യുഎഇയിൽ സ്വകാര്യകമ്പനികളിൽ അർദ്ധവാർഷിക സ്വദേശിവൽക്കരണം നടപ്പാക്കാനുള്ള സമയപരിധി ഇന്ന് അവസാനിക്കും. 50 ജീവനക്കാരോ അതിൽ കൂടുതലോ ഉള്ള സ്വകാര്യ മേഖലയിലെ കമ്പനികളിൽ ആണ് അർദ്ധ വാർഷിക സ്വദേശിവൽക്കരണം നടപ്പാക്കേണ്ടത്. സ്വദേശിവൽക്കരണം പൂർത്തിയാക്കാത്ത സ്വകാര്യകമ്പനികൾക്ക് ജൂലായ് 8 മുതൽ പിഴ ബാധകമാകുമെന്നും ഹ്യൂമൻ റിസോഴ്‌സസ് ആൻഡ് എമിറേറ്റൈസേഷൻ മന്ത്രാലയം അറിയിച്ചു.
50 ജീവനക്കാരോ അതിൽ കൂടുതലോ ഉള്ള സ്വകാര്യകമ്പനികളിൽ തങ്ങളുടെ ജീവനക്കാരുടെ 2 ശതമാനം സ്വദേശികളാണെന്ന് ഉറപ്പുവരുത്തണമെന്നും തുടർന്ന് ഓരോ ആറ് മാസത്തിലും സ്വദേശികളുടെ എണ്ണം ഒരു ശതമാനം വെച്ച് വർദ്ധിപ്പിക്കണമെന്നും കഴിഞ്ഞ വർഷം മന്ത്രാലയം തൊഴിലുടമകളോട് നിർദ്ദേശിച്ചിരുന്നു.
ബലിപെരുന്നാൾ അവധി പരിഗണിച്ച് കമ്പനികൾക്ക് കൂടുതൽ സമയം നൽകാൻ മന്ത്രാലയം തീരുമാനിച്ചതിന്റെ അടിസ്ഥാനത്തിൽ അർദ്ധ വാർഷിക സ്വദേശിവൽക്കരണം പൂർത്തിയാക്കാനുള്ള സമയപരിധി ജൂൺ 30 ൽ നിന്ന് ജൂലൈ 7 വരെ നീട്ടി നൽകിയിരുന്നു.
സമയപരിധി അവസാനിച്ചുകഴിഞ്ഞശേഷം വീഴ്ച വരുത്തുന്ന സ്വകാര്യ കമ്പനികള്‍ക്ക് ഓരോ മാസത്തിലും 7000 എന്ന തോതിൽ 42,000 ദിര്‍ഹം വരെ പിഴ അടക്കേണ്ടി വരും. കൃത്രിമം കാണിക്കാന്‍ ശ്രമിക്കുന്ന സ്ഥാപനങ്ങള്‍ക്കും പിഴ ഉള്‍പ്പെടെ വലിയ നിയമ നടപടികള്‍ നേരിടേണ്ടി വരും.