിലാന്ഡ്. 41 കനേഡിയന് നയതന്ത്ര ഉദ്യോഗസ്ഥരെ തിരിച്ചയക്കാനുള്ള ഇന്ത്യയുടെ നീക്കത്തില് ആശങ്കയുണ്ടെന്ന് ന്യൂസിലന്ഡ് പ്രതികരിച്ചു. കഴിഞ്ഞയാഴ്ച അമേരിക്കയില് നടന്ന ‘ഫൈവ് ഐസ്’ മീറ്റിംഗിന് ശേഷമാണ് ന്യൂസിലന്ഡും ഇന്ത്യയെ വിമര്ശിച്ച് രംഗത്തെത്തിയത്. ഓസ്ട്രേലിയ, കാനഡ, അമേരിക്ക, ബ്രിട്ടന്, ന്യൂസിലാന്ഡ് എന്നിവയാണ് ഫൈവ് ഐസിലെ അംഗരാജ്യങ്ങള്. ഇവര് പരസ്പരം പ്രധാനപ്പെട്ട രഹസ്യാന്വേഷണ വിവരങ്ങള് പങ്കുവെക്കുകയും സുരക്ഷാ കാര്യങ്ങളില് സഹകരിക്കുകയും ചെയ്യുന്നു.
നേരത്തെ അമേരിക്കയും ബ്രിട്ടനും കാനഡയെ പിന്തുണച്ച് രംഗത്തെത്തിയിരുന്നു. നേരത്തെ കനേഡിയന് പ്രധാനമന്ത്രി ജസ്റ്റിന് ട്രൂഡോ ഇന്ത്യയ്ക്കെതിരെ ഗുരുതര ആരോപണങ്ങള് ഉന്നയിച്ചപ്പോഴും ന്യൂസിലന്ഡ് ഒരു തരത്തിലുള്ള അഭിപ്രായപ്രകടനവും നടത്തിയിരുന്നില്ല. ഇരുരാജ്യങ്ങളും തമ്മിലുള്ള നയതന്ത്ര തര്ക്കത്തില് കാനഡയെ പരസ്യമായി പിന്തുണയ്ക്കാത്ത ഏക ഫൈവ് എസ് രാജ്യവും ന്യൂസിലന്ഡായിരുന്നു.
കനേഡിയന് സിഖ് ഭീകരന് ഹര്ദീപ് സിംഗ് നിജ്ജാറിന്റെ കൊലപാതകത്തില് ഇന്ത്യന് ഏജന്റുമാര്ക്ക് പങ്കുണ്ടെന്ന പ്രധാനമന്ത്രി ജസ്റ്റിന് ട്രൂഡോയുടെ അവകാശവാദങ്ങള്ക്ക് പിന്നാലെയാണ് ഉഭയകക്ഷി ബന്ധം വഷളായത്. ഇതിന്റെ പശ്ചാത്തലത്തില് ഏകപക്ഷീയമായി പദവി റദ്ദാക്കുമെന്ന ഇന്ത്യയുടെ ഭീഷണിയെ തുടര്ന്ന് 41 നയതന്ത്ര ഉദ്യോഗസ്ഥരെ കാനഡ പിന്വലിച്ചു. ഇതിന് പിന്നാലെയാണ് യുകെയുടെ പ്രതികരണം. എന്നാല് നയതന്ത്രജ്ഞനെ പിന്വലിക്കുന്നതുമായി ബന്ധപ്പെട്ട ആരോപണങ്ങള് ഇന്ത്യന് വിദേശകാര്യ മന്ത്രാലയം (എംഇഎ) തള്ളിക്കളഞ്ഞു. ഇത് വിയന്ന കണ്വെന്ഷന്റെ തീരുമാനങ്ങളെ ലംഘിച്ചെന്ന വാദവും ഇന്ത്യ നിരസിച്ചു. ഇതിനിടെ നയതന്ത്രജ്ഞരെ പിന്വലിച്ചതിനെക്കുറിച്ചുള്ള കനേഡിയന് വിദേശകാര്യ മന്ത്രി മെലാനി ജോളിയുടെ പ്രതികരണത്തെ ഇന്ത്യ അപലപിച്ചു. ‘സമത്വം നടപ്പാക്കുന്നത് അന്താരാഷ്ട്ര മാനദണ്ഡങ്ങളുടെ ലംഘനമായി ചിത്രീകരിക്കാനുള്ള ഏതൊരു ശ്രമവും ന്യൂഡല്ഹി നിരസിക്കുന്നു’ എന്ന് വ്യക്തമാക്കിയാണ് ഇന്ത്യയുടെ പ്രതികരണം. ഖാലിസ്ഥാന് ഭീകരന് ഹര്ദീപ് സിംഗ് നിജ്ജാറിന്റെ കൊലപാതകവുമായി ബന്ധപ്പെട്ട തര്ക്കത്തിനിടെ ഇന്ത്യയില് നിന്ന് 41 നയതന്ത്ര ഉദ്യോഗസ്ഥരെയാണ് കാനഡ പിന്വലിച്ചത്.