എറണാകുളം മഹാരാജാസ് കോളജിന്റെ പേരില് വ്യാജരേഖ ചമച്ച കേസില് എസ്എഫ്ഐ നേതാവായ കെ.വിദ്യക്കെതിരെ ജാമ്യമില്ലാക്കുറ്റം ചുമത്തി കേസെടുത്തു. ഐപിസി 465, 468,471 തുടങ്ങിയ വകുപ്പുകള് ചുമത്തിയാണ് കേസ്. ഏഴുവർഷം വരെ തടവു ലഭിക്കാവുന്ന കുറ്റങ്ങളാണ് ചുമത്തിയിട്ടുള്ളത്. കാലടി സംസ്കൃത സര്വകലാശാലയില് പിഎച്ച്ഡി വിദ്യാര്ഥിയായ കാസര്കോട് തൃക്കരിപ്പൂര് സ്വദേശിനി കെ.വിദ്യ എന്ന വിദ്യ വിജയന് ഗെസ്റ്റ് ലക്ചറര് നിയമനത്തിനായി വ്യാജ പ്രവൃത്തിപരിചയ സര്ട്ടിഫിക്കറ്റ് ഹാജരാക്കിയത് വിവാദമായതോടെയാണ് കേസെടുത്തത്.
ഈമാസം രണ്ടിന് പാലക്കാട് അട്ടപ്പാടി ആര്ജിഎം ഗവ. കോളജില് ഗെസ്റ്റ് ലക്ചറര് ഇന്റര്വ്യൂവിനു വിദ്യ 2 സര്ട്ടിഫിക്കറ്റുകള് ഹാജരാക്കിയിരുന്നു. 2018 ജൂണ് 4 മുതല് 2019 മാര്ച്ച് 31 വരെയും 2020 ജൂണ് 10 മുതല് 2021 മാര്ച്ച് 31 വരെയും മഹാരാജാസിലെ മലയാള വിഭാഗത്തില് പഠിപ്പിച്ചിരുന്നുവെന്നാണ് ഇവയില് പറയുന്നത്. ആദ്യ സര്ട്ടിഫിക്കറ്റിലെ കാലയളവില് വിദ്യ മഹാരാജാസിലെ പിജി വിദ്യാര്ഥിയായിരുന്നു.
ഇന്റര്വ്യൂ പാനലിലുള്ളവര് ലോഗോയും സീലും കണ്ടു സംശയം തോന്നി മഹാരാജാസ് കോളജുമായി ബന്ധപ്പെട്ടപ്പോഴാണ് സത്യവസ്ഥ പുറത്തായത്. കോളജ് അധികൃതരുടെ പരാതിയിൽ വിദ്യക്കെതിരെ കേസെടുത്ത എറണാകുളം സെൻട്രൽ പൊലീസ്, കോളജ് പ്രിൻസിപ്പലിന്റെ മൊഴി രേഖപ്പെടുത്തിയിരുന്നു. കേസ് അട്ടപ്പാടി അഗളി പൊലീസിന് കൈമാറിയേക്കും.